Read Biblija - Pe Baltitko Romani čib (Romanes) 2019 Baltic Romani Bible Isajos 6 Bible Online

Isajos 6 - Biblija - Pe Baltitko Romani čib (Romanes) 2019 Baltic Romani Bible bible

Isajos 6

¹Dro dová berš, kóli myjá králi Ozíia, me dykhcjom Ras-Devlés, Savó bešelas pe vučó kralítko štéto, a jagóro (krajo) pe uribén Léskiro pherdiakirdiá sarí Khangirí.

²Pašýl Léste sys terdé sierafimy: kažnonéste léndyr sys šov phaká (kryly); duje phakenca kažno zakerelas péskiro muj, iščo (inké) duje phakenca zakerelas péskire ĥerá, a duje phakenca vurnialas.

³Jone kharenas jekh jekhés i rakirénas: “Svénto, Svénto isyn Raj Devél, bolybnáskire-jangoléngiro, sarí phuv isyn pherdý Léskire baripnasa!”

⁴Zaizdranas vudará léngire zaniendyr, kher pherdija kučoné thuvesa.

⁵Me phendjom: “Bida mánge! Xasijom me, pal-dová, so me som manúš nažužé ušténca, me dživáva maškír manušénde nažužé ušténca, i jakhá miré dykhenas Kralís, Ras-Devlés, bolybnáskire-jangolengires.”

⁶Tén'ci vurniandyja ke me jekh sierafimendyr, a dro léskiro vast sys xačkirdo vangar, savó jov lyjá altarjostyr.

⁷Jov čiladiá miré uštá i phendiá: “Ake, davá čiladiá tyré uštá, nálačho réndo tyró isyn lynó krig tútyr, i grého tyró isyn žužakirdo.”

⁸Me šundjom Ráskire-Devléskiri zan. Jov phenelas: “Konés Mánge te bičhavav? Kon poddžála vaš Aménge?” Me phendjom: “Ake, me som, bičháv man.”

⁹Jov phendiá: “Džá, phen dalé narodoske: ‘Javéna te šunén — i na ĥaljona, javéna te dykhén jakhénca — i na rozdykhena [dykhéna-r.s.].’

¹⁰Pal-dová so nakovlo jaciá dalé-narodoskiro iló, pharés lénge te šunén zakerde jakhénca, i na dykhéna jakhénca, i na šunéna kanenca, i na ĥaljona ilésa, i na obrisjona, sob (kaj) Me te vysastiakirav len.”

¹¹Me phendjom: “Ci ĥará (dlúges) davá javéla, Rajo, Dévla?” Jov phendiá: “Pirijačéla, kóli dalé fórja javéna čhučé, nikón na javéla te dživél dre lénde, kóli džána manušá dalé kherendyr, kóli daja phuv javéla sarésa čhučí.

¹²Otbičhavela Raj Devél manušén, nikonés na jačkiréla pe daja phuv.

¹³I kóli jačélape déšto paš pe láte i risjola, usajékh javéla phuv čhučí, ne syr tierievinfostyr i dembostyr, kóli jone isyn čingirde telé, isyn jačaibén, adiáke svénto jačaibén jačélape.”