Read Biblija - Pe Baltitko Romani čib (Romanes) 2019 Baltic Romani Bible Lievito 23 Bible Online

Lievito 23 - Biblija - Pe Baltitko Romani čib (Romanes) 2019 Baltic Romani Bible bible

Lievito 23

¹I phendiá Raj Devél Mojzáske, rakirí:

²“De te džinén Izrailjoskire čhavene i phen lénge pal Ráskire-Devléskire svénki, dre savé tuménge trej te skedén svénta skedyibena. Ĥáda, Miré svénki isyn dasavé:

³šov dyvesá saštý te kerés butý, a pe eftáto (bitrinéngiro déšto) dyvés sávato (subóta) te otkinjon, svénto skedyibén; nisaví butý na kerén: davá isyn sávato Ráskiro-Devléskiro dre saré tumaré kherá.

⁴Ĥáda, isyn Ráskire-Devléskire svénki, svénta skedyibena, savé tuménge trej te kerén dre péskiro časo (cýro);

⁵dro pérvo (anglatunó) čhon, pe dešuštartone-čhonéskiro dyvés bel'velié te javél Patradí Ráskire-Devléskiri;

⁶i pe dešupandžto dyvés dolé čhonéskiro svénko opriesnoki Ráske-Devléske; eftá dyvesá xan apriesnoki.

⁷A pe anglatunó (pérvo) dyvés mek te javél tuménde svénto skedyibén; nisaví butý na kerén;

⁸i dre saré eftá (bitrinéngiro deš) dyvesá janén Ráske-Devléske svénta dyibená; pe eftáto dyvés adiáke-pac' svénto skedyibén; nisaví butý na kerén.”

⁹I phendiá Raj Devél Mojzáske dasavé lavá:

¹⁰“De te džinén Izrailjoskire čhavénge i phen lénge: ‘Kiéli javéna pe phuv, saví Me dáva tuménge, i javéna te čhinen pe láte žatva, tedy janén pérvo tumaré-žatvakiro ĥarbo (snopo) ke rašái;

¹¹jov ĥazdéla davá ĥarbo angíl Raste-Devléste, sob (kaj) tuménge te javél Ráskire-Devléskiri láska; pe javír svenkoskiro dyvés ĥazdéla les rašái;

¹²i dro dyvés, kiéli ĥazdéna ĥarbo, janén Ráske-Devléske dre célo shačkiribén jekhe-beršytkone bidošengire bakrores,

¹³i khetané lésa marunó janybén duj dešta pašá efa pšenično (parné givestyr) jaržó pirimiešyndlo jeliejosa, dro Ráskire-Dev-léskiro svénto dyibén, vaš gudló thuv, i vyčhuiben ke jov štárto gino mol (vino);

¹⁴ni savó nevó maró, ni šuké ziárki, ni kinde ziárki na xan ke dová dyvés, dro savó janéna amaré Ráske-Devléske janybén: davá isyn viéčno uphenybén dre tumaré ródy dre saré tumaré kherá.

¹⁵Otginen péske pervoné dyveséstyr korigedýr (pozže) svénko, odolé dyveséstyr, dro savó tumé janéna trinskiribnaskiro ĥarbo, eftá pherdé kurke,

¹⁶ke pérvo dyvés korigedýr (pozže) eftáto kurko otginen pandždešá dyvesá i tedy janén nevó marunó janybén Ráske-Devléske:

¹⁷ianén tumaré kherendyr duj laby maró te ĥazdén, savé trej, sob (kaj) te javén duje-dešengire pašendyr, savé isyn dre efa pšeničnone jaržestyr, i trej te javén spekne šutle, syr pérvo barjakirdó (plódo) Ráske-Devléske;

¹⁸ianén khetané marésa eftá bakrorén bidošakiren, jekhe-beršytkonen, i baré kheritkoné murdaléndyr (skotóstyr) jekhe guruvóres i dujén bakrén; mek te javél davá dro célo shačkiribén Ráske-Devléske, i marunó janybén khetané sventoné dyibnasa te počhuven, dro svénto dyibén, dro gudló thuv, lačhó Ráske-Devléske.

¹⁹Kerén adiáke-pac' buznengire stadatyr jekhe buznés dre svénto dyibén pal grého, i dujén jekhe-beršytkonen bakrén dre mírno svénto dyibén.

²⁰O rašáj isyn bangó te janel davá, trinskiri angíl Raste-Devléste, khetané trinskirde marésa pervoné barjakirdeskire (plodoskire) i duje bakrenca. Davá javéla posvencyndlo Ráske-Devléske; vaš rašáske,

²¹i kharén manušén dro davá dyvés, mek te javél tuménde svénto skedyibén, nisaví butý te na kerén: davá isyn viéčno uphenybén dre saré tumaré kherá dre tumaré ródy.

