Read Biblija - Pe Baltitko Romani čib (Romanes) 2019 Baltic Romani Bible Lievito 26 Bible Online

Lievito 26 - Biblija - Pe Baltitko Romani čib (Romanes) 2019 Baltic Romani Bible bible

Lievito 26

¹Na kerén péske vyčhudé obrazy (kumiry) i vyčhindlé muiá (izvajanii), i stýlby na čhuvén péste, i bará vyčhindlé mujenca na čhuvén pe tumarí phuv, sob (kaj) te na bandjon angíl lénde, pal-dová Me som Raj Devél, tumaró Devél.

²Rakhén sávaty (suboty) Miré i den patýv ke svénto Miro štéto. Me som Raj Devél.

³Kóli tumé javéna te kerén pir Miré uphenybená, i Miré priphenybená javéna te rakhén i te kerén pir lénde,

⁴tedy Me dáva tuménge bryšynda dre péskiro časo (cýro), i phuv déla péskire barjakirdé (plódy), i feldýtka vešá déna péskiro barjakirdó (plódo);

⁵i ukedyiben maritko javéla te dodžal tuménde ke vinagradoskiro skedyibén, a vinagradoskiro skedyibén javéla te dodžal ke sieinyben, i javéna te xan péskiro maró čalés, i javéna te dživén pe tumarí phuv štylytkes (bidarakires).

⁶Me bičhaváva ramánjo (miro) pe tumarí phuv, tumé pasjona te soven, i nikón tumen na strahakirela, Me tradava krig mižehone riskiribnáskire murdalén (zvierien) tumaré phuvjátyr, i kurtála na prodžála pir tumarí phuv.

⁷I tumé javéna te tradén tumaren vergén, i peréna jone angíl tuménde kurtalátyr;

⁸I pandž tuméndyr protradena šel manušén, i šel tuméndyr protradena but vergén ke kalypén, i peréna tumaré vérgi angíl tuménde kurtalátyr.

⁹Me podykhava pe tuménde, i buté-bijanybnytkonenca (plodorodnenca) Me keráva tumen, i Me butyrjakirava but tumen, i Me javáva tvardo (bi kunipnaskiro) dre Miro zavieto (dorakiribén) tuménca;

¹⁰i tumé javéna te xan phuranó javire-beršytko, i vyčhurdena phuranó vaš nevó:

¹¹i Me čhuváva Mirí šátra (kher) maškír tuménde, i Miro dieske tumé na javéna džungalé (stetka);

¹²i Me javáva te psirav maškír tuménde, i Me javáva tumaré Devlésa, a tumé javéna Miré manušá.

¹³Me som Raj Devél, tumaró Devél, Savó vylydžijá tumen Jegiptóskire phuvjátyr, sob (kaj) tumé te na javén odój pishar'jénca, i te phagirav sastyrá tumaré ĥamostyr, i Savó lydžijá tumen zaĥazdyne šerésa.

¹⁴Kóli tumé na kandéna Man, i na javéna te kerén pir saré dalé priphenybená,

¹⁵i kóli tumé javéna te na prilén patyvása Miré uphenybená, i kóli tumaró di isyn nasvaló (brydinelape) Miré zakonendyr adiáke, so tumé na javéna te kerén pir saré Miré uphenybená, phagiri Miro zavieto,

¹⁶to tedy i Me keráva tuménca adiáke: Me bičhaváva pe tuménde dar, nasvalypen i xačkiribén, savéndyr khinjona jakhá i našavela zor di, i tumé javéna te počhuven dre phuv tumaré ziárki (siemi) ivjá, i tumaré vérgi shana len;

¹⁷i Me riskiráva Miro muj pe tuménde, i tumé peréna angíl tumaré vergénde, i namala tumaré javéna xulaja pe tuménde, i tumé prastána, kiéli nikón na javéla te tradelpe pal tuménde.

¹⁸Kóli pir saró davá tumé na kandéna Man, to tedy Me eftá móly keráva baredýr kára pal tumaré gréhi,

¹⁹i Me phagirava phut'kirdy tumarí nartyma (uporstvo), i bolybén tumaró uprál keráva, syr sastýr, i phuv tumarí, syr xarkóma (mied');

²⁰i ivjá (naprásnes) javéla te zdžal tumarí zor, i phuv tumarí na déla péskire čar'jenge te barjon, i phuvjákire vešá na déna péskire barjakirdé (plódy).

²¹Kóli paló saró davá tumé džána pe Mánde, i na zakamena te šunén Man, tedy Me dočhuvava tuménge maribén dre eftá móly pal tumaré gréhi:

²²i Me bičhaváva pe tuménde feldytkone riskiribnáskire murdalén (zvierien), savé otlena tumaré čhavén, xasiakirena tumaré kheritkoné murdalén (skoto), i tumen skerena tyknedýr, adiáke, so javéna čhučé tumaré dromá.

