Read Biblija - Pe Baltitko Romani čib (Romanes) 2019 Baltic Romani Bible Lievito 15 Bible Online

Lievito 15 - Biblija - Pe Baltitko Romani čib (Romanes) 2019 Baltic Romani Bible bible

Lievito 15

¹I phendiá Raj Devél Mojzáske i Aaronóske, rakirí:

²“Rakirén Izrailjoskire čhavénge i phenén lénge: ‘Kóli konéste javéla te thadel léskire maséndyr, tedy léskire thadypnastyr jov isyn nažužo.

³I ĥáda, isyn zakóno pal léskiro nažužypen léskire thadypnastyr: kiéli thadéla léskire maséndyr léskiro thadypen, i kiéli zarikirelape dre léskire masá léskiro thadypen, davá isyn léskiro nažužypen.

⁴Kažno pasindly (čhuibén), pe savó pasjola adavá manúš, savéste te javél thadypen, nažužo, i kažno priedmieto, pe savó jov bešéla, isyn nažužo;

⁵i kon čilavéla léskiro čhuibén, odoléske trej te vymorel péskire ídi (rizy) i te obmorelpe paniésa, i nažužo javéla jov ke bel'vél';

⁶kon jov bešéla pe vari-so, pe savó sys beštó manúš, savéste te javél thadypen, odová isyn bangó te vymorel péskire ídi i te obmorelpe paniésa, i jov nažužo javéla ke/žýko bel'vél';

⁷i kon čilavéla manušéskire masá, savéste isyn thadypen, odová isyn bangó te vymorel péskire ídi i obmorelpe paniésa, i nažužo javéla jov ke bel'vél';

⁸kóli manúš, savéste isyn thadypen, čungardela pe žužé manušéste, tedy adavá manúš isyn bangó te vymorel péskire ídi i te obmorelpe paniésa, i nažužo javéla jov ke bel'vél';

⁹i kažno ĥliabo (povozka), dre savó tradyjá manúš, savéste isyn thadypen, nažužo javéla ke/žýko bel'vél';

¹⁰i kažno, kon čilavéla vari-so, so sys tel léste nažužeste, nažužo javéla ke bel'vél'; i kon lydžála davá, isyn bangó te vymorel péskire ídi i te obmorelpe paniésa, i nažužo javéla ke bel'vél';

¹¹i kažno, kon čilavéla manušés, savéste isyn thadypen, namori péskire vastá paniésa, isyn bangó te vymorel péskire ídi i te vymorelpe paniésa, i nažužo javéla ke bel'vél';

¹²khoró ĥlejatyr (gliniano sasudo), ke savó čilavelape manúš, savéste isyn thadypen, trej te rozmares, a kažno khoró vešéstyr trej te vymores paniésa.

¹³A kiéli manúš, savéste sys thadypen, javéla vól'no péskire thadypnastyr, tedy jov isyn bangó te otginel péske eftá dyvesá vaš péskiro žužypen, i te vymorel péskire ídi (rizy), i te obmorel péskire masá džidé paniésa, i javéla jov žužó;

¹⁴i pe ohtóto (bidujéngiro déšto) dyvés jov léla péske dujén gorlicen ci dujén terné golumben, i javéla angíl Raste-Devléste ke zagiibén dre skedyibnáskiri šátra i otdéla len rašáske;

¹⁵i janéla rašáj dalé čirikliendyr jekha dalé čirikliendyr dro svénto dyibén pal grého, a javirja dro célo shačkiribén, i žužakirela les rašáj angíl Raste-Devléste léskire thadypnastyr.

¹⁶Kóli vari-savó murš vyčhuvela péskiri sal (siemjo), tedy jov isyn bangó te obmorel paniésa saré péskire masá, i nažužo javéla jov ke bel'vél';

¹⁷i kažno ídia i kažno cýpa, pe saví peréla siemjo, bangó isyn te javél vymordy paniésa, nažuži javéla ke bel'vél';

¹⁸kóli murš pasjola džuvliása i javéla léste sal (siemjo) te vyčhuvelpe, tedy jone isyn bangé te obmorenpe paniésa, i nažužé dujdžiné jone javéna ke bel'vél'.

¹⁹Kóli džuvliáte čhuvélape rat, savó thadéla lákire maséndyr, tedy joj isyn bangi te bešél eftá dyvesá dre péskiro časo te žužakirelpe, i kažno, kon čilavéla la, nažužo javéla ke bel'vél';

²⁰i saró, pe so joj pasjola dro časo (cýro) láke te žužakirelpe, javéla nažužo; i saró, pe so joj bešéla, nažužo;

²¹i kažno, kon čilavéla lákiri pasindly (čhuibén), isyn bangó te vymorel péskire ídi i te obmorelpe paniésa, i nažužo javéla ke bel'vél';

²²i kóli vari-kon čilavéla vari-so pe čhuibén, ci pe dová priedmieto, pe savó joj sys bešty, nažužo javéla ke bel'vél';

²³i kóli vari-kon čilavéla vari-savó priedmieto, savó sys pe léskiro čhuibén, pe savó joj sys bešty, nažužo javéla ke bel'vél'

²⁴kóli pirisovela lása rom, tedy lákiro nažužypen javéla pe léste, jov nažužo javéla eftá dyvesá, i kažno čhuibén, pe savó jov pasjola, javéla nažužo;

²⁵kóli džuvliáte but dyvesá thadéla rat na dro lákiro džuvlikano časo, ci kóli láte tyrdelape thadypen ĥaredyr (dlugedyr) lákire-džuvlikane užakiribnastyr, syr prilyno užakiribnasa, to tedy dre saré dyvesá lákire thadypnaskire, i adiáke-pac', kiéli joj žužakirelape, joj iavéla nažužy;

²⁶kažno čhuibén, pe savó joj pasjola dre saré dyvesá dro lákiro džuvlikano časo, joj — javéla nažužy, adiáke-pac' syr čhuibén dre lákiro žužakiribnaskiro časo; i kažno liubo priedmieto, pe savó joj bešéla, javéla nažužo, syr nažužo davá priedmieto dre lákiro časo, kiéli joj žužakirelape.

²⁷I kažno, kon čilavéla len, javéla nažužo, i léske trej te vymorel péskire ídi i te obmorelpe paniésa, i jov nažužo javéla ke bel'vél'.

²⁸A kiéli joj iavéla vól'no péskire thadypnastyr, tedy isyn bangó te otginel péske eftá dyvesá, i korigedýr (pozžedýr) joj iavéla žužy;

²⁹i pe eftáto dyvés léla joj péske dujén gorlicen ci dujén ternen golumben, i janéla len ke rašáj dre šátra;

³⁰i janéla rašáj iekhe čirikliendyr dro svénto dyibén pal grého, a javirja dro célo shačkiribén, i vyžužakiréla la rašáj angíl Raste-Devléste lákire nažužakirde thadypnastyr.

³¹Adiáke rakhén Izrailjoskire čhavén léngire nažužakiribnastyr, sob (kaj) jone te na merén dro péskiro nažužypen, magiri Miro kher (šátra), savó isyn maškirál lénde.

³²Ĥáda, isyn zakóno pal manušénde, savénde thadéla maséndyr i pal dová, syr vyčhuvelape siemjo, savó keréna les nažužesa,

³³i pal odolénde, kon piridživela pal péskiro žužypen, i pal manušénde, savénde maséndyr thadéla, muršeske ci džuvliáke i pal romeste, savó pirisovela nažužé džuvliása.