²²Kiéli javéna tumé pe tumarí phuv te sčhinen žatva, na čhinen ke kónco (ke jagóro) tyrí félda, kiéli sčhinesa, i so jačélape tyré žatvatyr, na podkede; čororeske i manušéske, savó javdiá javire rigátyr jačkir davá: Me som Raj Devél, tumaró Devél.’”

²³I phendiá Raj Devél Mojzáske, rakirí:

²⁴“Phen Izrailjoskire čhavénge: dre eftáto čhon, pe anglatuné-čhonéskiro dyvés mek te javél tuménde otkhinyben, svénko rogengiro (trubengiro), svénto skedyibén;

²⁵na kerén nisaví butý, i janén Ráske-Devléske svénto dyibén.”

²⁶I phendiá Raj Devél Mojzáske dasavé lavá:

²⁷“Adiáke-pac' pe déšto dyvés dro davá-pac' eftáto čhon, dyvés te žužakiren pes, mek te javél tuménde svénto skedyibén; pririkiren (pritasaven) tumaré dijá, i janén Ráske-Devléske svénto dyibén;

²⁸na kerén nisavó réndo (diélo) dro davá dyvés, pal-dová so davá isyn dyvés te žužakirenpe, sob (kaj) te žužakiren tumé pes angíl Raste-Devléste, tumaré Devléste;

²⁹a kažno di, savó na pririkirela pes pe davá dyvés, javéla xasiakirdo péskire manušéndyr;

³⁰i kóli vari-savó di javéla te kerél vari-savó réndo dro davá dyvés, Me xasiakiráva davá di lákire manušéndyr;

³¹na kerén nisavó réndo: davá syn viekoskiro uphenybén dre tumaré ródy dre saré tumaré kherá;

³²davá isyn vaš tuménge dro sávato te otkhinjol, i obrikiren tumaré dijá, bel'veliatyr dolé dyveséstyr dro jeniáto dyvés čhonéskiro; bel'veliatyr ke bel'vél' svenkinen tumaró sávato.”

³³I phendiá Raj Devél Mojzáske, rakirí:

³⁴“Phen Izrailjoskire čhavénge: dešupandžengiro dyveseskiro dro dová-pac' eftáto čhon javéla svénko kuščy (budy), eftá dyvesá Ráske-Devléske;

³⁵pe pérvo dyvesá svénto skedyibén, na kerén nisaví butý;

³⁶saré eftá dyvesá janén Ráske-Devléske svénto dyibén; pe ohtóto (bidujéngiro déšto) dyvés mek te javél tuménde svénto skedyibén, i janén svénto dyibén Ráske-Devléske: davá isyn otdyibén svenkoskire, na kerén nisaví butý.

³⁷Ĥáda, isyn Ráske-Devléske svénki, dre savé tuménge trej te skedén svénto skedyibén, sob (kaj) te janes dro jagitko svénto dyibén Ráske-Devléske célo shačkiribén, marunó janybén, začhindlé svénta dyibená i thaduno dyibén, kažno dro péskiro dyvés:

³⁸apríč sávaty Ráskire-Devléskire, i apríč tumaré dáry, i apríč saré tumaré sovlahá i apríč saró, so tumé janéna pir tumaró iló, so tumé déna Ráske-Devléske.

³⁹A pe dešupandžto dyvés dro jeniáto (bijekhéskiro déšto) čhon, kiéli tumé ukedena, so bijandiá phuv, svenkinen Ráskire-Devléskiro svénko eftá dyvesá: dro pérvo dyvés otkinyben i pe ohtóto dyvés te javél otkinyben.

⁴⁰A pe pérvo dyvés len péske gožone vešéstyr randiá (vétki), pal'makire randiá i randiá buĥle-patriniengire vešéstyr i vierba rekátyr (leniátyr), i radynénpe pherdés angíl Raste-Devléste, tumaré Devléste, eftá dyvesá.

⁴¹I svenkinen davá Ráskire-Devléskiro svénko eftá dyvesá dro berš: davá javéla viekoskiro uphenybén dre tumaré ródy; pe eftáto čhon svenkinen les.

⁴²I javéna tumé te dživén eftá dyvesá dre budy; kažno péskiro manúš, Izrail'tianino isyn bangó te dživél dre budy,

⁴³sob (kaj) te džinén tumaré ródy, so dre budy čhudjom Me te dživén Izrailjoskire čhavén, kiéli Me vylydžijom len Jegiptóskire phuvjátyr. Me som Raj Devél, tumaró Devél.”

⁴⁴I dyjá te džinén Mójza Izrailjoskire čhavénge pal Ráskire-Devléskire svénki.