Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 15 Bible Online

Jeriemiéjo 15 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 15

¹I phendiá Raj Devél mánge: “Mek Mójza i Samuílo te terdjon angíl Mánde, ne Miro di na risjola ke adalé manušá. Bičháv len krig Miré jakhéndyr, i mek jone te džán péske.

²I javéla adiáke: kóli jone phenéna túke: ‘Karik aménge te džas?’, tedy tu phenésa lénge: ‘Adiáke rakiréla Raj Devél: ‘Kon isyn prisendindlo pe meribén — džá pe meribén, kon isyn prisendindlo pe kurtála — pe kurtála, konéske prisendindlo bari bokh — bari bokh, konéske prisendindlo pliéno — dro pliéno.

³Me javáva ke jone i Me dáva lénge štar rázna kary’ — rakiréla Raj Devél: Kurtála te muliakirél, džukela te riskirén, bolybnýtka čirikliá, i riskiribnáskire murdalá (zvieri) pe phuv, te pohan i te xasiakirén.

⁴I Me otdáva len, sob (kaj) saré kralipená pe phuv te tradén len odorík i pale pal Manasijaste, Jezekijaskire čhavéste, pal-dová so jov kerdiá dro Jerusalimo.

⁵Pal-dová so, kon potanginela tut, Jerusalimo? Kon sykavéla lačhé-ilýtkima túke? Kon zadžála ke tu te phučes, syr tu san?

⁶Tyré manušá mekné Man!’, — rakiréla Raj Devél, — tumé dynepe pale. Paldavá Me protyrdava (ĥazdáva) Péskiro vast pe tuménde, i Me xasiakiráva tumen: Me khinyjom te otmekav (te prostinav) tuménge.

⁷I Me rosčhurdava len viejelosa (baré lopatasa) pal pórty pe phuv; i Me láva krig sarésa léngire čhavorén, i Me xasiakiráva Miré manušén: pal-dová so jone na risjona péskire dromendyr.

⁸Mánde javéla léngire pivlien (udoven) butýr syr práho dro mórjo (derjáv): Me janáva pe lénde pe terné-manušéngire date praharis — čores dro paš-dyvés: Me keráva adiáke, so jekhátyr ilytko dukh i trašaibén (dar) peréna pe lénde.

⁹E daj, saví bijandiá eftá tyknen, joj vyphurdyja palatunó dúho (fáno); lákiro kham gijá telé, mek davá iščo (inké) isyn dyvés; joj isyn ladžakirdy i zaphagirdy dre godý. I kon jačélape, kodolén Me piridava kurtalake angíl léngire vergénde’, — phendiá Raj Devél.

¹⁰Bida mánge, Jeriemiejoske, mirí daj, so tu bijandian man te košavpe, i te čingardavpe saré phuvjása! Me na dyjom nikonéske lové tel kófo, i jone adiáke-pac' na dyné mánge tel kófo, ne kažno (sváko) léndyr prokošela man (keréla armania pe mánde).

¹¹Raj Devél phendiá: “Čačipnása Me mekava pe vólia tut vaš lačhipén, čačipnása Me keráva adiáke, so vérgo javéla te mangél tut dro bibahtaló časo i tedy, kiéli javéna te tradén tut.

¹²Ci moginéla (saštý) vari-kon te phagirel sastýr, paš-ratítko (sievierno) sastýr i xarkóma (mied') [pirdo (bronza)-ju.o.]?

¹³Saró tyró mištypén i saré tyré kučipena Me otdáva te čoren bilovengiro pal Tyré gréhi, so kerdián pir saré tyré phuvjá ke kustyka (granicy);

¹⁴i Me keráva adiáke, so tu džása péskire vergenca pe phuv, saví tu na džinésa: pal-dová so Mirí xolý xačola syr jag: joj iavéla te xačol pe tuménde.”

¹⁵Tén'ci Me phendjom: “Rajo Dévla! Tu džinésa saró: rípir man i pode vast mánge, otdé pale xolynasa odolénge, savé tradéna man: na zakede man krig pir Tyrí baró vyrikiriben (tiérpima): džin, so Me lydžáva ladž pe péste pal Túte.

¹⁶Tyré lavá lathné miro iló, i me xajom len. Tyró lav jaciá syr rádyma mánge i radymakirdia (obradyndia) zoralés miro iló, pal-dová, so Tyró lav isyn pe Mánde, Rajo Dévla, bolybnáskire-jangoléngiro Devél.

¹⁷Me na sómas beštó pe skedyipen, kaj sys prosaibnaskire i me na radyndjompe ke vučipén; Me sómas beštó jekhdžinó: pal-dová so Tu pherdiakirdian man xoliása.

¹⁸Sóske mirí dukh ĥará (dlúges) tyrdelape, sóske miro riskiriben pe masá na sastjola, savó Tu otphendianpe te sastiakires? Naúšto Tu javésa vaš mánge sýrby xohany ĥanyngori, sýrby nálačho paní.”

¹⁹Paldavá adiáke rakiréla Raj Devél: “Kóli tu risjosa, tén'či Me riskiráva tut pale, tén'či tu terdjosa angíl Mánde; i, kóli tu vykedesa kučipén bedypnastyr (čoripnástyr), tén'či tu javésa te rakirés Miré móstyr. Mek kadalé manušá risjona ke tu, ne túke na trej te risjos ke jone.

²⁰I Me keráva tútyr zoralý xarkuny (miédno) vánta pe kadalé manušénde, i jone javéna te marénpe proti túte, ne jone na léna uprál pe túte, pal-dová so Me som túsa te zrakhav, i te prirakhav tut,” — phendiá Raj Devél.

²¹“Čačes, Me javáva te prirakhav tut bibahtalé vastéstyr, i Me zrakháva tut darakune vastéstyr.”