Read Biblija - Pe Baltitko Romani čib (Romanes) 2019 Baltic Romani Bible Lievito 3 Bible Online

Lievito 3 - Biblija - Pe Baltitko Romani čib (Romanes) 2019 Baltic Romani Bible bible

Lievito 3

¹Kóli vari-konéskiro svénto dyibén isyn mírno (ramanjono), i, kóli jov janéla baré kheritkoné murdaléndyr (skotóstyr), murškanés ci džuvlikanes, mek te janel les Ráske-Devléske, te javél jov bidošéngiro,

²i čhuvéla péskiro vast pe péskire-žertvakiro šeró, i začhinela les pašýl vudár skedyibnáskiri šátra; a Aaronóskire čhavé, rašaja, pobryzginena ratésa pe altárjo saré rigéndyr;

³i janéla jov mirnone žertvatyr dro svénto dyibén Ráske-Devléske túko (čekén), savó učhakiréla andratuné masá (bukore), i saró čekén (túko), savó isyn pe andratuné masá,

⁴i duj bukore (počki) i čekén (túko), savó te javél pe lénde, savó isyn pe stjogny, i sal'niko, savó isyn pe kaló buko (piečonka); bukorenca (počkenca) jov roskedela davá;

⁵i Aaronóskire čhavé shačkirena davá pe altárjo khetané celoné shačkiribnasa, savó isyn pe kaštá pe jag: dová isyn svénto dyibén, gudló thuv, Ráske-Devléske.

⁶A kóli tykné kheritkoné murdaléndyr janéla jov Ráske-Devléske mírno (ramanjono) svénto dyibén, murškanó ci džuvlikano, mek te janel les, te javél bidošéngiro.

⁷Kóli jov janéla péskiro svénto dyibén bakréndyr, mek te janel les te javél angíl Raste-Devléste,

⁸i čhuvéla péskiro vast pe šeró péskire žertvakiro, i začhinela la angíl skedyibnáskiri šátra, i Aaronóskire čhavé pobryzginena lákire ratésa pe altárjo saré rigéndyr;

⁹i mek te janel mirnone žertvatyr Ráske-Devléske dro svénto dyibén lákiro čekén, saró kurdiuko, otčhiny les pir sámo xriebtoskiro kokalo, i čekén (túko), savó zaučhakirela andratuné masá (bukore), i saró čekén, savó isyn pe andratuné masá,

¹⁰i duj bukore (počki) i čekén, savó isyn pe lénde, savó isyn pe stjogny, i sal'niko, savó isyn pe kaló buko (piečonka); bukorenca jov otkedela davá;

¹¹rašáj shačkiréla davá pe altárjo; davá isyn jagakiro maró — svénto dyibén Ráske-Devléske.

¹²A kóli jov janéla svénto dyibén buzniendyr, mek te janel les angíl Raste-Devléste,

¹³i čhuvéla péskiro vast pe lákiro šeró, i začhinela la angíl skedyibnáskiri šátra, i pobryzginena Aaronóskire čhavé léskire ratésa pe altárjo saré rigéndyr;

¹⁴i janéna léstyr dro janybén, dro svénto dyibén Ráske-Devléske čekén, savó učhakiréla andratuné masá,

¹⁵i duj bukore (počki) i čekén (túko), savó isyn pe lénde, savó isyn pe stjogny, i sal'niko, savó isyn pe kaló buko (piečonka); bukorenca (počkenca) jov otkedela davá;

¹⁶i shačkiréla len rašáj pe altárjo: davá isyn jagakiro maró, gudló thuv, Ráske-Devléske; a saró čekén Ráske-Devléske.

¹⁷Davá isyn uphenybén viéčno dre tumaré ródy, dre saré tumaré kherá; ni savó čekén (túko), i ni savó rat te na xan.