Read Biblija - Pe Baltitko Romani čib (Romanes) 2019 Baltic Romani Bible Lievito 13 Bible Online

Lievito 13 - Biblija - Pe Baltitko Romani čib (Romanes) 2019 Baltic Romani Bible bible

Lievito 13

¹I phendiá Raj Devél Mojzáske i Aaronóske:

²“Kiéli konéste jačéla pe léskire-masengiri cýpa šulypen, ci lišajo ci pliama, i pe léskire-masengiri cýpa jačéla, xaj, prokazakiro fránso, tedy trej te janén les ke Aaróno, rašái, ci ke jekh léskire čhavéndyr, rašandyr;

³rašáj obdykhela fránso pe cýpa pe masá, i kóli balá pe fránso parudyne dre parné, i fránso isyn xor (gluboko) dre léskire-masengiri cýpa, tedy davá isyn prokáza; rašái, obdykhi les, déla te džinén pal léste, so jov isyn nažužo.

⁴A kóli pe léskire-masengiri cýpa pliama (piatno) isyn parny, ne joj nane xor dre cýpa, i balá pe léste na parudynepe dre parné, tedy rašáj phandela manušés, savéste isyn fránso pe eftá dyvesá;

⁵pe eftáto dyvés rašáj les obdykhela, i kóli fránso jačélape dasavo, syr sys, i na rozdžalape fránso pir cýpa, tedy rašáj bangó te phandel les pe javír eftá dyvesá;

⁶pe eftáto dyvés rašáj nevéstyr obdykhela les, i kóli fránso tyknedýr bicialó, i na rozgijápe fránso pir cýpa, tedy rašáj isyn bangó te phenél manušénge, so jov isyn žužó: davá isyn lišajo, i mek jov te vymorel péskire ídi, i javéla žužó.

⁷Kóli lišajo jačéla te rozdžalpe pir cýpa, korigedýr (pozžie) dová, syr jov psirdiá ke rašáj te žužakirelpe, tedy jov javír mólo bangó te javél ke rašái;

⁸o rašái, dykhí, so lišajo rozdžalape pir cýpa, jov déla te džinél manušénge, so jov isyn nažužo: davá isyn prokáza.

⁹Kóli javéla pe vari-konéste fránso ke prokáza, tedy trej les te janel ke rašái;

¹⁰o rašáj obdykhela les i, kóli šulypen pe cýpa isyn parnó, i bal parudyja dre parnó, i pe šulypen isyn džidó mas,

¹¹to davá isyn ĥaratuny prokáza pe léskire-masengiri cýpa; i rašáj priĥaljola les nažužesa i phandela les; pal-dová so jov isyn nažužo.

¹²Kóli fránso rozbuĥljola pe cýpa, i učhakiréla prokáza sarí cýpa nasvaleskiri, léskire šerestyr ke ĥerá, ci but moginen te dykhén rašaskire jakhá,

¹³i dykhéla rašái, so fránso učhakirdiá saré léskire masá, to tedy jov priĥaljola nasvales žužesa, pal-dová so saró kerdiápe dro parnó, jov isyn žužó.

¹⁴Kiéli jačéla pe léste džidó mas, tedy jov isyn nažužo;

¹⁵i o rašái, dykhí džidó mas, priĥaljola les nažužesa, pal-dová so džidó isyn mas nažužo: davá isyn prokáza.

¹⁶Kóli džidó mas parudjola i piririsjola dro parnó, mek jov te javél ke rašái;

¹⁷i o rašáj obdykhela les, i kóli fránso obrisija dro parnó, rašáj priĥaljola nasvales žužesa; jov isyn žužó.

¹⁸Kóli konéste pe masengiri cýpa, sys čyl'čako (naryvo) i jov zadživdia,

¹⁹i pe čyl'čakoskiro štéto jaciá parnó šulypen, ci pliama parny ci lolovato, tedy jov isyn bangó te javél ke rašái;

²⁰i rašáj obdykhela les i, kóli čyl'čako javéla tel cýpa, i bal léskiro parudyja dro parnó, tedy rašáj prigaljola les nažužesa: davá isyn prokazakiro fránso, jov roscvecyndia (rozluludija) pe čyl'čako;

²¹ne kóli rašáj dykhéla, so bal pe fránso isyn naparno, i jov nane tel cýpa, i nábut (kutý) isyn bicialy, tedy rašáj phandela les pe eftá dyvesá;

²²kóli jov jačéla drieván te rozdžalpe pir cýpa, tedy rašáj priĥaljola les nažužesa: davá isyn prokazakiro fránso;

²³kóli pliama jačélape pe péskiro štéto i na rozdžalape, tedy davá isyn čyl'čakoskiro šulypen, i rašáj priĥaljola les žužesa.

