Read Biblija - Pe Baltitko Romani čib (Romanes) 2019 Baltic Romani Bible Isajos 7 Bible Online

Isajos 7 - Biblija - Pe Baltitko Romani čib (Romanes) 2019 Baltic Romani Bible bible

Isajos 7

¹Sys dre dolé dyvesá, kóli Aházo, Iofamóskiro čhavó, Ozíiaskiro čhavó sys králi pe Judéia, o Riecyno, Sirijákiro králi, o Fakiejo, Riemalijoskiro čhavó, králi Izrailjoskiro, giné maribnása pe Jerusalimo, ne na lyné les.

²Sys phendló ke Davidóskiro kher, sys otkerdo: “Sirijani isyn terdé pe Jefriemóskiri phuv”, izdrandyja léskiro iló, léskire-narodoskiro iló, syr izdrana kaštá dro veš, kóli phurdela balvál.

³I phendiá Devél Isajoske: “Vydža péskire čhavésa, Šeariasuvosa ke Aházo, odorík, kaj léna paní, pe drom ke félda, kaj makhena bakrengiri výlna (šers').

⁴Phen léske: ‘Dykh i jav štyl, na andyrša, mek te na darel tyró iló duje dalendyr destendyr, savé xačona, Riecynoskire i Sirijanengire i Riemalijaskire čhavéskire xoliátyr, saví lyjá te xačol pe túte.’

⁵Sirija, Jefriémo i Riemaliinoskiro čhavó kaména te kerén túke čoripén, jone phenéna:

⁶“Džása maribnása pe Judéia, gazdasa la, zalasa, čhuvasa Tavieiloskire čhavés lákire kralísa.

⁷Ne Raj Devél phenéla adiáke: “Na javéla pir tumaró.

⁸Sirijákiro šeró isyn Damásko, Damaskoskiro šeró isyn Riecyno, a kóli prodžána šovdešá i pandž berš, Jefriémo pirijačéla te javél narodosa.

⁹A Jefriemoskiro šeró isyn Samárija, a Samarijakiro šeró isyn Riemalijaskiro čhavó. Kóli tumé na patiána, to tumé kerene adiáke, paldová, so tumé na upatiándyne.”

¹⁰Iščo (inké) rakirélas Raj Devél ke Aházo i phendiá:

¹¹“Mang péske ĥiertýk (znamiénijo) tyré Rástyr-Devléstyr, mang dro xoripén ci dro vučipén.”

¹²Phendia Aházo: “Me na javáva te mangav, na javáva te propatiakirav Devlés.”

¹³Tén'ci phendiá Isajo: “Šun, kher Davidóskiro! Manušá keréna vaš tuménge pharé butý, a tumé kaména, sob (kaj) miro Devél adiáke vaš tuménge te kerél?

¹⁴Ne kokoró Raj Devél déla ĥiertýk/ dosykaiben tuménge: ake, e patyvalý terný džuvlý priléla i bijanéla čhavés, i déna Léske lav: Emanuilo.

¹⁵Jov javéla te xal thud i avgín ke dolé dyvesá, kóli vysykljola, syr te otčhurdel nalačhipen i te vykedel lačhipén.

¹⁶Pal-dová, so angledýr, syr davá čhavoró vysykljola te otčhurdel nalačhipen i te vykedel lačhipén, phuv, savjátyr tu daresa, jačkirena duj lákire králja.

¹⁷Ne janéla Raj Devél ke tu, ke tyró narodo, ke tyré-dadéskiro kher dasavé dyvesá, savé na sys, dolé časostyr (cyrostyr), syr otgijá Jefriémo Judejátyr; Jov janéla Asirijákire kralís.”

¹⁸I javéla dro dová dyvés: vykharela Raj Devél matlia (muha), saví vurniala pašýl Jegiptóskire reka (len') i byrlia (pčola), saví vurniala pe Asirijakiri phuv.

¹⁹Jone privurniana, bešena saré jone pe lengi, savé isyn čhučé, pe bérgi, pe saré phusadytka čarjá; pe saré kaštá (drevy).

²⁰Dro dová dyvés obmuravela Raj Devél muradluniasa (britvasa), saví Jov zalyja dolé butiarnende pale reka (len'), Asirijákire kralíste šeró i balá pe ĥerá, občhinela čhora (broda).

²¹I javéla dro dová dyvés: konéste isyn guruvny i duj bakriá,

²²odová javéla te xal ksil, pal-dová so jone déna but thud; ksil i avgín javéna te xan saré, kon jaciápe pe doiá phuv.

²³Javéla dro dová dyvés: pe kažno štéto, kaj barjolas tysjonco (bar) vinagradoskire kaštá pe tysjonco rupuvé mardé, javéna te barjon phusadytka čarjá.

²⁴Javéna te psirén odorík maribnytkoné bustienca (strielenca) i lukenca, pal-dová, so sarí phuv javéla učhakirdy phusadé čar'jenca.

²⁵Na pe jekh bérga, savé angledýr obkerenas motygasa, tu na poddžasa, pal-dová so tu javésa te dares phusadytkone čar'jendyr: odorík javéna te vytraden guruvén, tyknó murdál javéla te marel (te tasavel) ĥerénca dalé čarjá.”