Read Biblija - Pe Baltitko Romani čib (Romanes) 2019 Baltic Romani Bible Lievito 12 Bible Online

Lievito 12 - Biblija - Pe Baltitko Romani čib (Romanes) 2019 Baltic Romani Bible bible

Lievito 12

¹I phendiá Raj Devél Mojzáske dasavé lavá:

²“Phen Izrailjoskire čhavénge: kóli džuvlý pharjola i bijanéla čhavores (bijatós), tedy joj iavéla nažužy eftá (bitrinéngiro deš) dyvesá; syr dre dyvesá lákire žužakiribnaskire mén'ki, joj iavéla nažužy;

³pe ohtóto (bidujéngiro déšto) dyvés občhinelape léste (čhavoreste) léskiri loč (plot') pe jagóro (pe krajo);

⁴i trijánda trin dyvesá bangi joj te bešél te žužakirelpe péskire ratendyr; nisó, so isyn svénto, láke naštý te čilavel, i ke svénto štéto naštý te javél, paka prodžána lákire-žužakiribnaskire dyvesá.

⁵Kóli joj bijanéla čhajorja, to tedy dre péskire-žužakiribnaskire dyvesá joj iavéla nažužy duj kurke, i šovdešá šov dyvesá joj isyn bangi te bešél te žužakirelpe péskire ratendyr.

⁶Syr prodžána lákire žužakiribnaskire dyvesá pal čhavéste ci pal čhate, láke trej te janel jekhe-beršytkones bakrores vaš célo shačkiribén i terné golumbicos ci gorlica dro svénto dyibén pal grého, ke zagiibén dre skedyibnáskiri šátra ke rašái;

⁷jov janéla davá angíl Raste-Devléste, i žužakirela la, i joj iavéla žužy péskire rateskire thadypnastyr. Ĥáda, isyn Zakóno pal čhavoreskiro ci čhajorjakiro bijanypén.

⁸Kóli joj naštý te janel bakrores, to tedy mek te lel dujén gorlicen ci dujén ternen ĥolumben, jekhés vaš célo shačkiribén, a javirés dro svénto dyibén (žértva) pal grého, i žužakirela la rašái, i joj iavéla žužy.”