²⁴I, kóli konéste pe masengiri cýpa javéla obhačkiriben, i pe zadživdo obhačkiribnaskiro jačéla lolovato ci parny pliama,

²⁵i rašáj udykhéla, so bal pe pliama (piatno) piriparudyja dro parnó, i jov jačéla xor dre cýpa, tedy davá isyn prokáza, joj zacvecyndia pe obhačkiriben; i rašáj priĥaljola les nažužesa: davá isyn prokazakiro fránso;

²⁶kóli rašáj dykhéla, so bal pe pliama naparno, i jov nane tel cýpa, i nane drieván bicialó, tedy rašáj phandela les pe eftá dyvesá;

²⁷pe eftáto dyvés rašáj obdykhela les, i kóli joj drieván rozdžalape pir cýpa, tedy rašáj priĥaljola les nažužesa: davá isyn prokazakiro fránso;

²⁸kóli pliama jačélape pe péskiro štéto, i na rozdžalape pir cýpa, i nábut so nane bicialy, tedy davá šulypen obhačkiribnastyr; rašáj priĥaljola les žužesa, pal-dová so davá šulypen obhačkiribnastyr.

²⁹Kóli muršeste ci džuvliáte javéla fránso pe šeró ci pe čhora (broda),

³⁰i tén'či obdykhela rašáj fránso, i jov jačéla xor dre cýpa i bal pe láte žylto sano, tedy rašáj priĥaljola len nažuženca: davá isyn parhima, davá isyn prokáza pe šeró ci pe čhora (broda);

³¹kóli rašáj obdykhela fránso parhimakiro, i joj na jačéla xor dre cýpa, i bal pe láte isyn na kaló, tedy rašáj odolés, konéste isyn fránso parhimakiro, phandela pe eftá dyvesá;

³²pe eftáto dyvés rašáj obdykhela fránso, i kóli parhima na rozdžalape, i nane pe láte žylto bal, i parhima na jačéla xor dre cýpa,

³³tedy nasvaleste trej te občhinen balá, ne štéto, kaj parhima te na občhinen, i rašáj isyn bangó parhatones javír mólo te zaphandel pe eftá dyvesá;

³⁴pe eftáto dyvés rašáj obdykhela parhima, i kóli parhima na rozgijápe pir cýpa i na jačéla xor dre cýpa, tedy rašáj priĥaljola les žužesa; mek jov te vymorel péskire ídi, i javéla žužó.

³⁵Ne kóli paló léskiro žužakiriben javéla but te rozdžalpe parhima pir cýpa,

³⁶i rašáj udykhéla, so parhima rozdžalape pir cýpa, tedy rašáj mek te na rodél žylto bal: jov isyn nažužo.

³⁷Kóli parhima jačélape, syr sys, i sykavelape pe láte kaló bal, tedy pošara progijá, jov isyn žužó; rašáj priĥaljola les žužesa.

³⁸Kóli muršeste ci džuvliáte pe léngire-masengiri cýpa javéna jarka pliamy, jarka parné pliamy,

³⁹i rašáj dykhéla, so pe léngire-masengiri cýpa bliedna-parné pliamy, tedy davá isyn lišajo, so roscvecyndia pe cýpa: jov isyn žužó.

⁴⁰Kóli konéste pe šeró vyresne balá, tedy davá isyn pliešo: jov isyn žužó;

⁴¹a kóli angíl pe čykat vyresne balá, tedy jov isyn lyso: jov isyn žužó.

⁴²Kóli pe pliešo ci pe lysina javéla parny ci lolovato pliama, tedy pe léskiro pliešo ci pe léskiri lysina roscvecyndia prokazakiro fránso.

