Read Biblija - Pe Baltitko Romani čib (Romanes) 2019 Baltic Romani Bible Lievito 22 Bible Online

Lievito 22 - Biblija - Pe Baltitko Romani čib (Romanes) 2019 Baltic Romani Bible bible

Lievito 22

¹I phendiá Raj Devél Mojzáske, rakirí:

²“Rákir Aaronóske i léskire čhavénge, sob (kaj) jone rakhibnasa te rikirén pes angíl Izrailjoskire-čhavéngire sventyma, i te na magirén Miro svénto lav dro dová, so jone rakiréna Mánge. Me som Raj Devél.

³Phen lénge: ‘Kóli vari-kon saré tumaré manušéndyr dre tumaré ródy, te rikirél pe péste nažužypen, te poddžál ke sventyma, savé posvencynena Izrailjoskire čhavé Ráske-Devléske, tedy te xasjol dová di Miré móstyr. Me som Raj Devél.

⁴Nijékh Aaronóskire rodóstyr prokazasa ci konéste thadéla, odoléske naštý te xal sventyma, paka jov na vyžužakirelape; i kon čilavéla vari-so nažužo mulestyr, ci konéste vyčhuvelape siemjo (sal),

⁵ci kóli vari-kon čilavéla vari-savó sozdyiben, so polzynela, savéstyr jov jačéla nažužo, ci čilavéla manušés, savéstyr jov jačéla nažužo, savó te na javél nažužypen,

⁶odová, kon čilavéla saró, nažužo javéla jov ke bel'vél', i léske naštý te xal svénto angledýr, syr jov obmorela péskire masá paniésa;

⁷ne kiéli zadžála kham i jov javéla žužó, tedy jov moginéla te xal sventyma, pal-dová so davá sys léskiro xabén.

⁸Padal' i mas, so jaciápe riskiribnáskire murdalestyr (zvierjostyr) jov te na xal, sob (kaj) te na magirelpe dalésa. Me som Raj Devél.

⁹Mek te rakhén jone Miré uphenybená, sob (kaj) te na lydžán pe péste grého, i te na merén dre léste, kiéli jone phagirena davá. Me som Raj Devél, savó svenciakirela len.

¹⁰Nikonéske javire manušéske naštý te xal sventyma: savó dživéla ke rašáj i nalyno butiarno naštý te xal sventyma;

¹¹kóli rašáj kinela péske manušés pal rup, tedy jov saštý (moginéla) te xal sventyma; adiáke-pac' i léskire kherítka saštý te xan léskiro maró.

¹²Kóli rašaskiri čhaj vydžála paloróm pal javire manušéste rigátyr, tedy joj naštý te xal, so janéna dre sventyma;

¹³kiéli rašaskiri čhaj jačélape pivliasa (udovasa) ci rozdžalape romesa, i čhavén láte nane, i risjola dre péskire dadéskiro kher, syr sys dro péskiro ternypen, tedy joj saštý (moginéla) te xal péskire-dadéskiro maró; a nijékh javire rigátyr naštý les te xal.

¹⁴Kon délape dukhá (keréla doša) i xála vari-so sventymatyr, odová isyn bangó te otdél rašáske svénto i te dočhuvel ke joj lákiri pándžto paš.

¹⁵Rašange kokorenge naštý te magirén Izrailjoskire-čhavengiri sventyma, savó jone janéna Ráske-Devléske,

¹⁶i lénge naštý te vykharen pe péste bang dro čoripén, kiéli javéna te xan péskiri sventyma, pal-dová so Me som Raj Devél, Savó svencynela len.’”

¹⁷I phendiá Raj Devél Mojzáske dasavé lavá:

¹⁸“Rákir Aaronóske i léskire čhavénge i saré Izrailjoski-re čhavénge, i phen lénge: ‘Kóli vari-kon Izrailjoskire kheréstyr, i manušéndyr, savé javné javire rigátyr, i dživéna maškír Izrail'tianende, ci pir saví sovláh, ci pir iló janéla péskiro svénto dyibén, savó janéna Ráske-Devléske dro célo shačkiribén,

¹⁹tedy, sob (kaj) lénge te javél Rástyr-Devléstyr láska, svénto dyibén trej te javél bidošéngiro, murš, baré murdalestyr, bakréndyr i buznendyr (kozlendyr);

²⁰nisavó murdál (žyvotno), pe savéste isyn doš, te na janén; pal-dová so davá na déla tuménge Rástyr-Devléstyr láska.

²¹I kóli vari-kon janéla mírno svénto dyibén Ráske-Devléske, sob (kaj) te kerél pir sovláh, ci pir iló, baré murdalestyr ci tyknestyr, tedy svénto dyibén isyn bangó te javél bidošéngiro, sob (kaj) te javél lačhó Ráske-Devléske: nisaví doš naštý pe léste te javél;

²²korores murdales, ci savés domardes, ci urodos, ci nasvales, ci ĥerales, ci džuvales, dasaven na janén Ráske-Devléske, i dro svénto dyibén na den len pe Ráskire-Devléskiro altárjo;

²³guruvóres i bakrés člienenca drieván dlengonenca ci tyknenca, syr svénto dyibén péskire iléstyr tu moginésa te janes; a kóli pir sovláh, tedy davá na javéla pir láska Devléske;

²⁴murdalá, savéste jatry rostasade, rozmarde, otkušne ci vyčhindlé na janén Ráske-Devléske, i pe tumarí phuv davá na kerén;

²⁵i javire-phuvjákire manušéngire vasténdyr na janén sarén dasaven murdalén dro svénto dyibén tumaré Ráske-Devléske, pal-dová so pe lénde isyn doš; jone na janéna tuménge láska Devléstyr.’”

²⁶I phendiá Raj Devél Mojzáske dasavé lavá:

²⁷“Kiéli bijandjola (lotjola) guruvoro, ci bakroró, ci buznoro, tedy eftá dyvesá léske trej te javél pašýl péskire date, a ohtotone (bidujengire deštone) dyveséstyr javéla lačhó vaš janybén dro svénto dyibén Ráske-Devléske;

²⁸ne ni gurumnia, ni bakriá na čhinen dro jekh dyvés léngire dasa.

²⁹Kóli janéna Ráske-Devléske parikiribnaskiro svénto dyibén, tedy janén les adiáke, sob (kaj) jov te del tuménge láska;

³⁰dre dová-pac' dyvés trej les te xan, na jačkiren látyr ke ránko (ke zlóko). Me som Raj Devél.

³¹I rakhén Miré priphenybená i kerén saró pir lénde. Me som Raj Devél.

³²Na magirén Miro svénto lav, sob (kaj) Me te javav sventonesa maškír Izrailjoskire čhavénde. Me som Raj Devél, Savó svenciakirela tumen,

³³Savó vylydžijá tumen Jegiptóskire phuvjátyr, sob (kaj) te javél tumaró Devél. Me som Raj Devél.”