Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 14 Bible Online

Jeriemiéjo 14 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 14

¹Ráskire-Devléskiro lav, savó javdiá ke Jeriemiéjo pal baró šukipen:

²“Judéia tuginela zoralés, i lákiri pórta rospyjape, joj kalyja ke phuv; i Jerusalimóskiri gódla ĥazdyjápe.

³Léngire lačhé-rodoskire raja [upratune-r.s.] bičhavena péskire kheritkoné dynar'jén pal paní: jone džána ke panitka ĥanbiniá, ne jone na lathéna paní; jone risjona pale čhučé pir'jénca: jone isyn ladžakirdé, jone isyn zaphagirde dre godý, i jone učhakirde péskire šeré.

⁴Pal-dová so phuv pharadyja, syr na sys bryšýnd pe phuv, phuvjavire-butiarné isyn ladžakirdé, jone učhakirde péskire šeré.

⁵Pal-dová so mirga (lan') adiáke-pac' bijanéla pe félda, i joj mekéla péskire tyknen, pal-dová so nane čar.

⁶I busa (dika) osly (miegárja) isyn terdé pe vučé štéty, jone sungena balvál syr šakaly: léngire jakhá pyné (kalyne), pal-dová so nane čar.

⁷‘Rajo Dévla! Mek amaró čoripén te dophenel pe aménde, ker vari-so Tyré lavéstyr; pal-dová so ame but otpyjam Tútyr — ame kerdiám gréhi proti Túte.

⁸O, Tu san odová, Konéstyr Izrailjo užakiréla lačhipén [zrakhibén-r.s.], Tu san amaró Zrakhibnari (Zrakhibnaskiro) dre pharé dyvesá! Sóske Tu san sýrby čúžo manúš pe amarí phuv, ci sýrby tradypnaskiro (putniko), savó risijá pe rig, sob (kaj) te jačélpe pe jekh rat?

⁹Sóske Tu san sýrby manúš, savó divinelape trašasa, sýrby zoraló murš, savó naštý (na moginéla) te zrakhél? Ne Tu, Rajo-Dévla, san maškír aménde, i ame kharasa Tyró lav: na mek amen.’

¹⁰Adiáke phendiá Raj Devél pal kadalé manušénde: “Jone adiáke pokamle te psirén, so jone na obrikirenas péskire ĥerá; i Raj Devél na radynélape léndyr: Jov ripirela léngiro čoripén i Jov javéla te sendiakirél len pal léngire gréhi.”

¹¹I Raj Devél phendiá mánge: “Na mangpe Mánge pal kadalé manušénde vaš léngiro lačhipén.

¹²Kiéli jone javéna te postynen, Me na javáva te šunav léngiri gódla; i kiéli jone janéna céla xačkiribena, i svénta dyibená givestyr, Me na prilava len: pal-dová so Me xasiakiráva len kurtalása, baré bokhasa i fransenca.”

¹³Ne me phendjom: “O, Rajo Dévla, Devlale! Ĥáda, proróki rakiréna lénge: ‘Tumé na dykhéna kurtála, ni bari bokh, pal-dová so Tu désa čačunó ramánjo pe davá štéto.

¹⁴I phendiá Raj Devél mánge: “Proróki angilphenena xohaibén Miré lavéstyr; Me na bičhadjom len, i Me na priphendjom lénge, i Me na phendjom lénge: jone angilphenena tuménge xohanó dykhibén (sunyben), i čhučé čary; dová, so na mol ničý, i xohaibén, so džála léngire ilendyr.

¹⁵Paldavá adiáke rakiréla Raj Devél pal prorokénde, savé angilphenena Léskire lavéstyr, savén Jov na bičhadiá, i savé rakirna: ‘Kurtála i bari bokh na javéna pe kadaja phuv’: Kadalé proróki xasjona kurtalátyr i baré bokhátyr!

¹⁶I manušá, konéske jone javéna te angilphenen, javéna čhurdyné javrí pe Jerusalimóskire vulícy (gásy), pal-dová so javéla bari bokh i kurtála; i odój na javéla nikón te garavel len, ci léngire romnién, ci léngire čhavén, ci léngire čhajén, i Me vyčhuvava léngiro fuipén pe lénde.

¹⁷I tu, Jeriemiéjo, phenésa davá lav lénge: mek te thaden jasva Miré jakhéndyr rat i dyvés, i jone na pirijačena, pal-dová so patyvalý terný džuvlý, Miré-manušéngiri čhaj, isyn zoralés dukhady pharé pekaibnasa.

¹⁸Kóli Me džáva pe félda, ake, isyn pašté manušá, savén kurtála muliakirdiá! I kóli Me džáva andré fóro, ake, isyn manušá, savé našavena zor ke meribén baré bokhátyr! Pal-dová so dujdžiné: i proróko, i rašáj psiréna pir phuv, so jone kokoré na džinéna palsó.’”

¹⁹Rajo Dévla! Ci sarésa Tu otphendiampe Judejátyr? Ci Tyré dieske jaciá džungaló Sionóstyr? Sóske Tu adiáke pekadian amen, so nane sastiakiriben aménge? Ame rodasa ramánjo, ne nane lačhipén, časo te sastiakiraspe, i, ake, jekh trašaibén (dar).

²⁰Rajo Dévla! Ame pridžinasa amaró fuipén, i čoripén, so kerdé amaré dadá; pal-dová so ame kerdiám grého proti Túte.

²¹Na durjov améndyr vaš Tyró lav, na tykniakir patýv Tyré-slavakire tronoske, Jerusalimoske, rípir Péskiro zavieto, so Tu dyján aménge i na phagir les.

²²Ci isyn maškír Najudýtka ídoly odolé, savé déna bryšýnd? Ci moginéla (saštý) kokoró bolybén te del baré paningá? Ci davá nane Raj Devél, amaró Devél? Paldavá ame javása te užakiras Tut, pal-dová so Tu kerdián saró davá.