Read Biblija - Pe Baltitko Romani čib (Romanes) 2019 Baltic Romani Bible Lievito 5 Bible Online

Lievito 5 - Biblija - Pe Baltitko Romani čib (Romanes) 2019 Baltic Romani Bible bible

Lievito 5

¹Kóli vari-kon keréla grého dolesa, so šundiá prokošybnaskiri zan i sys jakhítko, ci dykhciá ci džindiá, ne na phendiá davá, tedy jov lydžála pe péste grého.

²Ci, kóli vari-kon čilavelape ke vari-so nažužo, ci ke nažužé riskiribnáskire murdaleskiro (zvierjoskiro) trúpo, ci ke nažužé kheritkoné murdaleskiro (skotoskiro) trúpo, ci ke nažužé-ĥadoskiro trúpo, ne jov na džindiá davá, tedy jov isyn nažužo i javéla bangó.

³Ci kóli jov čilavelape ke manušéskiro nažužypen (načystota), savó te na javél davá nažužypen, savéstyr magirenape, i jov na džindiá davá, ne korigedýr (pozžedýr) jov udžinela, tedy jov javéla bangó.

⁴Ci, kóli vari-kon, na poduminy péskire ušténca, sovlahadiá te kerél vari-so nálačho ci lačhó, savó b te na javél davá réndo (diélo), dre savó na duminy manušá sovlahana, i jov na džindiá davá, ne korigedýr udžinela, tedy jov dro davá javéla bangó.

⁵Kóli jov isyn bangó dro vari-so daléstyr, i pridžindia bang, dre so jov kerdiá grého,

⁶tedy mek te janel Ráske-Devléske pal péskiro grého, savó jov kerdiá, svénto dyibén sýrby pal bang tykné kheritkoné murdaléndyr (skotóstyr), bakriá ci buznia, pal grého, i vyžužakiréla les rašáj léskire grehostyr.

⁷Kóli jov na moginéla te janel bakriá, tedy dre bang pal péskiro grého, mek te janel Ráske-Devléske dujén gorlicen ci dujén ternen golumben, jekhés dro svénto dyibén pal grého, a javirés dro célo shačkiribén;

⁸mek te janel len ke rašái, i rašáj te janel angledýr doiá dalé čirikliendyr, saví te javél pal grého i otriskirela láke šeró meniatyr lakirjatyr, ne te na otkedel;

⁹i pobryzginela dalé-žertvakire ratésa pal grého pe altarjoskiri vánta, a palatunó rat, savó jačélape, vytasavela ke altarjoskire ĥerá: davá isyn svénto dyibén pal grého;

¹⁰a javirja mekéla dro célo shačkiribén pir uphenybén; i adiáke vyžužakiréla les rašáj léskire grehostyr, savó jov kerdiá, i otmekno léske javéla.

¹¹Kóli jov na moginéla te janel dujén gorlicen ci dujén terné golumben, mek te janel pal davá, so kerdiá grého, déšto paš (efa) dre svénto dyibén pal grého; mek te na čhuvél pe láte jeliejo, i livano, mek te na čhuvél pe láte, pal-dová so davá isyn pal grého;

¹²i janéla les ke rašái, a rašáj látyr léla pherdý burnyk (žmienia) dro ripiribén, i shačkiréla pe altárjo dro davá svénto dyibén Ráske-Devléske: davá isyn svénto dyibén pal grého;

¹³i adiáke vyžužakiréla les rašáj léskire grehostyr, savó jov kerdiá dro vari-so dalé vakancyiendyr (slučajendyr), i otmekno léske javéla; a so jačélape, dová javéla rašáske, syr marunó janybén.

¹⁴I phendiá Raj Devél Mojzáske dasavé lavá:

¹⁵“Kóli vari-kon keréla čoripén i pir nadžinyben keréla grého proti dová priedmieto, so sys obsvencyndlo Ráske-Devléske, mek pal péskiri bang jov te janel Ráske-Devléske bakréngire stadatyr bakrés bidošengires, pir tyrí timín, rupuvé šekielienca pir šékieljo sventoneskiro, dro svénto dyibén (žértva) pal čoripén;

¹⁶pal doiá sventyma, proti saví jov kerdiá grého, mek jov te otdél i te dočhuvel ke dová pándžto paš (dólia), i te otdél la rašáske, i rašáj vyžužakiréla les bakreskire janybnasa pal čoripén, i otmekno léske javéla.

¹⁷Kóli vari-kon keréla grého i keréla vari-so proti Ráskire-Devléskire priphenybená, so na treindiá te kerél, i pir nadžinyben kerélape bangesa i lydžála pe péste grého,

¹⁸mek te janel ke rašáj dro svénto dyibén pal čoripén bakrés bidošengires, pir tyrí timín i vyžužakiréla rašáj tyré čoripnástyr, so jov kerdiá pir nadžinyben, i otmekno léske javéla.

¹⁹Ake, isyn svénto dyibén pal bang, savó jov kerdiá angíl Raste-Devléste.”