Read Biblija - Pe Baltitko Romani čib (Romanes) 2019 Baltic Romani Bible Isajos 64 Bible Online

Isajos 64 - Biblija - Pe Baltitko Romani čib (Romanes) 2019 Baltic Romani Bible bible

Isajos 64

¹O, kóli b Tu rosčhindian bolybén i gíian telé! Bérgi shačine b Tyré móstyr.

²Syr xačkirdé jagatyr, saví bilavela (plavinela), syr paniéstyr, savó keradjola, sob (kaj) te džinén Tyró lav džindló Tyré vergénge; sob (kaj) te izdran angíl Túte narody.

³Kiéli Tu keresas darane réndy, savé ame na užakirasas, i Tu džasas telé — bérgi biladjonas (tainenas) Tyré móstyr.

⁴Pal-dová so nikoli manušá na šunenas kanenca, i nisaví jakh na dykhciá javirés devlores. Tu san Jekh Devél, Savó but kerdiá vaš odolénge, konéste isyn nadiéia pe Túte.

⁵Tu lačhipnása prilesas odolés, kon radynelaspe i kerélas pir čačipén, kon ripirelas pal Túte pe Tyré dromá. Ne, ake, Tu xoliasyjan, pal-dová so ame gara (dlúges) lyjam te kerás gréhi; i syr žie ame zrakhasape?

⁶Saré ame kerdiampe-syr nažužo priedmieto, amarí patýv — syr zamakhny ídia, ame šutijam syr patrín (listo); amaré nalačhé réndy lydžiné amen, syr balvál.

⁷Na sys odolés, Kon by khardiá Tyró lav, kon zakamdiá b te rikirelpe pal Túte; paldavá Tu garadian Tyró muj améndyr, Tu jačkirden amen te xasjovas grehéndyr.

⁸Ne kakaná, Rajo Dévla, Tu san amaró Dad; ame sam ĥleja (bláta), savjátyr keréna khoré, a Tu — Odová, Kon sozdyjá amen; saré ame — Tyré-vastengiri butý.

⁹Na xoliasov ĥará (dlúges), Rajo Dévla! Na rípir viéčnes pal gréhi! Dykh akaná — saré ame sam Tyró narodo.

¹⁰Tyré foróskire svénta štéty kerdépe čhučé phuvjása; Sióno — čhučí phuv, Jerusalimo isyn občordo.

¹¹Kher, kaj ame sventiakirasaspe, kaj sys amarí patýv i kaj amaré dadá slavinenas Tut, isyn shačkirdo jagása; amaró barvalypén isyn rosčordo.

¹²Kóli saró davá pherdija, ci javésa iščo (inké) tu te zrikires Pes améndyr, Rajo Dévla? Ci javésa Tu ničí te na rakirés, te xoliasos pe aménde butýr, syr trej?