Read Biblija - Pe Baltitko Romani čib (Romanes) 2019 Baltic Romani Bible Lievito 7 Bible Online

Lievito 7 - Biblija - Pe Baltitko Romani čib (Romanes) 2019 Baltic Romani Bible bible

Lievito 7

¹Ĥáda, isyn Zakóno pal svénto dyibén pal grého: davá isyn bari sventyma;

²svénto dyibén pal grého trej te začhinen pe dová štéto, kaj začhinena célo shačkiribén, i lákire ratésa trej te bryzgines pe altárjo saré rigéndyr;

³kon janéla, odoléske trej te sykavél látyr saró čekén (túko), kurdiuko i čekén (túko), savó učhakiréla andratuné masá,

⁴i duj bukore (počki) i čekén (túko), savó isyn pe lénde, savó isyn pe stjogny, i sal'niko, savó isyn pe kaló buko (piečonka); bukorenca (počkenca) mek jov te roskedel davá;

⁵i shačkiréla davá rašáj pe altárjo pal grého Ráske-Devléske: ake, isyn svénto dyibén pal grého.

⁶Saré rašaskire-rodoskire muršá saštý (moginéna) te xan les; pe svénto štéto trej te xan les: davá isyn bari sventyma.

⁷Syr pal grehoskiro svénto dyibén, adiáke i pal svénto dyibén pal čoripén Zakóno isyn jekh: jov otlydžalape rašáske, savó žužakirela lésa.

⁸I kiéli rašáj ianéla vari-konéskiro svénto dyibén celoné shačkiribnaskiro, a cýpa celoné-shačkiribnaskire sventoné dyibnástyr, saví jov janéla, otlydžalape rašáske;

⁹i kažno marunó janybén, savó isyn pekno dro bov, i kažno kerado dre pirí ci pe skorovieda (xič), otlydžalape rašáske, savéske janéna les;

¹⁰i kažno marunó janybén, savó isyn pirimiešyndlo jeliejosa i isyn šuko, otlydžalape saré Aaronóskire čhavénge, syr jekhéske, adiáke i javireske.

¹¹Ĥáda, isyn Zakóno pal mírno (ramanjono) svénto dyibén, savó janéna Ráske-Devléske:

¹²kóli vari-kon dro parikiriben les janéla, tedy khetané parikibnaskire sventoné dyibnasa léske trej te janel priesna maré, pirimiešyndle jeliejosa, i priesna mariklia, pomakhne jeliejosa, i jaržó parné givestyr, počhudo jeliejosa, maré, pirimiešyndle jeliejosa;

¹³apríč mariklia mek jov te janel dre péskiro janybén kvašeno maró, khetané parikiribnaskire mirnone sventoné janybnasa;

¹⁴iekh vari-so saré janybnastyr peskirestyr, mek te janel jov dro ĥazdypen Ráske-Devléske: davá otlydžalape rašáske, savó bryzginela mirnone-žertvakire (ramanjone-sventoné dyibnaskire) ratésa;

¹⁵a mas ramanjone-sventoné dyibnástyr dro parikiriben trej te xan dro léskiro janybnytko dyvés, naštý te jačkirel léstyr ke ránko (ke zlóko).

¹⁶Kóli vari-kon janéla svénto dyibén pir sovláh ci iléstyr, tedy léskiro svénto dyibén trej te xan dro janybnytko dyvés, i pe javír dyvés, so jačélape léstyr, les saštý te xan,

¹⁷a so jačélape altarjostyr, mas, ke tríto dyvés trej te shačkiren pe jag;

¹⁸kóli javéna te xan mas mirnone-žertvakiro pe tríto dyvés, tedy jov na javéla lačhó; kon la janéla, odoléske ni dre so na zaginelape: davá isyn magiripén, i kon javéla les te xal, odová lydžála pe péste grého;

¹⁹davá mas, kóli jov pričilavelape ke vari-so, so isyn nažužo, naštý te xan, ne trej te shačkiren les pe jag; a mas žužó moginéla te xas kažno žužó manúš;

²⁰kóli vari-savó di, konéste isyn pe péste nažužypen, javéla te xal mas mirnone-žertvatyr Ráskire-Devléskire, tedy xasjola dová di péskire manušéndyr;

²¹i kóli vari-savó di, kon pričilavela ke vari-so nažužo, ke nažužypen Manušéskiro, ci ke nažužo kherítko murdál (ke skoto), ci ke vari-savó nažužo ĥado (polzuno), javéla te xal mas mirnone Ráskire-Devléskire sventoné dyibnástyr, tedy xasjola dová di péskire manušéndyr.’”

²²I phendiá Raj Devél Mojzáske, rakirí:

²³“Phen Izrailjoskire čhavénge: nisavó čekén (túko) ni guruvestyr, ni bakriatyr, ni buznestyr (kozlostyr) te na xan.

²⁴Čekén mulestyr i čekén, savó roskustia riskiribnáskiro murdál (zvierjo), saštý te mekén pe kažno réndo; a vaš xabén, na xan les;

²⁵pal-dová so, kon javéla te xal čekén kheritkoné murdalestyr, savó janelape dro svénto dyibén Ráske-Devléske, to xasjola dová di péskire manušéndyr;

²⁶i nisavó rat na xan dre saré tumaré kherá ni čirikliendyr, ni kheritkoné murdalestyr;

²⁷a kon javéla te xal vari-savó rat, xasjola dová di péskire manušéndyr.”

²⁸I phendiá Raj Devél Mojzáske dasavé lavá:

²⁹“Phen Izrailjoskire čhavénge: kon janéla péskiro mírno svénto dyibén Ráske-Devléske, odová mirnone sventoné dyibnástyr paš trej te janel dro janybén Ráske-Devléske;

³⁰péskire vasténca isyn bangó jov te janel dro svénto dyibén Ráske-Devléske: čekén kolynesa isyn bangó jov te janel, sob (kaj) jov te trinskirel kolynesa angíl Raste-Devléste;

³¹a čekén shačkiréla rašáj pe altárjo, a kolýn otlydžalape Aaronóske i léskire čhavénge;

³²i čačó (pravo) psikó, syr ĥazdypen, mirnone tumaré sventoné dyibnendyr žertvendyr otdén rašáske;

³³kon Aaronóskire čhavéndyr janéla rat mirnone žertvatyr i čekén (túko), odoléske i čačó (pravo) psikó pe dólia;

³⁴pal-dová so Me láva Izrailjoskire čhavéndyr mirnone sventoné dyibnendyr léngiro kolýn trinskiribnaskiro i psikó ĥazdypnaskiro, i Me otdáva len Aaronóske rašáske i léskire čhavénge syr viéčno paš Izrailjoskire čhavéndyr.

³⁵Ĥáda, isyn paš Aaronóske i paš léskire čhavénge Ráskire-Devléskire žertvendyr pe jag dyveséstyr, kiéli jone javéna angíl Raste-Devléste vaš svénto butý,

³⁶savó phendiá Raj Devél te del lénge dyveséstyr léngire makhibnastyr Izrailjoskire čhavéndyr. Davá isyn viéčno uphenybén dre léngire ródy.

³⁷Ĥáda, isyn Zakóno pal célo shačkiribén, pal marunó janybén, pal svénto dyibén paló grého, pal svénto dyibén pal čoripén, pal svénto dyibén vysvenciakiribnaskiro i pal mírno svénto dyibén,

³⁸savó dyjá Raj Devél Mojzáske pe Sinajoskiri bérga, kiéli phendiá Izrailjoskire čhavénge, pe Sinajoskiri čhučí phuv, te janén Ráske-Devléske léngiro janybén.”