Read Biblija - Pe Baltitko Romani čib (Romanes) 2019 Baltic Romani Bible Lievito 19 Bible Online

Lievito 19 - Biblija - Pe Baltitko Romani čib (Romanes) 2019 Baltic Romani Bible bible

Lievito 19

¹I phendiá Raj Devél Mojzáske dasavé lavá:

²“Rákir saré skedyibnaske Izrailjoskire čhavéngire i phen lénge: ‘Javén svénta, pal-dová so Me som svénto Raj Devél, Devél tumaró.

³Dar kažno (sváko) manúš péskire datyr i péskire dadéstyr, i rakhén Miré sávaty (suboty). Me som Raj Devél, tumaró Devél.

⁴Na mangénpe idolénge, i na kerén péske vyčhudé devloré. Me som Raj Devél, tumaró Devél.

⁵Kiéli javéna te janén Ráske-Devléske mírno svénto dyibén, tedy janén les, sob (kaj) te doresen péske Devléskiri láska:

⁶dro dyvés, kiéli tumé janéna svénto dyibén (žértva) dro dyvés i pe javír dyvés tuménge trej te xan les, a so jačélape ke tríto dyvés isyn bangé te shačkiren pe jag;

⁷kóli vari-kon léla les te xal pe tríto dyvés, davá isyn džungaló (brytko): davá na javéla Ráske-Devléske pir Zakóno;

⁸kon léla la te xal, odová lydžála pe péste grého, pal-dová so jov magirdia Ráskire-Devléskiri sventyma, i xasjola dová di péskire manušéndyr.

⁹Kiéli javéna te ukeden, so vybarija pe jagóro (pe krajo) pe tyrí félda, i so jačélape tyré ukedyibnastyr, na podkede,

¹⁰i tyró vinagrado (drakh) na obkede ke žužypen, i múri, savé pyné dro vinagrádniko, na ĥázde, jačkir davá čororeske i manušéske, savó javdiá javire rigátyr. Me som Raj Devél, Devél tumaró.

¹¹Na čoren, na rakirén načačipén, na xohaven jekh jekhés.

¹²Na den xohany sovél, pričhuvi ke davá lav Miro na magirén péskire Devléskiro. Me som Raj Devél.

¹³Na pritasav tyré pašatunes, i na le butýr syr trej. Pleskiriben butiarneske naštý te jačkires ke ránko (ke zlóko).

¹⁴Na obrakir kašukes, i na čhuv ničí angíl kororeste, sob (kaj) te na perél jov, dar Rástyr-Devléstyr tyrestyr. Me som Raj Devél.

¹⁵Na sendiakires xohanés pe séndo; na jav proti čororeste i na ker gudles (na ladin) barvalé manušénge. Pir čačipén sendiakir tyré pašatunes.

¹⁶Na psir piridyibnarisa maškír tyré manušénde, i na ĥazdepe pe tyré-pašatuneskiro džiibén. Me som Raj Devél.

¹⁷Na rikir xolý dre tyró iló pe tyré pšaléste; sykáv bang tyré pašatuneske, i na javéla pal léste grého.

¹⁸Na otdé pale čoripnasa (na otha pale), i na rikir xolý pe tyré-manušéngire čhavénde, a sykáv patýv ke tyró pašatuno, syr péske. Me som Raj Devél.

¹⁹Rakhén Miré uphenybená; tyré kheritkoné murdales (skoto) na zlyža javire porodasa; félda tyrí na začhuv duje raznone ziarkenca; na uripe dre rizy (dro uribén) kažnoné thavendyr, vylnátyr i ĥandladestyr (ljonostyr).

²⁰Kóli vari-kon pirisovela džuvliása, a joj isyn pisharica, angrustiakirdy (obrenčyndly) romesa, ne iščo (inké) navykindly, ci vol'nyma iščo (inké) nane dyný láke: tedy trej te čhuvés kára iščo (inké) pe lénde, ne na meribnasa, pal-dová so joj isyn na vól'no.

²¹Mek jov te janel Ráske-Devléske ke zagiibén dre šátra skedyibnáskiri bakrés pal isyn bang, dro svénto dyibén pal péskiri isyn bang;

²²i vyžužakiréla les o rašáj bakresa pal bang angíl Raste-Devléste grehostyr, i otmekno javéla léske grého, savó jov kerdiá.

²³Kiéli tumé javéna pe phuv, saví Raj Devél déla tuménge, i počhuvena tumé vari-savó plodengiro veš, tedy léskire barjakirdé (plódy) ginen pal naobčhindle, naštý te xan len;

²⁴a pe štárto berš saré léskire barjakirdé trej te javén svencindle vaš Ráskire-Devléskire svénki;

²⁵a pe pándžto berš tumé saštý te xan léskire barjakirdé i te skedén péske saró, so léstyr isyn. Me som Raj Devél, Devél tumaró.

²⁶Na xan ničí ratésa; na drabakiren i na čovahaniakiren.

²⁷Na občinen tumaré šereskire balá saré rigéndyr, i na podčin tyré čhorengiro (brodakiro) jagóro (krajo).

²⁸Vaš ripiribén pal muleste na kerén čhinybén pe tumaré masá, i na vyphusaven pe tumaré masá vari-savó začhinyben. Me som Raj Devél.

²⁹Na magir tyrja čha, domeki la ke bléndo, sob (kaj) te na javél bléndo pe phuv i te na pherdjol phuv zlydnimasa.

³⁰Rakhén miré sávaty (suboty) i den patýv Miré sventoné štetoske. Me som Raj Devél.

³¹Na riskirén godý ke manušá, savé vykharena mulen, i na psirén ke čovahane, i na dolydžan pes ke magiripén léndyr. Me som Raj Devél, tumaró Devél.

³²Angíl phuré manušéste uštý i kutiakir léskiro phuripen, i dar tyré Devléstyr. Me som Raj Devél.

³³Kiéli javéla te dživél manúš javire rigátyr pe tumarí phuv, na pritasaven les;

³⁴o manúš, savó pritradyja javire rigátyr, i jaciá te dživél tuménde; mek te javél vaš tuménge dasavo-pac', syr tumaró manúš isyn; sykáv patýv léske, syr péske; pal-dová so i tumé sánas manušá, savé javné javire rigátyr pe Jegiptóskiri phuv. Me som Raj Devél, tumaró Devél.

³⁵Na kerén xohaibén pe séndo, dre miéra, dre vaga (vieso) i dre miéra te čhuvés:

³⁶mek te javén tuménde ubladýtka (viesy) čačuné, giri čačuné, efa čačuný i gino čačunó. Me som Raj Devél, tumaró Devél, Savó vylydžijá tumen Jegiptóskire phuvjátyr.

³⁷Rakhén saré Miré uphenybená i saré Miré Zakóny i kerén pir lénde. Me som Raj Devél.’”