Read Biblija - Pe Baltitko Romani čib (Romanes) 2019 Baltic Romani Bible Lievito 14 Bible Online

Lievito 14 - Biblija - Pe Baltitko Romani čib (Romanes) 2019 Baltic Romani Bible bible

Lievito 14

¹I phendiá Raj Devél Mojzáske, rakirí:

²“Ĥáda, isyn zakóno pal manušéste, savéste isyn prokáza, kiéli trej les te vyžužakires: janén les ke rašái;

³i rašáj vydžála javrí stanostyr, i kóli rašáj dykhéla, so manúš, savéste sys prokáza, vysastija péskire dukhatyr,

⁴to tedy rašáj priphenela te les vaš dalé manušéske dujén džiden i žužen čiriklien, kiedrytko veš, červljono thav i isopo,

⁵i rašáj priphenela jekha čirikliá te zaphusaven uprál glinytko khorestyr (sasudostyr), uprál džidó paní;

⁶a kokoró jov léla džidia čirikliá, kiedrytko veš, červljono thav i isopo, i kindiakirela len i džidia čirikliá dro rat čirikliakiro, saví sys zaphusady uprál džidó paní,

⁷i bryzginela lésa pe manušéste, savó žužakirelape prokazatyr eftá móly, i priĥaljola les žužesa, i mekéla džidia čirikliá pe félda.

⁸O manúš, savó žužakirelape, vymorla péskire ídi, občhinela péskire saré balá, vymorelape paniésa, i javéla žužó; korigedýr (pozže) zadžála dre stáno, i jačéla eftá dyvesá pal péskiri šátra;

⁹pe eftáto dyvés vymuravela saré péskire balá, péskiro šeró, péskire čhora (broda), péskire jakhengire phovja (brovi), saré péskire balá vymuravela, i vymorela péskire ídi, i vymorela paniésa péskire masá, i javéla žužó.

¹⁰I pe eftáto dyvés jov léla bidošengire dujén bakrén, i jekha bakriá jekhe-beršytkona bidošengirja, i trin dešengire pašá jefatyr, pšeničnone jaržeskiro, zmiešyndlo jeliejosa (dzetesa), dro janybén marunó, i jeliejoskiro jekh logo (0.3 litro);

¹¹I rašái, savó žužakirela, čhuvéla manušés, savó žužakirelape lénca angíl Raste-Devlés-te pašýl zagiibén dre šátra skedyibnáskiri;

¹²i léla o rašáj iekhe bakrés, i otdéla les dro svénto dyibén pal bang, i jeliejo logo, i janéla davá, trinskiri angíl Raste-Devléste;

¹³i začhinela bakrés pe dová štéto, kaj čhinena vaš svénto dyibén pal grého, i célo shačkiribén, pe svénto štéto, pal-dová so davá čhinena vaš svénto dyibén pal bang, savó poddžála pe svénto dyibén (žértva) pal grého, i jov trej, sob (kaj) te javél rašáske: davá isyn bari sventyma;

¹⁴i léla rašáj nábut (kutý) rat pal bang sventoné dyibnástyr, i čhuvéla rašáj rat pe čačé-jagoroskiro kan manušéske, savó žužakirelape i pe léskiro čačé-vasteskiro baró angúšt i pe baró angúšt (pal'co), savó pe léskiri čačí ĥerój;

¹⁵i léla rašáj logo jeliejo, i čhuvéla pe péskiri zérvo (liévo) burnyk (ladoška);

¹⁶i kind'kirela rašáj čačó (pravo) péskiro angúšt dro jeliejo, savó isyn pe léskiri zérvo (liévo) burnyk (ladoška), i čhuvéla jeliejosa péskire anguštestyr eftá móly angíl Raste-Devléste;

¹⁷i jeliejo (dzet), savó jaciápe pe léskiri burnyk, rašáj čhuvéla pe manušéste, savó žužakirelape, pe čačé-kaneskiro jagóro (pe krajo), pe baró angúšt léskire čačé-vasteskiro angúšt i pe baró angúšt pe léskiri čačí ĥerój pe štéto, kaj čhudiá rat pal sventoné dyibnástyr pal bang;

¹⁸a jeliejo (dzet), savó jaciápe, savó isyn pe vast rašaste, čhuvéla jov pe šeró manušéske, savó žužakirelape, i žužakirela les rašáj angíl Ráskire-Devléskiro muj.

