Read Biblija - Pe Baltitko Romani čib (Romanes) 2019 Baltic Romani Bible Lievito 25 Bible Online

Lievito 25 - Biblija - Pe Baltitko Romani čib (Romanes) 2019 Baltic Romani Bible bible

Lievito 25

¹I phendiá Raj Devél Mojzáske pe bérga Sinajo dasavé lavá:

²“De te džinén Izrailjoskire čhavénge i phen lénge: ‘Kiéli javéna pe phuv, saví Me dáva tuménge, tedy phuvjake trej te otkinjol pe Ráskire-Devléskiro sávato;

³šov berš počhuv ziárki dre tyrí félda i šov berš občhin tyró vinagrádniko (drakhitko), i skéde léngire barjakirdé (plódy),

⁴a pe eftáto berš mek te javél phuvjákiro sávato vaš otkhinyben, Ráskire-Devléskiro sávato: pe tyrí félda na čhuv, i tyró vinagrádniko na občhin;

⁵so kokoró vybarjola pe tyrí félda, na čhin, i múri na obkuš naobčhindle tyré lozatyr; mek te javél davá berš phuvjake otkhinyben;

⁶i davá, so vybarjola pe phuv dro savatytko berš, to davá javéla tuménge xabnasa, túke i tyré pisharíske, i tyré pisharicake, i tyré andynarščykoske, i odolé manušéske, savó javdiá javire rigátyr i dživéla ke tu;

⁷i kheritkoné murdaleske (skotoske) tyréske i riskiribnáskire murdalénge (zvierienge), savé dživéna pe tyrí phuv, mek te javél saró, so bijandjola pe láte xabnasa.

⁸I otgin péske eftá savatytko beršá, eftá móly pe eftá berš, sob (kaj) te javél túte dre eftá savatytka beršá štardešá jeniá berš;

⁹i priphen te bašaven pe rógo dro eftáto čhon, pe déšto-čhonéskiro dyvés, pe dyvés te žužakirenpe bašaven pe rógo pir sarí tumarí phuv;

¹⁰i sob (kaj) te svencynen pandždešengiro berš, i den te džinén pal vol'nyma pe phuv saré lákire manušénge; mek te javél davá tuménde baró svénko; i risjon kažno pe péskiro štéto, i kažno risjov ke péskiro ródyco.

¹¹Pandždešytko berš mek te javél tuménde baró svénko: na čhuvén dre phuv (na sieinen) i na čhinen (žnieinen), so kokoró barjola pe phuv, i na kuš múri lákire naobčhindle lozatyr,

¹²pal-dová so davá isyn baró svénko: svénto mek te javél jov vaš tuménge; a so bijándyja pe félda, xan.

¹³Dro svenkitko (jubilieino) berš kažno manúš risjola pe péskiro štéto.

¹⁴Kóli javésa te biknes vari-so tyré pašatuneske, ci javésa so te kines tyré pašatunestyr, na pritasaven jekh jekhés;

¹⁵pir rozgindle beršá korigedýr (pozžedýr) tu san bangó te kines tyré pašatunestyr, i pir rozgindle beršá kofostyr jov isyn bangó te biknel túke;

¹⁶kóli but jačénape beršá, barjakir timín; a kóli nábut jačénape beršá, to tykniakir timín, pal-dová so džindlé beršá, to vaš žatva jov biknela túke.

¹⁷Na pritasaven jekh jekhés, dar tyré Devléstyr, pal-dová so Me som Raj Devél, tumaró Devél.

¹⁸Kerén saró pir Miré uphenybená, i rakhén Miré zakóny, i javéna te dživén štylytkes pe phuv;

¹⁹i javéla phuv te del péskiro barjakirdó (plódo), i javéna te xan čalés, i javéna te dživén pe láte štylytkes.

²⁰Kóli tumé phenéna: ‘So aménge te xas pe eftáto berš, kiéli ame na javása ni te čhinas (sieinas), ni te ukedas umaloto (urožajo), so ame kerása?’

²¹Me bičhaváva pe šóvto berš pe tuménde Miro bahtiakiribén, i jov janéla umaloto pe trin berš;

²²i tumé javéna te počhuven dre phuv pe ohtóto (bidujéngiro déšto) berš, ne te xan javéna barjakirdé (plódy) phurané umalotostyr ke jeniáto berš, ke davá časo, paka dodžála ke spialyma umaloto léskiro, te xan javéna phuranó umaloto.

²³Phuv naštý te biknen sarésa: pal-dová so Mirí isyn phuv, tumé san čúža manušá i javire-rigakire manušá;

²⁴Pir sarí tumarí phuv tumé den vólia te vykinen phuv.

²⁵Kóli tyró pšal jačéla čororó i biknela péskiri phuv, tedy javéla léskiri pašatuny seménca i vykinela, so bikindia léskiro pšal;

²⁶kóli nane konéske pal léste te vykinel, ne kokoreste léste javéla barvalypén, i lathéla, ci but trej pal vykinybén,

²⁷to tedy jov te rozginel péskire bikiibnytka beršá, i te riskirél, so jačélape odoléske, konéske jov bikindia, i te lel pale nevéstyr péskiro xulaiben;

²⁸kóli léskiro vast na lathéla, ci but léske trej te riskirél, tedy dová, so jov bikindia, jačélape dre vastá manušéste, savó kindia jov ke svenkoskiro berš, a pe svenkoskiro berš jov otdžala, i jov nevéstyr vykinela pal péste.

