Read Biblija - Pe Baltitko Romani čib (Romanes) 2019 Baltic Romani Bible Lievito 16 Bible Online

Lievito 16 - Biblija - Pe Baltitko Romani čib (Romanes) 2019 Baltic Romani Bible bible

Lievito 16

¹I rakirdiá Raj Devél Mojzáske pal duje Aaronóskire čhavéngiro meribén, kiéli jone terdiné čužoné (napeskire) jagása angíl Raste-Devléste, i myné,

²i phendiá Raj Devél Mojzáske: “Phen Aaronóske, tyré pšaléske, sob (kaj) jov na dro kažno časo te zadžál pe svénto štéto pal pologo angíl denko (kryška), so isyn pe kovčego (mohtó), sob (kaj) léske te na merél, pal dová so pe denko Me javáva te javav dro óbloko.

³Ĥáda, sósa trej te zadžál Aaronóske pe svénto štéto: guruvoresa dro svénto dyibén pal grého i bakresa dro célo shačkiribén.

⁴Léske trej te ur'jel svencyndlo ĥandladestyr (ljonostyr) xitono, telatuny ídia ĥandladestyr mek te javél pe léskire masá, i ĥandladytkone kustykasa mek jov te podphandelpe, i gandladytko kidaro mek jov te ur'jel: davá isyn svencyndle ídi; i mek jov te obmorel péskire masá paniésa, i te ur'jel len.

⁵I Izrailjoskire čhavéngire skedyibnástyr mek jov te lel dujén buznen (kozlen) dro svénto dyibén pal grého i jekhe bakrés vaš célo shačkiribén.

⁶I te janel Aaróno guruvóres (tieliantos) dro svénto dyibén pal péskiro grého pal péste, i vyžužakiréla pes i kher péskiro.

⁷I léla dujén buznen, i čhuvéla len angíl Raste-Devléste pašýl zagiibén dre šátra skedyibnáskiri;

⁸i čhurdéla Aaróno pal duje buznende žriébijo: jekh žriébijo vaš Ráske-Devléske, a javír žriébijo vaš otmekiben;

⁹i janéla Aaróno buznés, pe savéste vygijá žriébijo vaš Ráske-Devléske, i janéla les dro svénto dyibén pal grého,

¹⁰a buznés, pe savéste vygijá žriébijo vaš otmekiben, čhuvéla džides angíl Raste-Devléste, sob (kaj) te kerél pe léste žužakiriben, i te otbičhavel les pe čhučí phuv vaš otmekiben.

¹¹I janéla Aaróno guruvóres dro svénto dyibén pal grého pal péste, i vyžužakiréla pes i péskiro kher, i začhinela guruvóres dro svénto dyibén pal péskiro grého;

¹²i léla xačkirdé vangara dre pherdý kadila altarjostyr, savó isyn angíl Raste-Devléste, i léla gudlé smóly te xačkirel pherdé burnyka (prigoršni), i vylydžala len pal pologo;

¹³i čhuvéla la xačkirdé vangarenca pe jag angíl Raste-Devléste, i óbloko fimiamostyr (gudlé smolendyr) učhakiréla denko (kryška), savó te javél pe kovčego dosykaibnása (otkrovienijasa), sob (kaj) léske te na merél;

¹⁴i léla jov guruvoreskiro rat, i počhuvela péskiro angúšt (pal'co) pe denko angíl i pašýl denko, eftá móly.

¹⁵Tén'ci jov začhinela buznés (kozlos) dro svénto dyibén pal manušéngiro grého, i lydžála andré léskiro rat pal pologo, i keréla dová-pac' léskire ratésa, so kerdiá guruvoreskire ratésa, i čhuvéla lésa pe denko i angíl denko,

¹⁶i vyžužakiréla jov svénto štéto Izrailjoskire-čhavéngire nažužypnastyr i saré léngire nalačhé rendéndyr (dielendyr), dre saré léngire gréhi. Adiáke bangó isyn jov te kerél i vaš skedyibnáskiri šátra, saví isyn lénde, maškír léngiro nažužypen.

