Read Biblija - Pe Baltitko Romani čib (Romanes) 2019 Baltic Romani Bible Lievito 2 Bible Online

Lievito 2 - Biblija - Pe Baltitko Romani čib (Romanes) 2019 Baltic Romani Bible bible

Lievito 2

¹Kóli vari-konéste pe iló te janel Ráske-Devléske marunó svénto dyibén, mek te janel jaržó parné givestyr, i čhuvéla pe léste jeliejo (olivítko dzet), i čhuvéla pe léste livano,

²i janéla les ke Aaronóskire čhavé, ke rašaja, i léla pherdý burnyk (žmienia) jaržó jeliejosa i saré livanosa, i shačkiréla rašáj davá syr ripiribén pe altárjo; davá isyn svénto dyibén, gudló thuv, Ráske-Devléske;

³a so jačéla marune janybnastyr, dová javéla Aaronóske i léskire čhavénge: davá isyn naj baredýr sventyma Ráskire-Devléskire sventoné dyibnástyr (žertvendyr).

⁴Kóli janesa svénto dyibén syr marunó janybén, savó isyn pekno dro bov, tedy jan pšienična maré priesna, pirimiešyndle jeliejosa, ci priesna mariklia, pomakhne jeliejosa.

⁵Kóli tyró svénto dyibén isyn marunó janybén skoroviedatyr (xičatyr), to tedy davá trej te javél pšenično jaržó, pirimiešyndlo jeliejosa, priesno;

⁶rosphagir les pe koterá (kuski), i čhuv pe léste jeliejo: davá isyn marunó janybén.

⁷Kóli tyró svénto dyibén isyn marunó janybén pirjatyr, to tedy trej te kerél les pšeničnone jaržestyr jeliejosa (olivitkone dzetesa),

⁸i jan marunó janybén, savó sčhudo daléstyr, Ráske-Devléske; otdé les rašáske, a jov les janéla ke altárjo;

⁹i léla rašáj dalé sventoné dyibnástyr paš syr ripiribén, i shačkiréla pe altárjo: davá isyn svénto dyibén, gudló thuv, Ráske-Devléske;

¹⁰a so jačélape marune janybnastyr, to mek te javél Aaronóske i léskire čhavénge: daja isyn bari sventyma sventoné dyibnástyr (žertvendyr) Ráske-Devléske.

¹¹Ni savó marunó janybén, savó janéna Ráske-Devléske, na kerén kvašeno pe droždžy, pal-dová so ni kvašeno, ni avgín naštý tumé te xačkirén dro svénto dyibén Ráske-Devléske;

¹²syr janybén pervoné barjakirdendyr (plodendyr) janéna len Ráske-Devléske, a pe altárjo naštý te čhuvén len vaš gudló thuv.

¹³Kažno tyró marunó janybén lond'kir londesa, i na jačkir tyró svénto dyibén bi londeskiro tyré Devléskire zavietostyr: kažnoné tyré janybnasa jan lond.

¹⁴Kóli janesa Ráske-Devléske pervoné barjakirldendyr marunó janybén, jan dro dáro tyré anglatuné barjakirdendyr, savé isyn kolosendyr, savé vyšut'kirde pe jag, rostasade ziárki,

¹⁵i čhuv pe lénde jeliejo, i čhuv pe lénde livano: davá isyn marunó janybén;

¹⁶i shačkiréla rašáj syr ripiribén paš ziárki i jeliejo saré livanosa: davá isyn svénto dyibén (žértva) Ráske-Devléske.