Read Biblija - Pe Baltitko Romani čib (Romanes) 2019 Baltic Romani Bible Isajos 65 Bible Online

Isajos 65 - Biblija - Pe Baltitko Romani čib (Romanes) 2019 Baltic Romani Bible bible

Isajos 65

¹“Me sykadjom Pes na odolénge, kon phučelas pal Mánde; Man lathné na odolé, kon rodelas: “Ake Me, ake”, Me phenavas narodoske, savó na kharélaspe Miré lavésa.

²Kažno dyvés protyrdavas Miré vastá ke narodo, savó na kandéla, savó psiréla nalačhé dromésa, savó dživéla pir léskiri godý.

³Ke narodo, savó dre jakhá kaliakirelas Man: janéla svénta dyibená dro veš, xačkiréla fimiámo pe bará.

⁴Bešela dre koplicy (grobnicy) i rat'kirela dre ĥiebár (pieščera); xála balyčano mas i nálačho (nažužo) xabén isyn dre léskire čaré.

⁵Savó rakiréla: ‘Terdjov, na džá ke me, pal-dová so me som svénto vaš túke.” Jone isyn thuv, savó trej Mánge te sungav, jag, saví kažno dyvés xačola.

⁶Ake, so isyn čhindló angíl Miro muj: “Na lavá Me te vyrikirav, Me otdáva pale, otdáva pale lénge.

⁷Tumaré gréhi i khetané tumaré-dadengíre gréhi, — rakiréla Raj Devél; pal-dová tumaré dadá xačkirenas fimiámo pe bérgi, pe tykné bérgicy košenas Man; Me otmierinava lénge pal saré léngire réndy.’

⁸Adiáke rakiréla Raj Devél: “Kóli barjola vinagrado, tén'či rakiréna: ‘Na čhin les, paka jov vybarjola, dre léste isyn bahtiakiribén; adiáke Me keráva vaš Miré pishar'jénge, sob (kaj) te na xasiakiráv sarén.

⁹I vylydžava Me ródo Jakovostyr, Juda priléla Mándyr Miré bérgi, davá priléna Miré vykedyné; Miré pishárja (raby) odój javéna te dživén.

¹⁰Pe Sarono javéna te čaravenpe bakriá; pe Akhoro guruva javéna te otkhinjon, Miré narodoskire, savó lathiá Man.

¹¹A tumen, kon jačkirdiá Ras-Devlés, bistyrde pal Mirí svénto bérga, kon keravela xabén vaš Gadoske, čhuvéla pherdó čaró vaš Mieni (Sud'ba).

¹²Me tumen otdáva kurtalake; tumé peréna pe čangá i tumen zamarna, pal-dová so Me khardjom i tumé na otphendlé, rakirdjom — tumé na šunenas, a kerénas nakuč angíl Miré jakhá i vykedenas dová, so sys Mánge na pir iló.’”

¹³Paldavá adiáke rakiréla Raj Devél: “Ake, Miré pishárja xána, a tumé bokhalé javéna; Miré pishárja javéna te p'jen — a tumé javéna bi panieskiro.

¹⁴Miré pishárja javéna te radynénpe, a tumé javéna ladžakirdé; jone javéna te bagán iléskire radymátyr, a tumé javéna te godlen iléskire dukhatyr, i zarovena phagirdé duhóstyr.

¹⁵I jačkirena tumaró lav, sob (kaj) te prokošen les Miré vykedyné manušá; i zamarla tut Raj Devél, a Péskire pishar'jén kharéla javire lavésa.

¹⁶Kóli vari-kon bahtiakiréla pes Lésa pe daja phuv, javéla bahtiakirdó čačuné Devlésa, i kon sovlahala pe phuv, javéla te sovlahal čačuné Devlésa, pal-dová so ĥaratuné bidy bistrenape, javéna garadé Miré jakhéndyr.

¹⁷Ake, Me keráva nevó bolybén i neví phuv; pal doiá phuv bolybnasa, savé sys angledýr vagedyr (ĥaredyr) butýr na priripirna.

¹⁸A tumé javéna bahtalé, javéna te radynénpe saré beršá pal dová, so Me keráva. Ake, Me keráva Jerusalimo bagaibnasa i léskiro narodo radymása.

¹⁹I Me láva te radynavpe pal Jerusalimo; Me javáva radypnytko pal Miro narodo; odój butýr nikón na šunéla roviben i godlypen.

²⁰Odój butýr na javéla tykné čhavés i phures, savó na dživdiá saré péskire beršá, pal-dová so šelberšengiro manúš meréla ternesa; ne šelberšengiro grehítko javéla prokošnó?

²¹I javéna te kerén kherá, i javéna te dživén dre lénde; te barjakirén vinagradniki, i javéna te xan léndyr.

²²Na javéna te kerén, sob (kaj) javír manúš odój te dživél; na javéna te barjakirén, sob (kaj) javír te xal, pal-dová so Miré-narodoskire dyvesá javéna, syr dyvesá ke kašt; i vykedyné Miré ĥará (dlúges) javéna te rikirenpe ke dová, so kerdé léngire vastá.

²³Na javéna te kerén butý ivjá (darmes), na javéna te bijanen čhavorén pe men'ka, pal-dová so javéna rodosa, bahtiakirde Devléstyr, i léngire čhavoré lénca.

²⁴Adiáke javéla: angíl dová, syr jone kharéna Man — Me phenáva; jone iščo (inké) javéna te rakirén, i Me šunava.

²⁵Ruv i bakroró javéna khetané te čaravenpe; ščer (liévo) javéla te xal phus, syr guruv, a sap xála práho. Jone na javéna te zamarén, na javéna te xasiakirén (te kerén čoripén) pe Mirí svénto bérga”, — rakiréla Raj Devél.