¹⁹I janéla rašáj svénto dyibén pal grého, i žužakirela jov manušés, savó žužakirelape léskire nažužypnastyr; korigedýr (pozžedýr) davá, začhinela jov vaš célo shačkiribén;

²⁰i janéla rašáj célo shačkiribén i marunó janybén pe altárjo; i žužakirela les rašái, i jov javéla žužó.

²¹Kóli jov isyn čororó i léste nane barvalypén, tedy mek te lel jekhe bakrés dro svénto dyibén pal bang te trinskirel, sob (kaj) te žužakirel pes, i jekh déšto paš efa jaržó parné givestyr (pšenicatyr), zmiešyndlo jeliejosa (dzetesa), dro marunó janybén, i logo jeliejo;

²²i dujén gorlicen ci dujén ternen golumben, so doreséla léskiro vast, jekha čirikliá dro svénto dyibén pal grého, a javirja dro célo shačkiribén;

²³i janéla len pe ohtóto (bidujéngiro déšto) dyvés péskire žužakiribnastyr ke rašáj ke zagiibén dre šátra (skínija), angíl Raste-Devléste.

²⁴I o rašáj léla bakrés dro svénto dyibén pal bang i logo jeliejo, i janéla davá ke rašái, trinskiri angíl Raste-Devléste.

²⁵I čhinela bakrés dro svénto dyibén pal bang, i léla rašáj rat sventoné dyibnástyr pal bang, i čhuvéla pe jagóro (pe krajo) pe čačó kan Manušéskiro, savó žužakirelape, i pe baró angúšt (pal'co) léskire čačé (pravone) vasteskiro i pe baró angúšt léskiro čačé-ĥerjakiro;

²⁶i čhuvéla rašáj ieliejo (dzet) pe péskiro zérvo (liévo) vast,

²⁷i jeliejosa, savó isyn pe léskiro liévo vast, rašáj počhuvela čačé péskire anguštestyr eftá móly angíl Raste-Devléste;

²⁸i čhuvéla rašáj ieliejo, savó isyn pe léskiro vast, pe manušéste, savó žužakirelape, pe jagóro (krajo) pe čačó kan, pe baró angúšt léskire čačé-vasteskiro i pe baró angúšt léskire čačé-ĥerjakiro, pe štéto, kaj sys rat pal bang sventoné dyibnástyr;

²⁹a savó jaciápe jeliejo, savó sys pe rašaskiro vast, čhuvéla jov pe šeró manušéske, savó žužakirelape, sob (kaj) te vyžužakirel les angíl Raste-Devléste;

³⁰i janéla jekha gorlicendyr ci jekhés terné golumbendyr, so doreséla vast manušéskiro, savó žužakirelape,

³¹doléstyr, so doreséla léskiro vast, jekh čirikly dro svénto dyibén pal grého, a javír dro célo shačkiribén, khetané marune janybnasa; i žužakirela rašáj manušés, savó žužakirelape angíl muj Ráskire-Devléskiro.

³²Ĥáda, isyn zakóno pal manušéste, pe savéste sys prokáza, savéste na sys barvalypén dro péskiro časo te žužakirelpe.

³³I phendiá Raj Devél Mojzáske i Aaronóske dasavé lavá:

³⁴“Kiéli tumé zadžána pe Xanaanóskiri phuv, saví Me dáva tuménge te len syr phuv péskiri, i Me janáva fránso ke prokáza pe kherá pe tumarí phuv, saví tumé lyné péske,

³⁵to tedy odová manúš, konéskiro kher isyn, isyn bangó te džal i te phenél rašáske: ‘Mánde dro kher sykadyjá, xaj, fránso.’

