Read Biblija - Pe Baltitko Romani čib (Romanes) 2019 Baltic Romani Bible Lievito 27 Bible Online

Lievito 27 - Biblija - Pe Baltitko Romani čib (Romanes) 2019 Baltic Romani Bible bible

Lievito 27

¹I phendiá Raj Devél Mojzáske, rakirí:

²“Rákir Izrailjoskire čhavénge i phen lénge: ‘Kon sovlahala te vysvencynel vari-konéskiro di Ráske-Devléske pir tyrí timín (cena),

³to tyrí timín muršeske bišé beršéndyr ke šovdešá isyn bangi te javél pandždešá rupove šékieli, pir šékieljo sventoneske;

⁴kóli davá isyn džuvlý, tedy tyrí timín isyn bangi te javél trijánda šékieli;

⁵pandžé beršéndyr ke biš berš timín tyrí muršeske isyn bangi te javél trijánda šékieli, a džuvliáke deš šékieli.

⁶A čhonestyr ke pandž berš timín tyrí muršeske isyn bangi te javél pandž rupuvé šékieli, a džuvliáke tyrí timín trin rupuvé šékieli;

⁷šovdeše beršéndyr i phuredýr muršeske tyrí timín isyn bangi te javél dešupandž rupuvé šékieli, a džuvliáke deš šékieli.

⁸Kóli jov isyn čororó i na dre zor te zapleskirel pir tyrí timín, tedy mek te sykavén les rašáske, i rašáj mek te del léske timín (čol): adákicy, kicý isyn mol isyn manušéskiro barvalypén, savó dyjá sovláh, mek te del léske timín rašái.

⁹Kóli dová te javén kherítka murdalá (skoto), savén janéna dro svénto dyibén (žértva) Ráske-Devléske, tedy saró, so dynó Ráske-Devléske, isyn bangó te javél svénto.

¹⁰Naštý te vyparuven les i te zaparuves lačhó nalačhesa ci nálačho lačhesa; kóli léla kon te zaparuvel murdales murdalesa, tedy i jov i léskiro zaparuiben javéla svénto.

¹¹Kóli dová javéla vari-savó nažužo murdál, savés na janéna Ráske-Devléske dro svénto dyibén, to dová trej te sykavén rašáske,

¹²i rašáj déla timín léske, ci lačhó joj ci nálačho, i savó déla rašáj timín, adiáke i trej te javél.

¹³Ne kóli vari-kon (xulái) kaméla te vykinel les, tedy mek te dočhuvel pándžto paš ke tyrí timín.

¹⁴Kóli kon otdéla péskiro Kher Ráske-Devléske dre sventyma, tedy rašáj isyn bangó te del timín léske, adiáke i javéla.

¹⁵Kóli manúš, savó otdyjá péskiro kher, zakaméla te vykinel les, tedy mek jov te dočhuvel pándžto rupeskiri paš tyré timinake, i tedy javéla léskiro.

¹⁶Kóli vari-kon péskire xulaibnastyr otdéla félda Ráske-Devléske, tedy tyrí timín trej te javél pir sieinybnaskiri timín: pal sieinyben xomiero ĥersto (jačmienjo) pandždešá šékieli rupésa.

¹⁷Kóli svenkitkone beršestyr vari-kon otdéla péskiri félda, davá trej te javél pir tyrí timín;

¹⁸kóli vari-kon otdéla péskiri félda paló svénko, tedy rašáj isyn bangó te rozginel rup pir beršá, savé jačnépe svenkoskire beršestyr, i isyn bangó pe adákicy te tykniakirel tyrí timín.

¹⁹Kóli manúš, savó otdyjá félda, zakaméla la te vykinel, tedy mek jov te dočhuvel pándžto rupeskiro/i paš tyré timinakiri, i joj iačélape pal léste;

²⁰kóli jov félda na vykinela, i félda javéla bikindly javire manušéske, tedy la naštý te vykinel:

²¹doiá félda, kiéli joj otdžala syr svenkoskiri, javéla svénto Ráske-Devléske, sýrby félda sovlahady; rašáske joj iačélape dro xulaiben.

²²A kóli vari-kon otdéla kindly félda Ráske-Devléske syr svénto, saví na léskire feldendyr,

²³tedy rašáj isyn bangó te rozginel léske ci but timín ke svenkoskiro berš, i jov isyn bangó jov te otdél pir rozginyben dre dová-pac' dyvés, syr Ráskire-Devléskiri sventyma.

²⁴A félda pe svenkoskiro berš piridžala nevés ke odová manúš, konéstyr kindle, konéske pridžalape doiá phuv dro xulaiben.

²⁵Kažno tyrí timín isyn bangi te javél pir šékieljo rašáske, biš giery trej, sob (kaj) te javén dre šékieljo.

²⁶Féni (jekhe) pervoné tyknoren murdaléndyr, savé otlydžanape Ráske-Devléske, naštý nikón te del dre sventyma: ci guruv da, ci tyknó kherítko murdál, jone isyn Ráskire-Devléskire.

²⁷Kóli murdál isyn nažužo, tedy isyn bangé te vykinel pir tyrí timín i te dočhuvel ke dová pándžto paš; kóli na vykinela, tedy isyn bangé te biknel pir tyrí timín.

²⁸Jekh saró zasovlahado, so tel sovláh manúš otdéla Ráske-Devléske péskire xulaibnastyr, ci manušés, ci kheritkoné murdales, ci félda péskire majonkostyr, na biknelape i na vykinelape; saró zasovlahado isyn bari sventyma Raskiri-Devléskiri;

²⁹Saró zasovlahado, so isyn sovlahado manušéndyr, na vykinelape: davá isyn bangó te javél otdynó meribnáske.

³⁰I kažno déšto paš, so phuv déla ci ziárka, ci barjakirdó (plódo) isyn Ráskire-Devléskire: davá isyn Ráskire-Devléskiri sventyma.

³¹Kóli vari-kon zakaméla te vykinel péskiri déšto paš, tedy mek jov te pričhuvel ke lákiri timín pándžto paš.

³²I kažno déšto paš baré i tykné kheritkoné murdaléndyr, saréstyr, so prodžála tel destó čhupnariskiro (žezlo), déšto paš isyn bangé te otdén Ráske-Devléske;

³³o manúš naštý te roskedel ci lačhó dová, ci fuj, i naštý te zaparuvel les; kóli kon les zaparuvela, tedy i kokoró jov i léskiro zaparuiben javéla sventonesa, i na moginéla te javél vykindlo.’”

³⁴Ĥáda, isyn priphenybená, savé rakirdiá Raj Devél Mojzáske vaš Izrailjoskire čhavénge pe bérga Sinajo.