Read Biblija - Pe Baltitko Romani čib (Romanes) 2019 Baltic Romani Bible Lievito 21 Bible Online

Lievito 21 - Biblija - Pe Baltitko Romani čib (Romanes) 2019 Baltic Romani Bible bible

Lievito 21

¹I phendiá Raj Devél Mojzáske: “Rákir rašange, Aaronóskire čhavénge, i phen lénge: ‘Mek jone te na magirén pes čilavibnasa ke muló péskire manušéndyr;

²iekh so ke péskiri pašatuny seménca, ke péskiri daj i ke péskiro dad, ke péskiro čhavó i ke péskiri čhaj, ke péskiro pšal,

³i ke péskiri phen, saví te javél dre čhaja, i dživdiá pašýl léste i na sys paloróm, saštý léske te kerél davá nažužypen;

⁴i čilavibnasa ke kon by da te na javél dre péskire manušénde jov naštý te magirel pes, sob (kaj) te na jačél nažužo.

⁵Lénge naštý te čhinen ke nangipén (te muraven) péskire šeré i te podčhinen jagóry (kraí) dre péskire čhora (broda), i te kerén čhinybén pe péskire masá.

⁶Lénge trej te javén svénta péskire Devléske, i lénge naštý te teliakiren péskire-Devléskiro lav, pal-dová so jone janéna Ráske-Devléske svénto dyibén (žértva) pe jag, maró péskire Devléske, i paldavá isyn bangé te javén svénta.

⁷Lénge naštý te len pal péste biladžakunia džuvliá i došvalia čha, i naštý te len i džuvliá, savjá mekciá lákiro rom, pal-dová so jone isyn svénta péskire Devléske.

⁸Vysvencyn len, pal-dová so jone janéna maró tyré Devléske: mek te javén jone túte svénta, pal dová so Me som svénto Raj Devél, Savó svenciakirela tumen.

⁹Kóli e rašaskiri čhaj magirela pes biladžaipnasa, tedy joj teliakirela péskire dadés; jagása trej la te xačkirén.

¹⁰I baró rašáj péskire pšaléndyr, pe saveskiro šeró čhuvéla makhibnaskiro jeliejo (dzet), i savó isyn vysvencyndlo, sob (kaj) te ur'jelpe dre svénta rizy, naštý te nangiakirel péskiro šeró i te na kušel péskire rizy;

¹¹i ni ke kon muléndyr naštý jov te poddžál: adiáke-pac' čilavibnasa ke muló péskiro dad i péskiri daj jov naštý te magirel pes.

¹²I sventoné štetóstyr jov naštý te otdžal i te teliakirel péskire Devléskiro svénto štéto, pal-dová les vysvencyndle makhibnaskire jeliejosa vaš léskire-Devléske. Me som Raj Devél.

¹³Paloróm léske trej te lel patyvalia ternia džuvliá.

¹⁴Léske naštý te lel džuvliá, savjate myjá rom, ci savjá rom mekciá, ci savjá obhohade, ci biladžakunia džuvliá, ne patyvalia ternia džuvliá péskire manušéndyr isyn bangó jov te lel paloróm;

¹⁵Léske naštý te ladžakirel péskiro siemjo (sal) dre péskire manušénde, pal dová so Me som Raj Devél, Savó les svenciakirava.’”

¹⁶I phendiá Raj Devél Mojzáske dasavé lavá:

¹⁷“Rákir Aaronóske dasavé lavá: ‘Nikón tyré rodóstyr dre saré léngire ródy, savénde pe masá javéla nauhtylyben, naštý te poddžál, sob (kaj) te janel maró péskire-Devléske;

¹⁸nikón, konéste pe masá isyn nauhtylyben, naštý te poddžál, ni kororó, ni langalo, ni ragando (urodo),

¹⁹ni savó, konéste isyn piriphagirdy ĥerój, ci piriphagirdo vast,

²⁰ni ĥyrbasa, ni šuké člienosa, ni karliko, ni pliamasa pe jakh, ni ĥeralo, ni džuvalo (pošesiasa), ni došvalo murš (jevnuho);

²¹nijékh manúš rašaskire Aaronóskire rodóstyr, savéste pe masá isyn nauhtylyben, naštý te poddžál, sob (kaj) te janel Ráske-Devléske svénta dyibená; nauhtylyben isyn pe léste, paldavá léske naštý te poddžál, sob (kaj) te janel maró péskire-Devléske.

²²Maro péskire Devléskiro isyn baré sventymatyr i sventymatyr jov saštý te xal;

²³ne ke pologo jov naštý te javél, i ke altárjo naštý léske te poddžál, pal-dová so nauhtylyben isyn pe léste: jov naštý te teliakirel Miro svénto štéto, pal-dová so Me som Raj Devél, Savó svenciakirela len.”

²⁴I dyjá te džinél davá Mójza Aaronóske i léskire čhavénge i saré Izrailjoskire čhavénge.