Read Biblija - Pe Baltitko Romani čib (Romanes) 2019 Baltic Romani Bible Isajos 66 Bible Online

Isajos 66 - Biblija - Pe Baltitko Romani čib (Romanes) 2019 Baltic Romani Bible bible

Isajos 66

¹Adiáke rakiréla Raj Devél: “Bolybén isyn Miro trono, a phuv isyn štéto vaš Miré ĥerá; kaj tumé keréna kher vaš Mánge, kaj isyn štéto, sob (kaj) Me te otkhinjovav?

²Pal-dová so saró davá kerdiá Miro vast, i saró davá sys, — rakiréla Raj Devél. “Ake, pe konéste Me podykhava: pe odoléste, kon isyn na phut'kirdo, phagne duhósa, kon izdrala angíl Miro lav.

³Odová, kon začhinela guruvés isyn sýrby odová, kon zamarela manušés. Kon janéla bakrores vaš svénto dyibén isyn sýrby odová, kon zatasavela džukles; kon janéla dáro isyn sýrby odová, kon čhuvéla balyčano rat; kon xačkiréla fimiámo, isyn sýrby odová, kon mangelape idoloske; syr jone vykedyné péskiro drom i davá nalačhipen isyn drógo léngire ileske.

⁴Tén'ci Me adiáke-pac' keráva lénca pir léngiro xohaibén, i Me janáva dar vaš lénge, pal-dová so Me khardjom — i nikón na otphendiá; Me rakiravas — jone na šunenas, a kerénas nalačhé réndy angíl Miré jakhá i vykedenas dová, so Mánge na sys pir iló.

⁵Šunén Ráskire-Devléskiro lav odolé, kon izdrala angíl Léskiro lav! Tumaré pšála na rikiréna dro iló tumen, jone tradéna tumen pal Miro lav i rakiréna: “Mek Raj Devél te sykavél Pes dro Péskiro baripén, i ame podykhasa, syr tumé javéna te radynénpe.” Ne jone javéna ladžakirdé.

⁶Ake, šuminen dro fóro, ake, isyn zan khangirjátyr: Ráskire-Devléskiri zan; Devél otpleskirela Léskire vergénge.

⁷Na menčynelaspe joi, kóli bijanelas, ne bijandiá; iščo (inké) na poddgija dukh lákiri, a joj bijandiá čhavés.

⁸Kon šundiá dasavo? Kon dasavo dykhciá? Ci kerdiápe phuv pal jekh dyvés? Ci narodo sys adiáke sýges bijandlo — pal jekh mólo; syr Sióno? Sióno nábut vyrikirdia dukh i bijandiá péskire čhavén.

⁹“Ci Me som Adasavó, so Me dolydžava, sob (kaj) džuvlý te bijanél i Me na davá zor vaš davá, — rakiréla Raj Devél. “Ci Me dáva zor, a na davá, sob (kaj) te bijanél?” — rakiréla Devél tyró.

¹⁰“Radynénpe Jerusalimosa, radynénpe pal léste saré, konéske drógo isyn Jov! Radynénpe radypnasa khetané Lésa saré, kon tanginelas (žalinelas) pal Léste;

¹¹sob (kaj) te xan i te čaljon Léskire radymátyr, te p'jen i te radynénpe baré Léskire baripnastyr.”

¹²Adiáke rakiréla Raj Devél: “Ake, Me dáva léske svéto, syr reka (len'); manušéngiro barvalypén isyn syr reka (len'), saví čhuvélape vaš tumarí baht; pe vastá tumen lydžána, pe čangá javéna te laščynen.

¹³Syr daj podrikiréla dre bibáht, adiáke Me tumen podrikirava; tumé bahtalé javéna dro Jerusalimo.”

¹⁴I tumé dykhéna davá, i obradynelape tumaró iló; kokalý tumaré sýrby neve jačéna, syr zeleny čar, i odkerlape Ráskiro-Devléskiro vast ke Léskire pishárja, a pe péskire vergénde Jov xoliasóla.

¹⁵Ake, dre jag Raj Devél javéla, i léskire vurdená — syr zoralý balvál. I javéla, sob (kaj) te sykavél Péskiri xolý zorjása te sykavél Péskire lavá pal xolý xačkirdé jagása.

¹⁶Raj Devél javéla te sendinel kažno loč (plot'), jagása i xoliása, but manušén Jov xasiakiréla.

¹⁷“Odolé, kon sventiakirela i žužakirel pes dro vešá, i xána balyčano mas, magiripén i karmusen (myšen) — saré jone xasjona”, — rakiréla Raj Devél.

¹⁸“Pal-dová so Me džinóm léngire réndy i dúmy; ake, Me javáva te skedav saré narody i jekhe-čibjakire ródy; jone javéna i dykhéna Mirí patýv.

¹⁹I Me čhuváva pe lénde ĥiertýk (dosykaiben), Me bičhaváva zrakhné manušén léndyr ke narody: dro Farsiso, dre Pula i Luda, ke odolé, kon léla dro vast lúko te nadtyrdel, dre Tubala i dre Javana, pe duratuné ostrovy, savé na šundlé pal Mánde i na dykhné Mirí patýv; i jone phenéna dre narody pal Miro baripén.

²⁰I jone janéna tumaré pšalén saré manušéndyr syr dáro Ráske-Devléske, i lydžána len pe grénde i pe maribnýtka vurdená, pe guruvende, pe sygnone vierbliudende — lydžána len pe Mirí svénto bérga dro Jerusalimo, — rakiréla Raj Devél, — adiáke syr čhavé Izrailjoskire janéna dáro dro Ráskire-Devléskiro Kher, janéna les dro žužó (čysto) khoró.

²¹I léndyr Me láva rašán i Lievitén”, — rakiréla Raj Devél.

²²“I syr nevó bolybén i neví phuv, savé Me sozdáva, saró časo javéna angíl Miro muj, — rakiréla Raj Devél, — adiáke javéla i tumaré rodosa i tumaré lavésa.

²³Tén'ci kažnoné čhonestyr dro čhon, kažnoné savatostyr dro sávato (subóta) javéla te džal kažno loč (plot'), angíl Miro muj, sob (kaj) te den patýv Mánge”, — rakiréla Raj Devél.

²⁴“I jone javéna te vydžán i javéna te dykhén odolé-manušéngire trúpy, kon otgijá Mándyr; pal-dová so kirmo léngiro na xasjola, i jag léngiri na murdjola; jone javéna syr džungalypén (magiripén) vaš kažno loč (plot').”