Read Biblija - Pe Baltitko Romani čib (Romanes) 2019 Baltic Romani Bible Isajos 60 Bible Online

Isajos 60 - Biblija - Pe Baltitko Romani čib (Romanes) 2019 Baltic Romani Bible bible

Isajos 60

¹“Uštý (ĥazdepe), xačov syr dud (svéto), Jerusalimo; javdiá tyró dud (svéto) i bari patýv Ráskire-Devléskiri gijá upré pe túte.

²Ake, kalypén (ciamlypén) zakerela phuv, i kalypén učhakiréla narody, a upralestyr pe túte Raj Devél zaziainela, i bari patýv Léskiri sykadjola upré pe túte.

³Najudýtka narody javéna ke tyró dud (svéto), králja javéna ke ziainyben, savó isyn upré pe túte.

⁴Gazde tyré jakhá, podykh trusciál (pir saré rigá): saré jone skedénape, džána ke tu; tyré čhavé džána durál, lydžána pe vastá tyré čhajén.

⁵Tén'ci dykhésa i obradynesape, izdrala, buĥljola tyró iló: barvalypén morjoskiro (derjavéskiro) javéla ke tu, barvalypén manušéngiro, javéla tyró.

⁶But vierbliudy ke tu javéna, dromadary Madiamostyr i Jefatyr; saré jone Savatyr javéna, janéna suvnakáj i ladano, phenéna sarénge pal baripén Ráskiro-Devléskiro.

⁷Saré Kidaroskire bakré skedyné javéna ke tu; Nievaifoskire bakré javéna te dynarinén túke; džána upré pe altárjo Miro lačhé sventoné dyibnasa, i Me proslavinava kher Miré baripnasa.

⁸Kon davá vurniala, adiáke syr óbloki, syr golumbo vurniala ke péskiro kher?

⁹Čačó, Man ostrovy užakiréna, i angíl lénde isyn pármy Farsisoskire, sob (kaj) te pirilydžan dur tyré čhavén, léngiro rup i suvnakáj vaš tyró Ráskire-Devléskiro lav, pal-dová so Jov dyjá túke bari patýv.

¹⁰Tén'ci čhavé javire narodoskire manušéndyr javéna te čhuvén tyré vánty, králja léngire léna te kerén butý túke; pal-dová, so dre Mirí xolý Me dukhavavas tut, ne dre Mirí lačhí vólia Me potanginava tut.

¹¹Tyrí pórta (vráty) saré dyvesá javéna otkerde; ni dyvesé, ni ratý na zakernape (na phandenape), sob (kaj) te janén ke tu Najudytkoné-manušéngiro mištypén, te janén léngire kral'jén.

¹²Narodo i kralipená, savé na zakamena te kerén butý túke, xasjona; kadasavé narody xasjona sarésa.

¹³Baripén Livanoskiro ke tu javéla; kipariso, sosna i kiedro javéna khetané, sob (kaj) te ukeden (te šukarjakiren) štéto, kaj isyn Miro svénto štéto; Me dáva bari patýv štetoske, kaj isyn terdé Miré ĥerá.

¹⁴I javéna ke tu čhavé odolé-manušéngire, savé tut pritasavenas; jone bandjona tel tyró vast, i peréna ke tyré ĥerá saré, kon pe túte dykhciá vučipnása, i kharna tut Ráskire-Devléskire forosa, Sventoné Izrailjoskire Sionosa.

¹⁵Zamiést dová, so tu sánas jačkirdo, i manušá tut na vyrikirenas, i, sob (kaj) nikón pir túte te na prodžal, Me keráva tútyr baripén pe saré viéki; radymása (lošasa), saví nikoli na pirijačéla.

¹⁶Tu javésa te p'jes ke čalypen narodoskiro thud; i te p'jes (te sosines) kralískire kolynendyr, i ĥaljosa, so Me som Raj Devél, tyró Zrakhibnari, Odová, Kon vykindia tut, Zoraló Jakovóskiro.

¹⁷Harkóma (mied') Me zaparuvava túke pe suvnakái, sastýr — pe rup, kaštá Me paruvava pe xarkóma, a bará — pe sastyrá; tyré thagarisa (kniazjosa), savés Me čhuváva, javéla ramánjo (miro), a čačipén javéla te pridykhel pal túte.

¹⁸Na javéna te šunén butýr, so pe tyrí phuv isyn nahrata réndy, so tyré rigá oblena i keréna čhučé; tu kharesa tyré vánty zrakhibnasa i tyré pórty-baripnasa.

¹⁹Kham túke butýr na javéla te del dud (svéto), čhon na jačéla te svencynel, ne Raj Devél javéla tyré dudesa (svetosa) viéčnes, Devél javéla tyré baré patyvása.

²⁰Kham tyró butýr na zadžála, čhon na garadjola, pal-dová so Raj Devél javéla vaš túke viečnone dudesa (svetosa), džána krig tyré bibahtalé dyvesá.

²¹Saró tyró narodo javéla čačunó, pe saré beršá priléla phuv syr meknó mištypén — davá isyn otbaripen, so Me barjakirdjom, Miré-vastengiro réndo; saró davá javéla, sob (kaj) te šarén Man.

²²Tykné manušéstyr tysjonco bijandjola, samone bizorjakirestyr manušéstyr bijandjola zoraló narodo. Me, Raj Devél, sýges keráva davá, kóli javéla léskiro časo.”