Read Biblija - Pe Baltitko Romani čib (Romanes) 2019 Baltic Romani Bible Isajos 9 Bible Online

Isajos 9 - Biblija - Pe Baltitko Romani čib (Romanes) 2019 Baltic Romani Bible bible

Isajos 9

¹Dro anglatunó časo (cýro) sys teliakirdy Zavulonoskiri phuv i phuv Niefalimoskiri; ne dová časo, savó javéla, ĥazdéla baripnasa drom pašýl mórjo (derjáv), pal Iordanoskiri phuv, Galiliéia, kaj Najudýtka manušá dživéna.

²Narodo, savó psiréla dro kalypén, javéla te dykhél dud; ke odolé, kon dživelas dre kalypén (cjomnyma) syr meribén, zahačola dud.

³Tu ĥazdesa dúho (fáno) dro narodo, i désa léske bari rádyma. Radypnytko Jov javéla te radynélpe angíl túte, syr radynénape manušá, kóli skedéna maró, kóli rozlena doresybén.

⁴Pal-dová so ĥámo, pharipén léskiro, destó, savó les marelas, Tu phagiresa syr dro Madiamoskiro dyvés.”

⁵Pal-dová, so kažnoneskire-xaladeskire tyraha maribnastyr, uribén léskiro, savó isyn dro rat, shačkirena, otdena, sob (kaj) jag te shal len.

⁶Pal-dová so Bijáto bijándyja aménge, čhavó isyn dynó aménge; Jov léla zor dro Péskiro vast, i déna Léske lav: Lačhó Godypnari, zoraló Devél, Dad, konéste isyn viéčno džiibén, dalé-svetoskiro Thagári (Kniazjo).

⁷Zor Léskiri i ramánjo (miro) na pirijačéla pe Davidóskiro trono dro Léskiro kralipén, sob (kaj) Jov (Devél) te podrikirél les sendosa i čačipnása dalé dyveséstyr i pe saró viéko. Zevlynypen Ráskire-Devléskiro keréla davá.

⁸Raj Devél bičhavéla lav ke Jakovo, i pe Izrailjo Jov zdžála.

⁹Sob (kaj) te džinél saró narodo, Jefriémo i Samarijakire manušá, savé rakiréna baripnasa i isyn phut'kirdé ilésa:

¹⁰“Pyné bará — lása javír bará, isyn vyčhingirde sikomory — zaparuvasa len pe kiedry.”

¹¹Ĥazdela Raj Devél pe léste (Jefriemoste) Riecynoskire vergén, i Jov déla kurtála odolénge, savé xoliasona pe léste.

¹²Sirijani vastokóstyr, Filistimliáni zapadostyr; i jone javéna te xan Izrailjo pherdé mósa. I na prodžála iščo (inké) Léskiri xolý, i vast Léskiro isyn protyrdyno.

¹³Ne narodo na obrisjola ke Odová, Kon marela les, na rodéla Ras-Devlés, bolybnáskire-jangolengires.

¹⁴Otčingirela Devél Izrailjostyr šeró i pori, pal'ma i destó dro jekh dyvés.

¹⁵Phuró i barvaló — davá isyn šeró, a proróko — xohaibnari — davá isyn pori.

¹⁶Dalé-narodoskire šeralé xohavena odolén, i kon isyn khetané lénca, odolé xasjona.

¹⁷Paldavá na javéla te radynélpe Raj Devél pal léskire terné manušénde, na potanginela léskire bidadeskiren i biromeskiren pal dová, so saré jone isyn xohaibnarja i čora, uštá léngire phenéna nalačhé lavá. Paldavá na prodžála Léskiri xolý i vast Léskiro isyn protyrdyno.

¹⁸Pal-dová so grého roshačija, syr jag xála phusadé čarjá, xačola dre vešá, i thuv ĥazdélape stylbosa.

¹⁹Ráskire-Devléskiri, bolybnáskire-jangolengiri xolý xačkiréla phuv, narodo kerélape sýrby xabén vaš jag, na potanginela manúš péskire pšalés.

²⁰Javéna te čhinen pir čačí rig — a bokhalé jačénape, javéna te xan pir liévo (zérvo) rig — na čaljona; kažno javéla te xal kokoró pes.

²¹Manásija[2] xála Jefriemos, Jefriémo xála Manasijas, a khetané jone xána Judas. I na pirijačéla Léskiri xolý, i vast Léskiro isyn protyrdyno.