Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 1 Bible Online

Jeriemiéjo 1 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 1

¹Dalé isyn Jeriemiejoskire[1] lavá, kon sys Xielkiinoskiro [Hilkijaskiro-ju.o.] čhavó, rašángire rodóstyr, savé sys dre Anafofa pe Vieniaminoskiri phuv.

²Léske bičhadiá Raj Devél Péskiro lav, dre dyvesá Iosijaskire (Josijaskire), kon sys Judejákiro králi dro dešutrito berš, syr jov sys králi.

³Raj Devél adiáke-pac' bičhadiá Léskiro lav dre dyvesá Ioakimoskire (Jakimoskire), kon sys Josijakiro čhavó i Judejákiro králi ke/ žýko/ dešupervo berš, syr Sedekíia, Josijaskiro čhavó sys králi pir Judéia angíl dová, syr dro pándžto čhon Jerusalimóskire manušén lydžiné dro pliéno.

⁴I sys ke me, Jeriemiejoske, lav Rástyr-Devléstyr i phendiá:

⁵“Angíl dová, syr Me sozdyjom tut dre dákire masá, Me vykedyjom tut. Angíl dová, syr tu javdián pe svéto, Me vysvencyndjom tut. I Me čhudjom tut syr prorokós vaš Najudénge.”

⁶Tedy phendjom me: “Ah! Dévla! Rajo Dévla! Dykh, me na džinóm te rakiráv, pal-dová so me som bijáto.”

⁷Ne Raj Devél phendiá mánge: “Na rákir: ‘Me som bijáto’; — pal-dová so tu džása ke saré, ke kon Me bičhaváva tut, i so Me priphenava túke, dová tu phenésa.

⁸Na dar léndyr, pal-dová so Me som túsa te rakhav tut”, — phendiá Raj Devél.

⁹I tén'či ĥazdyjá angíl Raj Devél Léskiro vast i čiladiá miro muj. I phendiá Raj Devél mánge: “Ake, me čhuváva Miré lavá dro tyró muj.

¹⁰Dykh! Me čhudjom tut adadyvés syr barydyrés pe manušýtka nácyi i pe kralipená: te riskires krig korniénca (rukhénca), te phagires ke phuv, te rozmares pe koterá, i te čhurdes telé; te ĥazdes kherá, i te počhuves giv dre phuv.”

¹¹I iščo (inké) sys ke me Ráskire-Devléskiro lav, i phendiá: “Jeriemiéjo, so dykhésa tu?” I me phendjom: “Me dykháva rand' (vetka) mindalitkone drevostyr (kaštéstyr).”

¹²Tedy phendiá Raj Devél mánge: “Tu mištés dykhésa. Me rakhava, sob (kaj) miro lav te kerélpe (spolninélpe) dro čačipén.”

¹³I sys ke me Ráskire-Devléskiro lav javír mólo, i phendiá: “So dykhésa tu?” Me otphendjom: “Me dykháva kakávi (kotlo), so keradjola, i so sýrby risjola pe paš-ratiakiri (sievierno) rig.

¹⁴Tén'ci phendiá Raj Devél mánge: “Paš-ratiakire rigátyr javéla bída, pe saré manušénde pe phuv.”

¹⁵Pal-dová so, ake, Me kharáva te javén saré sem'i (irjá), savé isyn dre kralipená pe paš-ratiakiri rig, — phendiá Raj Devél, — i jone javéna te čhuvén kažno (sváko) péskiro trono angíl Jerusalimóskiri pórta, i mamúj saré vánty, so isyn trusciál (krugom), i mamúj saré fórja, so isyn dre Judéia.

¹⁶I Me vyphenava Miro pharó-sendiakiriben pe lénde pal saró léngiro fuipén, pal-dová so jone jačkirdé Man, i jone thuvliakirde dróga smóly javire devlororenge, i jone dyné patýv idolénge, so kerdé léngire vastá.

¹⁷Paldavá, jav skedynó i uštý, i phen lénge saró, so Me priphenava túke. Na zamer darátyr léngire mujendyr, sob (kaj) Me te na zaphagirav tyró dúho (fáno) angíl lénde.

¹⁸Pal-dová so Me, ake, kerdjom tútyr sýrby zoraliakirdo fóro, sýrby sastruno stýlbo, sýrby bronzytka vánty proti sarí phuv, proti Judejákire kral'jénde, proti thagar'jende, proti rašande, proti kadalé phuvjákire manušénde.

¹⁹I jone javéna te marénpe túsa, ne jone na pirizor'kirena tut, pal-dová so Me som túsa, — phendiá Raj Devél, — sob (kaj) te rakhav tut.”