¹⁷Nijékh manúš naštý te javél dre šátra skedyibnáskiri, kiéli zadžála jov, Aaróno, te žužakirel svénto štéto, paka jov vydžála kokoró. I adiáke vyžužakiréla jov pes, kher péskiro i saró Izrailjoskiro skedyibén.

¹⁸I vydžála jov ke altárjo, savó isyn angíl Raste-Devléste, i vyžužakiréla les, i léla rat guruvoreskiro i rat buzneskiro, i čhuvéla pe šyngá (rógi) altarjoske saré rigéndyr,

¹⁹i čhuvéla jov pe léste ratésa péskire anguštestyr (pal'costyr) eftá móly, i vyžužakiréla les, i svenciakirela les Izrailjoskire-čhavéngire nažužypnastyr.

²⁰I kiéli jov vyžužakiréla svénto štéto, skedyibnáskiri šátra i altárjo, to janéla jov džidé buznés (kozlos),

²¹i čhuvéla Aaróno péskire duj vastá pe džidé-buzneskiro šeró, i priĥaljola saró čoripén pe léste Izrailjoskire čhavéngiro, so jone kerdé proti Zakóno i saré léngire gréhi, i čhuvéla len pe buzneskiro šeró i bičhavéla krig buznés vykedyné manušésa pe čhučí phuv:

²²i lydžála buzno pe péste saré léngire réndy, savé jone kerdé na pir Zakóno pe phuv, dre saví naštý te prodžan, i mekéla jov buznés pe čhučí phuv.

²³I zadžála Aaróno dre šátra skedyibnáskiri, i zlela ĥandladytka (ljonytka) uribená, savé jov urjavelas, syr džálas jov pe svénto štéto, i jačkiréla len odój,

²⁴i obmorela péskire masá paniésa pe svénto štéto, i ur'jela péskire ídi (rizy), i vydžála i janéla célo shačkiribén pal péste i célo shačkiribén pal manušénde, i vyžužakiréla pes i manušén;

²⁵a čekén (túko) sventoné dyibnástyr pal grého pekela pe altárjo.

²⁶I odová, kon lydžijá krig buznés vaš otmekiben, isyn bangó te vymorel péskire uribená i te obmorel péskire masá paniésa, i korigedýr (pozžedýr) jov saštý te zadžál dre stáno.

²⁷A guruvóres pal grého i buznés pal grého, savengiro rat sys zalydžino te žužakirel svénto štéto, mek te vylydžan javrí stanostyr i te shačkiren léngire cypi i léngiro mas i léngiro nažužypen;

²⁸kon shačkiréla len, odová isyn bangó te vymorel péskire uribená, i te obmorel péskire masá paniésa, i korigedýr (pozžedýr) adavá manúš moginéla te zadžál dro stáno.

²⁹I davá mek te javél vaš tuménge syr viéčno uphenybén: dro eftáto (bidujéngiro déšto) čhon, dro deštone-čhonéskiro dyvés te javén kovlé tumaré dijá, i ni savó réndo te na kerén, ni manúš javire phuvjátyr, ni manúš, savó javire rigátyr, savó dživéla maškír tuménde,

³⁰pal-dová so dro davá dyvés o rašáj žužakirela tumen, sob (kaj) te kerél jov tumen žuženca saré tumaré grehéndyr, sob (kaj) tumé te javén žužé (čysta) angíl Raste-Devléste;

³¹davá isyn sávato (subóta) te otkhinjon vaš tuménge, javén štyl (tiha) dre tumaré dijá: davá isyn viéčno uphenybén.

³²Te žužakirel isyn bangó o rašái, savó isyn pomakhno, i savó isyn vysvencyndlo, sob (kaj) léske te kerél butý rašása pe štéto péskire dadéskiro: i ur'jela jov ĥandladestyr (ljonostyr) uribená, svénta ídi,

³³i vyžužakiréla Svénto-Sventonengiro i šátra skedyibnáskiri, i altárjo vyžužakiréla, i rašán i sarén skedyibnaskire manušén vyžužakiréla.

³⁴I davá javéla vaš tuménge syr viéčno uphenybén: te žužakiren Izrailjoskire čhavén saré léngire grehéndyr jekh mólo dro berš.” I kerdiá jov adiáke, syr Raj Devél priphendiá Mojzáske.