Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 13 Bible Online

Jeriemiéjo 13 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 13

¹Adiáke phendiá mánge Raj Devél: “Džá i kin péske kustýk ĥandladestyr (ljonostyr), i pričhúv la pašýl péskiro trušúl (masá); ne na bol la dre paní.

²I me, Jeriemiéjo, kindjom dasaví kustýk pir Ráskire-Devléskiro lav i pričhudjom la pašýl péskiro trušúl.

³I javdiá ke me Ráskire-Devléskiro lav javír mólo, i phendiá:

⁴“Le kustýk, so tu kindian, saví isyn pe tyró trušúl, ĥazdepe i džá ke Jefrato i garav kustýk odój dre xoripén maškír skaly.”

⁵Adiáke me gijom i garadjom pašýl Jefrato [Jevfrato-r.s.], syr Raj Devél priphendiá mánge.

⁶I sys adiáke, syr proginé (nakhle) but dyvesá, to Raj Devél phendiá mánge: “Ĥazdepe (uštý) i džá ke Jevfrato, i le odothýr kustýk, saví Me priphendjom te garaves túke odój.

⁷Tén'ci me gijom ke Jevfrato i ĥanadjom, i me vylyjom kustýk dolé štetóstyr, kaj me garadjom la; i, ĥáda, kustýk jaciá nalačhi. Látyr na sys uže ni savó lačhipén.

⁸I javdiá ke me Ráskire-Devléskiro lav, i phendiá:

⁹“Adiáke phendiá Raj Devél: ‘Pir dová Me xasiakiráva Judejákiro phut'kiribén, i adiáke-pac' Jerusalimoskiro zoraló (baró) phut'kiribén.

¹⁰Kadalé bibahtalé manušá otphendlepe te šunén Miré lavá, jone dživéna pir péskire pharé ile, i jone psiréna te kerén patýv javire devlorénge i te dynarinén lénge, i lénca javéla dová, so kerdiápe dalé kustykasa.

¹¹Pal-dová so syr kustýk uhtylelape zoralés (isyn paštó) ke pe manušéskiro trušúl, adiáke-pac' Me kerdjom, sob (kaj) saró Izrailjoskiro kher i saró Judejákiro kher te uhtylenpe zoralés ke Me, sob (kaj) jone moginénas te javél Miré manušá, Miro lav te šarén i te barjakirén Man; ne jone na šundlé.

¹²“I tu, Jeriemiéjo, phen lénge davá lav: ‘Adiáke rakiréla Raj Devél, Devél Izrailjoskiro: ‘Kažno gonó pherdiakirena moliasa (vinosa).’’ Jone phenéna túke: ‘Ci ame na džinása, so kažno gonó pherdiakirena moliasa’?

¹³Ne tu phenésa lénge: ‘Adiáke rakiréla Raj Devél: “Ake Me matiakirava saré manušén, kon dživéla pe kodoia phuv, i kral'jén, savé isyn bešté pe Davidóskiro trono, i rašán, i saré prorokén, i saré manušén, kon dživéla ke Jerusalimo.

¹⁴I Me čikavava (pekavava) len jekh pir jekhéste, syr daden, adiáke-pac' i čhavén khetané, — rakiréla Raj Devél, — i Me na javáva lačhé-iléskiro ke jone, i Me na javáva te tanginav (te žalinav) len, i Mándyr na javéla tangipén (láska) lénge, a Me xasiakiráva len.’”

¹⁵Šunén tumé, i pričhuvén kan, na phutjon (na barjakirén pes), pal-dová so adiáke phendiá Raj Devél.

¹⁶Barjakirén (slavinén) Ras-Devlés, tumaré Devlés, angíl dová, syr Jov janéla kalypén (cjomnyma), i angíl dová, syr tumaré ĥerá obštavenape (obstempinenape) pir bérgi dre paš-kalypén! I tumé javéna te rodén dud (svéto), ne Jov riskiréla les dre meribnytko zer (tien'), i Jov pirikerela les dre xor kalypén.

¹⁷Ne kóli tumé na javéna te kandén davá, to tedy me, Jeriemiéjo, javáva te rovav dre garadé štéty pal tumaró phut'kiribén, i miré jakhá javéna te rovén kirkes, pal-dová so Ráskire-Devléskiro ĥurto lydžino krig dre navolia (pliéno).

¹⁸‘Na javén phut'kirdé, bešén teledýr; pal-dová so pyjá kralítko stadyk tumaré slavatyr, saví sys pe tumaré šeré’, — phendiá Raj Devél te phenáv kralíske i kralískire dáke.

¹⁹Fórja pe paš-dyvesýtko (južno) rig javéna zaphandle i na javéla nikón te psiravel (otphandel) len; sarí Judéia lydžána krig dro pliéno, saré Judejákire manušén zalydžana dro pliéno.

²⁰Ĥazden tumaré jakhá i dykhén, so džála pe tuménde paš-ratitkoné (sieviernone) rigátyr. Kaj tyró ĥurto, šukár ĥurto, savó sys dynó túke?

²¹So tumé phenéna, kiéli Raj Devél javéla ke tumé, pir-dová so tumé sykliakirdé len, sob (kaj) jone te javén šeralé thagárja pe tuménde? Ci na uhtylena (nádosi) tut dukhane tugi sýrby džuvliá, saví isyn bangi te bijanél?

²²I kóli tumé phučena (phenéna) dro péskiro iló: ‘Sóske davá saró pyjá pe mánde?’ Pal tumaró baró čoripén, savé otčhakirde tumaré ídi pe ladž, i pal dová, so tyré khurja (piénty) jačné nange?

²³Ci moginéla (saštý) Efiopo te paruvel péskiri cýpa, ci saštý lieopardo te paruvel péskire piet'my (piatny)? Tedy, ci moginéna tumé adiáke-pac' te kerén lačhipén, savé prisyklyne te kerén bibáht?

²⁴‘Paldavá Me rosčhurdava len sýrby phusakire tietivy [práho-r.s.], savé rozlydžala balvál čhučé prahendyr’, — rakiréla Raj Devél.

²⁵Davá isyn tumarí dólia, bažyn, saví Me vykedyjom (dyjom) tuménge, pal-dová so tumé bistyrde Man i zoralés dopatiandyne dro xohaibén.

²⁶Paldavá Me adiáke-pac' riskiráva tumaré truiunia (podi) pe muj, i tumarí ladž javéla bicialy.

²⁷Me dykhcjom tumaró biladžaipén, i dová, syr tumé grymitindle, syr tumé tradenaspe pal čužoné devlorende pe bérgicy i pe féldy, dolé džungalé réndy. Bida pe tuménde, manušá Izrailjostyr! Naúšto tumé na javéna žužé? Ci ĥará tumé iščo (inké) adiáke javéna?’”