³⁶Tén'ci o rašáj priphenela te vylydžan saró kheréstyr angledýr, syr zadžála rašáj te dykhél fránso, sob (kaj) te na jačél saró nažužesa, so isyn dro kher; korigedýr (pozžedýr) davá javéla rašáj te obdykhel kher.

³⁷Kóli jov, obdykhi fránso, udykhéla, so pe kheréskire vánty isyn ĥaratuné zelena ci lolovata polosy jamkendyr, savé javéna xor dre vánta,

³⁸to tedy rašáj vydžála kherestyro ke vudár kheréskiro i phandela kher pe eftá dyvesá,

³⁹I pe eftáto dyvés nevéstyr (nevés) javéla rašái: i kóli dykhéla, so fránso rozgijápe pir kheréskire vánty,

⁴⁰to mek rašáj te priphenel te vyphagiren bará, pe savé te javén fránsy, i te čhurdén len pal fóro pe nažužo štéto;

⁴¹i mek te vyĥablinen andrál saró kher, i mek te vyĥablinen sarí štukaturka, i te vyčhuven la pe nažužo štéto pal fóro.

⁴²I jone léna javír bará, i čhuvéna len pe dolé-barengiro štéto, i léna javír štukaturka, i obmakhena kher;

⁴³kóli fránso nevéstyr javéla i rozdžalape pe kher korigedýr (pozžedýr) davá, syr vyphagirde bará i vyĥablindle kher i obmakhne les,

⁴⁴tedy rašáj iavéla i obdykhela, i, kóli fránso rozgijápe pe kher, tedy davá isyn zahaly prokáza pe kher, fránso isyn nažužo;

⁴⁵to trej te rosphagiren davá Kher, i léskire bará, i léskiro veš i sarí kheréskiri štukaturka te vylydžan pal fóro pe nažužo štéto;

⁴⁶i kon zadžála dro kher dro saró časo, kiéli jov isyn zaphandlo, odová manúš javéla nažužo ke bel'vél';

⁴⁷i kon te javél sutó dro dová kher, odová manúš isyn bangó te vymorel péskire ídi; i kon xála dro dová kher, odová isyn bangó adiáke-pac' te vymorel péskiri ídia.

⁴⁸Kóli rašáj iavéla i dykhéla, so fránso pe kher na rozgijápe korigedýr (pozže) davá, syr obmakhne kher, tedy rašáj priĥaljola kher žužesa, pal-dová so fránso progijá.

⁴⁹I, sob (kaj) te vyžužakirel kher, léla jov dujén čiriklien, kiedroskiro veš, červljono thav i isopo,

⁵⁰i začhinela jekha čirikliá pe khoró ĥlejatyr (glinytko sasudo), uprál džidó paní;

⁵¹i léla jov kiedrovo veš i isopo, i červljono thav i džidia čirikliá, i kind'kirela len dro čirikliakiro rat, savjá začhindlé i dro džidó paní, i občhuvela kher eftá móly;

⁵²i vyžužakiréla kher čirikliakire ratésa i džidé paniésa, i džidé čirikliasa i kiedrovoneskire vešesa, i isoposa i červljonone thavesa;

⁵³i mekéla džidia čirikliá pal fóro pe félda, i vyžužakiréla kher, i javéla žužó.”

⁵⁴Ĥáda, isyn zakóno pal kažno fránso ke prokáza i pal parhima,

⁵⁵i pal prokazy pe ídia i pe kher,

⁵⁶i pal šulypen, i pal pliešo, i pal pliamy,

⁵⁷sob (kaj) te sykliakirél, kiéli davá isyn nažužo, i kiéli isyn žužó. Ake, isyn zakóno pal prokáza.