Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 10 Bible Online

Jeriemiéjo 10 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 10

¹Šunén lav, savó Raj Devél rakiréla túke, Izrailjoskiro kher.

²Adiáke rakiréla Raj Devél: “Na sykljon dromenge, savénca Najudýtka nácyi psiréna, i na zameren darátyr dykhí pe bolybnýtka ĥiertyká (znamiénii), sóstyr zamerena Najudýtka nácyi.

³Pal-dová so dalé manušýtka statúty nisó nane mol. Ake, jekh manúš vyčingirela kašt dro veš, skamindariskire vastá obkerena les toveresa.

⁴Jone gožakirena les suvnakása i rupésa, jone prikerena les gvozdenca (karfinenca) i čokanenca (mlotkenca), sob (kaj) jov te na rosphadjol pe koterá.

⁵Dalé ídoly isyn sýrby vyčhindlo stýlbo pe félda, jone na rakiréna, len lydžána, pal-dová so jone na psiréna. Na dar léndyr, pal-dová so jone na moginéna te kerén vari-saví bibáht (čoripén), adiáke-pac' jone na keréna ni savó lačhipén.”

⁶Nane nijékh, kon isyn kadasavó, savó Tu san, Rajo Dévla! Tu san baró i Tyró lav isyn baró pir Tyró zoralypén.

⁷Ci isyn vari-kon, savó na daréla Tútyr, manušéngire Kralístyr? Pal-dová so čačipén isyn dro dová, sob (kaj) te darén Tútyr; pal-dová so maškír saré godé manušénde dre manušýtka nácyi, i saré léngire kralipená nane nijékh, savó te javél kadasavó, syr Tu san, Rajo Dévla!

⁸Jone isyn so ke jekh bigodiakire i dylynin'ka, léngiro sykliakiribén isyn čhučó, sob (kaj) te den patýv kaštenge.

⁹Rup, savéstyr isyn čikade čaré, jandlé Taršynostyr, suvnakáj Ufazostyr, saré jone isyn butiá mastieroskire pir suvnakái: golubovo i purpurno uribén isyn pe kadalé ídoly: jone isyn džindlé-manušéngire butiá.

¹⁰Ne Raj Devél isyn čačunó Devél: Jov isyn džidó Devél i Králi pe saré viéki. Léskire xoliátyr izdrala phuv i manušýtka nácyi na déna ráda te vyrikiren, syr Jov xoliasóla zoralés.

¹¹Tumé, manušále, phenén lénge: “Devloré, so tuménde isyn, na kerdé bolybén i phuv, jone xasjona phuvjátyr i tel bolybnástyr.”

¹²Jov sozdyjá phuv Péskire zorjása, i Jov čhudiá svéto Péskire godypnasa, i Jov rozdin'd'kirdia (rostyrdyja) bolybén Péskire godiása.

¹³Kiéli Jov phenéla Péskire zaniása, tedy pe bolybén šuminena paniá: i Jov keréla adiáke, so óbloki paniésa ĥazdénape jagorendyr pe phuv; jov keréla bliskavícy maškír bryšýnd, i jov lydžála angíl balvál Léskire kučoné-piral'jendyr.

¹⁴Kažno manúš jačéla buro [dylynó-r.s.] bidžinybnaskiro, kažno suvnakengiro mastiero javéla ladžakirdó vyčhudé idolostyr, pal-dová so davá bilado idolo isyn xohanó, i nane dúho (fáno) dre léste.

¹⁵Saró davá isyn čhučipen (pustota), butý pe saben, jone xasjona, kiéli Raj Devél javéla te sendiakirél.

¹⁶Jakovoskiri dólia nane kadasavi syr léngiri, pal-dová, so Jov, Kon sozdyjá saró, i Kon vykedyjá Izrailjo syr Léskiro mištypén, isyn bolybnáskire-jangoléngiro Raj Devél i davá isyn Léskiro lav.

¹⁷Keden krig péskire klunki phuvjátyr, konés vérgi obkrenžyndle (zauhtylde) dro Jerusalimo.

¹⁸Adiáke rakiréla Raj Devél: “Ake, Me čhurdava manušén dro davá uliago (pora), savé dživéna pe daja phuv, i lénge javéla bari traš (dar), sob (kaj) te uhtylén (lathén) len.

¹⁹Bida mánge, pal-dová so bibáht dukhavela man, miro (fránso/rana) isyn dukhano. Ne me, Jeriemiéjo, phendjom péske: “Kuč, miro iló pharjola, i me vyrikirava davá.

²⁰Mirí šátra isyn zarady, i saré miré šele isyn roskušne. Miré čhavoré giné dur mándyr, i jone adáj butýr nane. Nane nijékh, sob (kaj) nevéstyr te rozdin'd'kirel (rosčhuvel) mirí šátra, i te prikerel pologi.

²¹Pal-dová so čhupnárja [pastyri-r.s.] jačné pharé-ilytka, i jone na rodyne Ras-Devlés, paldavá jone na kerdé godes, i saró léngiro ĥurto isyn rosčhurdyno.

²²Šunén zan, saví dyjá zvies': “Ake, džála baró ĥlumo godlenca paš-ratitkoné (sieviernone) rigátyr, sob (kaj) te čhučakirel fórja dre Judéia, i te kerél adiáke, sob (kaj) odój šakaly te dživén.

²³Me džinóm, Rajo Devlale, so manúš na déla ráda te xulainél péskire sud'basa (džiibnasa), i nane kadasavó manúš, savó psiréla i savó rikiréla zor pe dová, karik ĥerá lydžána les.

²⁴Rajo Dévla, pirisykliakir man ke dukhá pir čačipén, ne na pir Péskiro xoliakiribén, sob (kaj) te na javél saró mánge.

²⁵Vyčhuv Péskiro xoliakiribén pe Najudytkoné manušénde, savé na džinéna Tut, i pe ródy, savé na prikharena Tyró lav; pal-dová so jone xasiakirdé Jakovós, jone dukhade les, i jone domardé les. Jone kerdé léskire kheréstyr čhučó štéto.