Read Biblija - Pe Baltitko Romani čib (Romanes) 2019 Baltic Romani Bible Lievito 20 Bible Online

Lievito 20 - Biblija - Pe Baltitko Romani čib (Romanes) 2019 Baltic Romani Bible bible

Lievito 20

¹I phendiá Raj Devél Mojzáske, rakirí:

²“Rákir davá Izrailjoskire čhavénge: Kóli vari-kon Izrailjoskire čhavéndyr i manušéndyr, savé javné javire rigéndyr, savé dživéna maškír Izrailitianende, déla jekhés péskire čhavéndyr Molohoske, odová mek te javél otdynó meribnáske, adalé phuvjákire manušá mek te zamarén les barénca;

³i Me riskiráva Miro muj pe odolé manušéste i xasiakiráva les léskire manušéndyr, pal-dová so jov otdyjá péskire čhavéndyr Molohoske, sob (kaj) te magirel Miro svénto štéto i te teliakirel svénto Miro lav;

⁴i, kóli adalé-phuvjákire manušá na riskirena péskire jakhá pe odolé manušéste, kiéli jov déla péskire čhavéndyr Molohoske, i na muliakirena les,

⁵to tedy Me riskiráva Miro muj pe odolé manušéste i pe léskiro ródo, i xasiakiráva les léskire manušéndyr, i sarén, kon psiréla pal léste, sob (kaj) blendyi te psirén palál Molohoste.

⁶I kóli vari-savó di riskiréla godý ke manušá, savé vykharena mulen i ke čovahane, sob (kaj) blendyi te psirés pal lénde, tedy Me riskiráva péskiro Muj pe dová di, i xasiakiráva les lákire manušénde.

⁷Svenciakiren pes i javén svénta, pal-dová so Me som Raj Devél, tumaró Devél, i Me som Svénto.

⁸Rakhén Miré statúty i kerén saró pir lénde, pal-dová so Me som Raj Devél, Savó svenciakirela tumen.

⁹Kon javéla te košel péskire dadés ci peskirjá da, odová mek te javél otdynó meribnáske; péskire dadés i da peskirjá jov kostia: léskiro rat javéla pe léste.

¹⁰Kóli vari-kon javéla te kerél biladžaipén paloromitkone romniása, kóli vari-kon javéla te kerél biladžaipén péskire pašatuneskire romniása, mek te javén otdyné meribnáske, biladžakuno i biladžakuny.

¹¹Kóli vari-kon pasjola péskire-dadéskire romniása, odová xaj otčhakirdiá léskire-dadéskiro nangipén, mek te javén otdyné meribnáske dujdžiné, léngiro rat te javél pe lénde.

¹²Kóli vari-kon pasjola péskire borjasa, tedy dujdžiné jone mek te javén otdyné meribnáske: magiripén jone kerdé, léngiro rat te javél pe lénde.

¹³Kóli vari-kon pasjola muršesa, syr džuvliása, tedy jone dujdžiné kerdé magiripén: mek jone te javén otdyné meribnáske, léngiro rat te javél pe lénde.

¹⁴Kóli vari-kon léla péske romniá i lakirja da: davá isyn proti zakóno; pe jag trej te xačkirén les i len, sob (kaj) te na phagiren zakóno maškír tuménde.

¹⁵Kon khetaniakirelape kheritkoné murdalesa (skotosa), odolés te otdes meribnáske, i murdales te zamarén.

¹⁶Kóli džuvlý džála ke vari-savó murdál (žyvotno), sob (kaj) te kerél biladžaipén lésa, tedy zamar džuvliá i murdales, mek te javén jone otdyné meribnáske, léngiro rat te javél pe lénde.

¹⁷Kóli vari-kon léla peskirjá pheniá, péskire-dadéskire čha ci péskire-dákire čha, i udykhéla lákiro nangipén, i joj udykhéla léskiro nangipén: davá isyn ladž, mek te javén jone xasiakirdé angíl péskire-čhavéngire manušéngire jakhá; jov otčhakirdiá péskire-pheniakiro nangipén: péskiro grého lydžála jov.

¹⁸Kóli kon pasjola romniása dre davá časo, kiéli láte džuvlikany dukh, i otčhakirela lákiro nangipén, tedy jov otčhakirdiá lákiro thadypen, i joj otčhakirdiá péskire rata: dujdžiné jone mek te javén xasiakirdé péskire manušéndyr.

¹⁹Na otčhakir nangipén tyré-dákire pheniakiro i tyré-dadéskire pheniakiro, pal-dová so adasavó manúš nangiakirela péskiri seménca; grého péskiro lydžána jone.

²⁰Kon pasjola péskire bibjasa, odová otčhakirdiá nangipén péskire kakeskiro; grého péskiro lydžána jone, bi čhavorengiro meréna jone.

²¹Kóli vari-kon léla péskire-pšaléskire romniá: davá isyn džungaló (brydko) réndo; jov otčhakirdiá péskire-pšaleskiro nangipén, bi čhavorengiro javéna jone.

²²Rakhén saré Miré statúty i saré zakóny Miré, i kerén saró pir lénde, i na vyčhurdela tumen péstyr phuv, pe saví Me lydžáva tumen te dživén.

²³Na kerén pir manušýtko prisykliaiben, savén Me tradava krig tuméndyr; pal-dová so jone kerdé saró davá, i Me xoliasyjom pe lénde,

²⁴i phendjom Me tuménge: ‘tumé xulainena léngire phuvjása, i tuménge otdáva dro meknó mištypén (nasliedstvo) phuv, dre saví thadéla thud i avgín. Me som Raj Devél, tumaró Devél, savó čhudiá dre rig tumen saré manušéndyr.

²⁵Roskeden péske žužé murdales nažužestyr i žužé čirikliá nažužatyr, i na magirén tumaré dijá murdalesa i čirikliasa i sarésa, so polzynela pir phuv, so priĥalyjom Me, syr nažužo.

²⁶Javén svénta angíl Mánde, pal-dová so Me som Raj Devél, tumaró Devél, som Svénto, i Me čhudjom dre rig tumen manušéndyr, sob (kaj) tumé te javén Miré.

²⁷Murš ci džuvlý, kóli jone javéna te vykharen mulen ci te čovahaniakiren, mek te javén otdyné jone meribnáske, trej te domaren len barénca, léngiro rat te javél pe lénde.’”