²⁹Kóli vari-kon biknela dro fóro kher, dre savó saštý te dživés, oblydžino vantasa: tedy les saštý te vykines ke beršeskiro kónco (ke jagóro) léskire bikiibnastyr: saštý te vykines les pal saró berš;

³⁰kóli jov na javéla vykindlo pal saró berš, tedy kher, savó isyn dre fóro, i dro savó isyn vánta, jačélape odolé manušéste, savó les kindia dre léskire ródy, i pe svénko kher na otdžala léstyr.

³¹A kherá dre gavá, pašýl savénde nane vánta, trej te ginen len pal jekh phuvjákire feldasa: te vykines len saštý, i pe svénko jone otdžana.

³²A Lieviténgire fórja, léngire kherá dre fórja, Lieviténge ŭsády (sak) saštý te vykinen;

³³a kon Lievitendyr na vykinela, tedy léngiro bikindlo kher dro fóro pe svénko otdžala, pal-dová so dre fórja Lieviténgire kherá isyn léngire maškír Izrailjoskire čhavénde;

³⁴i féldy pašýl léngire fórja te biknes naštý, pal-dová so davá isyn viekoskiro léngiro mištypén.

³⁵Kóli tyró pšal jačéla čororó, i peréla dre urieža, tedy podrikir les, ci te javél jov čúžo, ci savó javdiá javire rigátyr, te dživél túsa.

³⁶Na le léstyr baripén (procento) i kófo, i dar tyré Devléstyr; sob (kaj) te dživél tyró pšal túsa.

³⁷Na de léske tyré lové tel baripén (procento), i na de tyró maró léske vaš kófo.

³⁸Me som Raj Devél, Devél tumaró, Savó vylydžijá tumen Jegiptokire phuvjátyr, sob (kaj) te del tuménge Xanaanóskiri phuv, sob (kaj) te javav tumaré Devlésa.

³⁹Kiéli túte čororjola tyró pšal i bikindlo javéla túke, tedy na čhuv pe léste pishar'jengiri butý;

⁴⁰jov isyn bangó túte te javél syr nalyno, syr manúš, savó javdiá javire rigátyr i ĥará dživéla; ke svenkoskiro berš mek te kerél butý túte,

⁴¹a tedy mek te otdžal jov tútyr, kokoró i lésa léskire čhavé, i risjola ke péskiro kherítko ródo (pliemjo), i nevéstyr te zadžál dre léskire-dadéngiro mištypén.

⁴²Pal-dová so jone isyn Miré pishárja, savén Me vylydžijom Jegiptóskire phuvjátyr: naštý len te biknen, syr biknena pishar'jén.

⁴³Na xulain pe lénde bimanušytkes, i dar tyré Devléstyr.

⁴⁴A, sob (kaj) tyró pishári i pisharica te javén Najudytkoné manušéndyr, savé dživéna pašýl tuménde; to kinen léndyr péske pisharís i pisharica.

⁴⁵Adiáke-pac' i manušéngire čhavorendyr, savé javné javire rigátyr, i dživéna pašýl tuménde, saštý (možna) te kinen, i léngire kheritkoné rodóstyr (pliemjostyr), savó isyn tuménde, savó lénde bijándyja pe tumarí phuv, i jone moginéna te javén tumaré.

⁴⁶Tumé saštý te piridén len syr meknó mištypén i tumaré čhavénge pir péste syr majonko; xulainen viéko lénca, syr pishar'jénca. A pe tumaré pšalénde, Izrailjoskire čhavénde, jekh pe jekhéste na xulainen zorjása.

⁴⁷Kóli vari-konéste, kon javdiá javire rigátyr, cji, savó javdiá te dživél ke tu, javéla léste barvalypén, a pšal tyró angíl léste jačéla čororó i biknela pes manušéske, savó javdiá javire rigátyr, savó javdiá to dživél túte, ci vari-savé manušés, javire rodycóske, savó javdiá javire rigátyr;

⁴⁸to tedy paló biknyben saštý les te vykinel; vari-kon léskire pšaléndyr isyn bangó te vykinel les,

⁴⁹ci léskiro kak, ci léskire-kakeskiro čhavó isyn bangó les te vykinel, ci kon-libo léskire semencatyr, léskire rodycóstyr, isyn bangó les te vykinel, cji, kóli javéla léste lové, kokoró pes vykinela.

⁵⁰I jov isyn bangó te rozginelpe manušésa, savó les kindia, léla te ginel dolé beršestyr, kiéli jov bikindia pes, ke svenkoskiro berš, i lové, pal savé jov bikindia pes, isyn bangó te otdél léske pir beršengiro ginybén; syr butiarno pir časo jov isyn bangó te javél léste;

⁵¹i kóli iščo (inké) but jačélape berš, tedy pir léngiro ginybén jov isyn bangó te otdél dre vykinybén pal péste lové, pal savé jov sys kindlo;

⁵²kóli nábut jačélape berš ke svenkoskiro berš, tedy jov isyn bangó te piriginel, i pal dalé beršá te otdél pal péste vykinybén.

⁵³Jov isyn bangó te javél léste, syr nalyno, pe saré beršá; jov na bangó te javél xulása pe léste zorjása dre tyré jakhá.

⁵⁴Kóli jov na vykinelape adiáke, tedy dre svenkoskiro berš otdžala kokoró i léskire čhavé lésa,

⁵⁵pal-dová so Izrailjoskire čhavé isyn Miré pishárja; jone isyn Miré pishárja, savén Me vylydžijom Jegiptóskire phuvjátyr. Me som Raj Devél, tumaró Devél.