²³Kóli i paló davá Me na vysykliakirava tumen, i tumé džána pe Mánde,

²⁴to tedy i Me džáva pe tuménde, i čhuváva kára pe tuménde dre eftá móly pal tumaré gréhi,

²⁵i janáva Me kurtála pe tuménde te othal pale pal zavieto; i kóli tumé garadjona dre tumaré fórja, tedy Me bičhaváva pe tuménde fránsy (fuiá), i otdyné tumé javéna dre vergoskire vastá.

²⁶A maró, savó déla zor manušéske, Me xasiakiráva tuménde; deš džuvliá javéna te peken tumaró maró dro jekh bov, i javéna te otdén maró tumaró, važyny les; tumé javéna te xan, i na javéna čale.

²⁷Ne kóli iščo (inké) i paló davá tumé na kandéna Man i džána pe Mánde,

²⁸tedy i Me dre xolý džáva pe tuménde, i čhuváva kára pe tuménde dre eftá móly pal tumaré gréhi,

²⁹i tumé javéna te xan tumaré-čhavengiri loč (plot'), i loč tumaré-čhajengiri javéna te xan;

³⁰Me rosphagirava ke phuv tumaré vučipená, i rosphagirava tumaré stýlby, i čhurdava telé tumaré trúpy pe tumaré-idolengire koterá, i jačéna džungalé (brytka) tumé Miré dieske;

³¹a tumaré for'jéndyr Me keráva čhučí phuv, i skerava čhučé tumaré khangirja, i Me, na javáva te sungavav gudló thuv tumaré janybnastyr.

³²I Me keráva tumarí phuv čhučí adiáke, so denape divoske pal láte tumaré vérgi, savé dživéna pe láte;

³³a tumen rosčhurdava Me te dživén maškír manušénde i nangiakirava palál pal tuménde kurtála, i javéla phuv tumarí čhučí i fórja tumaré rosphagirdé.

³⁴Tedy phuv čaliakirela pes pal péskire sávaty (suboty) dre saré péskire čhučipnaskire dyvesá; kiéli tumé javéna pe tumaré-vergengiri phuv, tedy javéla te otkhinjol phuv, i čaliakirela pes pal péskire sávaty.

³⁵Joi, phuv, javéla te otkhinjol dre saré péskire čhučipnaskire dyvesá, ci but joj na otkhinyja dre tumaré sávaty, kiéli tumé dživdé pe láte.

³⁶Odolénge, kon jačélape tuméndyr, Me bičhaváva dre iló namuršypen pe phuv léngire vergengiri, i šumo patriengiro (listengiro), savó kuninelape, tradéla len, i tumé prastána, syr kurtalátyr, i peréna, kiéli nikón na tradelape,

³⁷i obštavenape jekh pe jekhéste, syr kurtalátyr, na dykhí pe davá, syr nikón na tradelape, i na javéla tuménde zor te terdjon angíl tumaré vergénde;

³⁸i xasjona tumé maškír manušénde, i shala tumen phuv tumaré vergengiri;

³⁹a kon jaciápe tuméndyr, javéna te xasjon so dyvés pal péskiro čoripén pe tumaré-vergengiri phuv, i pal péskire-dadéngiro čoripén xasjona tumé.

⁴⁰Ne kóli jone priĥaljonape dro péskiro čoripén i dre péskire-dadéngiro čoripén, syr jone ĥazdynépe proti Mánde i giné pe Mánde,

⁴¹pal so i Me gijom pe lénde i lydžijom len andré pe léngire-vergengiri phuv; tén'či, saštý, léngiro naobčhindlo iló kovljola, i tedy jone javéna te vyrikinen pal péskiro čoripén,

⁴²to Me priripirava Miro zavieto Jakovosa, i Miro zavieto Isaakosa, i priripirava Miro zavieto Avraamosa, i phuv priripirava.

⁴³To tedy syr phuv javéla jačkirdy lénca, i javéla te čaliakirel pes pal péskire sávaty, paldavá jaciá čhučí (pusto) léndyr, i jone javéna te vyrikiren pal péskiro čoripén, pal-dová, so jone na prilenas patyvása Miré zakóny, i léngire dieske sys džungalé (brydka) Miré uphenybená,

⁴⁴i tedy, syr jone javéna pe léngire-vergengiri phuv, — Me na javáva te na prilav len patyvása, i jone na javéna džungalé Mánge ke davá, sob (kaj) te xasiakiráv len, sob (kaj) te roskušav Miro zavieto lénca, pal-dová so Me som Raj Devél, léngiro Devél;

⁴⁵Me priripirava vaš lénge zavieto léngire dadénca, savén vylydžijom Me Jegiptóskire phuvjátyr angíl manušéngire jakhá, sob (kaj) te javav léngire Devlésa: Me som Raj Devél.’”

⁴⁶Ĥáda, isyn uphenybená i statúty i zakóny, savé Raj Devél čhudiá maškír péste i maškír Izrailjoskire čhavénde pe bérga Sinajo, pir Mojzaste.