Read Biblija - Pe Baltitko Romani čib (Romanes) 2019 Baltic Romani Bible Isajos 8 Bible Online

Isajos 8 - Biblija - Pe Baltitko Romani čib (Romanes) 2019 Baltic Romani Bible bible

Isajos 8

¹I phendiá mánge Raj Devél: “Le péske bari papiria (svítko), čhin odój manušytkoné čhinybnasa: Magier — šielal (šalal) — xaš — baz.”

²Me lyjom péske čačuné jakhitkonen (svidietielien), savé sys: Urijas, rašás, i Zaharijas, Varahiinoskire čhavés.

³Lyjom péske džuvliá proročyca dre romniáte, joj bijandiá mánge čhavés. I phendiá mánge Raj Devél: “De léske lav ‘Magier — šielal — xaš — baz.’

⁴Pal-dová so angledýr, syr bijáto vysykljola te phenél: ‘Dádo Miro, Dajo Mirí’ — barvalypén Damaskostyr, doresybén Samarijatyr lydžána angíl Asirijákire kralíste.”

⁵Iščo rakirélas ke me Raj Devél i phendiá:

⁶“Pal dová, isyn na pir iló dalé narodoske isyn paní Siloamoskiro, savó štylés thadéla, a šarela Riecynos i Riemaliinoskire čhavés,

⁷to janéla ke jov Raj Devél baró paní — Asirijákire kralís léskire baripnasa; i ĥazdélape davá paní, vydžála péskire bregendyr.

⁸I prodžála jov pir Judéia, vučés doj ĥazdélape, dodžála ke men i rosčhurdela péskire phaká (kryly) dro saró Tyré-phuvjákiro buglypen, Emanuilie!”

⁹Marénpe, narody, ne darén, šunén, saré phuvjá, savé isyn dur adathýr! Len kurtála pe maribén, ne darén, len kurtála, ne darén!

¹⁰Zaduminen vari-so te kerén, ne zaduminyben rosphagirelape, rakirén lav, ne ničí na vydžála daléstyr, pal-dová so Devél isyn aménca!”

¹¹Adiáke rakirélas mánge Raj Devél, kiéli rikirelas pe mánde zoraló vast, i Jov priphenelas, sob (kaj) me te na džav dalé-narodoskire dromésa, i adiáke phendiá:

¹²“Na kharén čorahane zrakiribnasa davá, so dová narodo kharéla čorahane zrakiribnasa, na darén doléstyr, sóstyr jov daréla, i na strahadjon.

¹³Den svénto patýv Ráske-Devléske, bolybnáskire-jangolengireske, Jov isyn tumarí dar, Jov isyn tumaró trašaibén!

¹⁴Jov javéla sventonesa vaš tuménge, i baresa, savéstyr peréna, bergasa, savjátyr pirijačena te patián duj kherá Izrailjoskire, feliasa (pietliasa) i khudiasa (sietiasa), savénca uhtylena Jerusalimoskiren manušén.

¹⁵But kon léndyr peréla, rozmarelape, zapentynelape i javéna uhtyldé adasavé manušá.”

¹⁶Zaphande dophenybén i garav pe čergenorí (piečat') davá sykadyipen (otkeriben) angíl Miré sykliaibnytkonende.

¹⁷Paldavá me dopatiava Ráske-Devléske, Savó garadia Péskiro muj Jakovóskire (Izrailjoskire) kheréstyr, me patiáva Léske.

¹⁸Ake, me péskire čhavorenca, savén dyjá mánge Raj Devél, syr priphenybén i angilphenybén dro Izrailjo Rástyr-Devléstyr, bolybnáskire-jangoleskirestyr, Savó dživéla pe bérga Sióno.

¹⁹I kóli phenéna tuménge: “Džá ke odolé, kon vykharela mulen, kon isyn čovahano, kon zumavela”, — tén'či tumé phenén: “Ci na trej, sob (kaj) narodo te rodél péskire Devlés? Ci phučena muléndyr pal džidé manušénde?”

²⁰Propatiakiren len pir sykadyipen dro Zakóno i otkeriben. Kóli jone (kon vykharela mulen) na rakiréna adiáke, syr davá lav, tén'či nane dre lénde dud (svéto).

²¹Jone javéna te psirén pir phuv, občorde i bokhalé, a dre bokhalé dyvesá javéna te xoliason, javéna te košen péskire kralís i péskire Devlés.

²²Javéna te dykhén upré i podykhena pe phuv: ake, bída, kalypén; javéna čhurdyné dro kalypén, ne na javéla kalypén saré dyvesá odój, kaj jov akaná skedyjape.