⁴³I o rašáj obdykhela les i, kóli dykhéla, so pe šulypen pe fránso parnó ci lolovato pe léskiro pliešo ci pe léskiri lysina, bicialy so poddžála pe masengire-cypakiro prokáza,

⁴⁴tedy adavá manúš isyn prokazytko, nažužo jov isyn; rašáj isyn bangó te priĥaljol les nažužesa, léste pe šeró fránso.

⁴⁵Prokazytkoneste, pe savéste isyn davá fránso, trej, sob (kaj) pe léste te javél rozkušny ídia, i léskiro šeró isyn bangó te javél na učhakirdo, i ke uštá jov bangó te javél učhakirdo i te del gódla: ‘Nažužo! nažužo!’

⁴⁶Dre saré dyvesá, paka pe léste isyn fránso, jov isyn bangó te javél nažužo, nažužo isyn jov; jov isyn bangó te dživél jekhdžinó, pal stáno te javél léskiro džiibén.

⁴⁷Kóli javéla prokazakiro fránso pe ídi, ci pe ídia vylnátyr (šersiatyr), ci pe ídia ljonostyr (ĥandladestyr),

⁴⁸ci pe osnova thavengiri, savé džána upralestyr, ci pe utoko thava, so džána pir buĥlypén ljonostyr (gandladestyr) ci vylnátyr, ci pe cýpa, ci pe vari-savó savó cypitko keriben,

⁴⁹i fransakiri pliama (piatno) javéla zelenovato ci lolovato pe ídia, ci pe cýpa, ci pe osnova, ci pe utoko, ci pe vari-savó cypitko uribén, — tedy davá isyn fránso ke prokáza: trej te sykavén la rašáske;

⁵⁰o rašáj obdykhela fránso, i zaphandela nasvaly ídia prokazasa pe eftá (bitrinéngiro deš) dyvesá

⁵¹pe eftáto dyvés rašáj prodykhela fránso, i, kóli fránso rozgijápe pir ídia, ci pe osnova, ci pe utoko, ci pir cýpa, ci pir vari-so, so kerdó cypatyr, tedy davá isyn prokáza zahaly, nažužo isyn fránso;

⁵²jov isyn bangó te shačkirel ídia, ci osnova, ci vylnakiro utoko ci ĥandladeskiro (ljonoskiro), ci saví da te na javél, saví kerdy cypatyr, pe saví javéla fránso, pal-dová so davá isyn zahaly prokáza: trej te shačkiren la pe jag.

⁵³Kóli rašáj dykhéla, so fránso na rozgijápe pe ídia, ci pe osnova, ci pe utoko, ci pe saví b te na javél riza, so kerdy cypatyr,

⁵⁴tedy rašáj uphenela te obmoren dová, pe saví isyn fránso, i javír mólo zaphandela pe eftá dyvesá;

⁵⁵kóli korigedýr (pozžedýr) nasvale-idiakiro vymoribnastyr rašáj udykhéla, so fránso na parudia péskiro bicialyben i fránso na rozgijápe, tedy joj isyn nažužy, shačkirla ídia pe jag; davá isyn vyhano štéto pe muitko rig ci pe palatuny;

⁵⁶kóli rašáj dykhéla, so fránso pir lákiro moriben jaciá tyknedýr bicialó, tedy rašáj mek te otkušel štéto fransosa idiatyr, ci cypatyr, ci osnovatyr, ci utokostyr.

⁵⁷Kóli jov nevéstyr sykadjola pe ídia, ci pe osnova, ci pe utoko, ci pe vari-so kerdó cypatyr, tedy davá isyn prokáza, saví rozdžalape: xačkir pe jag davá, pe so prokáza isyn.

⁵⁸Kóli ídia, ci osnova, ci utoko, ci vari-so so kerdó cypatyr vymoresa, i džála krig léndyr fránso, tedy trej te vymoren len javír mólo, i jone javéna žužé.

⁵⁹Ĥáda, isyn zakóno pal fránso ke prokáza pe vylnakiri ci ĥandladeskiri (ljonytko) ídia, ci pe osnova ci pe utoko ci pe vari-so, so kerdó cypatyr, syr te priĥaljos la žužesa ci nažužesa.