Read Biblija - Pe Baltitko Romani čib (Romanes) 2019 Baltic Romani Bible Lievito 24 Bible Online

Lievito 24 - Biblija - Pe Baltitko Romani čib (Romanes) 2019 Baltic Romani Bible bible

Lievito 24

¹I phendiá Raj Devél Mojzáske dasavé lavá:

²“Priphen Izrailjoskire čhavénge, sob (kaj) jone te janén túke žužó, vymardo jeliejo (dzet) vaš dud (svéto), sob (kaj) saró časo te xačol momolýtko (svietíl'niko);

³pal šýrma angíl kovčego dosykaibnása (otkrovienijasa) dre skedyibnáskiri šátra Aaróno i léskire čhavé isyn bangé te čhuvén les angíl Raste-Devléste ŭsády (sak) bel'veliatyr ke ránko (ke zlóko): davá javéla viekoskiro uphenybén dre tumaré ródy.

⁴Pe žužó šandalo (podsviečniko) trej léske te čhuvél momolýtko (svietíl'niko) ŭsády (sak) angíl Raste-Devléste.

⁵I le pšenično jaržó i spek léstyr dešudúj maré; dro kažno maró trej te javél duj dešta efatyr;

⁶i čhuv len dre duj riady, pir šov dro riado, pe žužó skamínd angíl Raste-Devléste;

⁷i čhuv pe kažno riado žužó livano, i javéla davá pašýl maró, dro ripiribén, dro svénto dyibén Ráske-Devléske;

⁸dro kažno savatoskiro (subotakiro) dyvés saró časo (cýro) trej léske te čhuvél len angíl Raste-Devléste Izrailjoskire čhavéndyr: davá javéla viekoskiro dorakiribén;

⁹jone javéna vaš Aaronóske i vaš léskire čhavénge, savé javéna te xan len (maré) pe svénto štéto, pal-dová so davá isyn bari sventyma vaš lénge Ráskire-Devléskire sventoné dyibnástyr: davá isyn viekoskiro uphenybén.”

¹⁰I vygijá čhavó jekhe Izrail'tiankakiro, savó bijándyja Jegiptianinostyr, ke Izrailjoskre čhavé, i roskostiape dre stáno Izrail'tiankakiro čhavó Izrail'tianinosa;

¹¹i kostia Izrail'tiankakiro čhavó Ráskire-Devléskiro lav i obrakirdia. I jandlé les ke Mójza;

¹²i čhudé les dre bešyben ke davá časo, paka javéla phendly léske Ráskire-Devléskiri vólia.”

¹³I phendiá Raj Devél Mojzáske, rakirí:

¹⁴“Vylydža manušés, savó obrakirdia Ráskire-Devléskire lav javrí stanostyr, i saré, kon šunéla, les mek te čhuvén péskire vastá pe léskiro šeró, i saró skedyibén te domarel les barénca;

¹⁵i Izrailjoskire čhavénge phen: ‘Kon javéla te obrakirel péskire Ras-Devlés, odová lydžála péskiro grého;

¹⁶i odová manúš, savó košela Ráskire-Devléskire lav isyn bangó te merél, barénca zamarela les saró skedyibén: ci manúš, savó javdiá javire rigátyr, ci péskiro manúš léla te košel Ráskire-Devléskire lav, adasavó otdynó javéla meribnáske.

¹⁷Kon zamarela vari-savé manušés, odová javéla otdynó meribnáske.

¹⁸Kon zamarela kheritkoné murdales (skoto), odová isyn bangó te zapleskirel pal léste, murdál pal murdaléste.

¹⁹Kon keréla péskire pašatuneske doš (škoda) pe masá, odoléske trej te kerél dová-pac', so jov kerdiá:

²⁰phagiriben pal phagiriben, jakh pal jakh, dand pal dand; syr jov kerdiá doš pe javire-manušéskire masá, adiáke i léske trej te kerés.

²¹Kon zamarela kheritkoné murdales, odová isyn bangó te zapleskirel pal saró; a kon zamarela manušés, odolés manušés isyn bangé te otdén meribnáske.

²²Jekh séndo isyn bangó te javél tuménde, syr vaš manušéske, savó javdiá javire rigátyr, adiáke i vaš péskire manušéske; pal-dová so Me som Raj Devél, Devél tumaró.’”

²³I piriphendia Mójza Izrailjoskire čhavénge; i vylydžiné manušés, savó obrakirdia Ráskire-Devléskire lavá javrí stanostyr, i domardé les barénca, i kerdé Izrailjoskire čhavé, syr priphendiá Raj Devél Mojzáske.