Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 16 Bible Online

Jeriemiéjo 16 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 16

¹I sys phendló Ráskire-Devléskiro lav ke me:

²“Na le péske romniá, mek te na javén túte ni čhavé — ni čhaja pe davá štéto.

³Me phenáva túke pal čhavénde i čhajénde, savé bijandjona pe dová štéto; i pal dajénde, savé bijanena len, i pal dadende, savéndyr jone bijandjona:

⁴jone meréna dukhane meribnástyr, nikón na javéla te obrovel len: nijékh léndyr na javéla garadó, ne jone javéna syr gnejo pe phuv. Jone xasjona kurtalátyr i bokhalypnastyr, i léngire trúpy javéna sýrby xabén bolybnytkone čiriklienge i riskiribnáskire murdalénge (zvierienge) pe phuv.

⁵Paldavá Me adiáke phenáva túke: na zadžá dro kher, kaj tuginena roibnasa, adiáke-pac' na džá te obroves mulen, ci na tangine khetané lénca; pal-dová so Me otlava Miro ramánjo kadalé manušéndyr, Me iščo (inké) phenáva túke, — i drógo lačhipén i lačhé-ilýtkima (tangipén).

⁶Syr baré, adiáke-pac' i tykné meréna pe daja phuv. Len na javéna te garaven, adiáke-pac' i nikón na javéla te obrovel len; ci te čhinel pes, ci te občhinel balá pal lénde.

⁷Nikón na javéla te phagirel maró vaš lénge dre smentnyma tugitko, ci te podrikirél dro dúho (fáno) pal mulénde, i nikón na déla tahtáj lénge te vyp'jén, sob (kaj) te ramaniakirel (štyliakirel) léngiro iló pal dadéste ci pal date.

⁸I na džá dro kher, kaj jone svenkinena, i na beš lénca te xas, te p'jes.

⁹Paldavá adiáke rakiráva Me, bolybnáskire-jangoléngiro Raj Devél, Izrailjoskiro Devél: ‘Ake, Me keráva adiáke, so angíl tyré jakhá dre tyré dyvesá na javéna šundlé radymakire i sabnytka zaniá, terneskire i terniakire zaniá.’

¹⁰I javéla adiáke: kiéli tu rosphenesa saré dalé lavá odolé manušénge, tén'či jone phenéna túke: ‘Pal so davá vyphendia Raj Devél sarí daja bari bibáht (bída) pe aménde? Dro so isyn amaró čoripén? Ci savó grého ame kerdiám proti Raste-Devléste, amaré Devléste?’

¹¹Tén'ci tu phenésa lénge: ‘Pal-dová so tumaré dadá jačkirdé Man, — davá Me, Raj Devél, rakiráva: jone giné pal javire devlorende i iščo (inké) tumé dyné patýv lénge, i tumé jačkirdé Man, i na rikirde Miro Zakóno.

¹²I tumé kerdé fujedýr tumaré dadendyr, i so kažno (sváko) tuméndyr dživéla pir péskiro pharó i bibahtaló iló adiáke, so tumé na pričhude kan ke Me [sob (kaj) te na šunén Man-r.s.].

¹³Paldavá Me vyčhurdava tumen dalé phuvjátyr pe phuv, so tumé na džinéna, i saví na džindlé tumaré dadá, kaj tumé javéna te dynarinén javire devlorénge dyvés i rat: pal-dová so Mándyr na javéla ni savó tangipén (žalima) tuménge.’

¹⁴“Paldavá, ake, javéna dyvesá, — davá Me, Raj Devél, rakiráva, — so na javéna butýr te rakirén: ‘Te dživél Raj Devél, Savó jandiá Izrailjoskire čhavén Jegiptóskire phuvjátyr’;

¹⁵ne javéna te rakirén: ‘Te dživél Raj Devél, Savó jandiá Izrailjoskire čhavén paš-ratitkoné (sieviernone) phuvjátyr, i, saré phuv'jendyr, karik Jov vytradyjá len. ‘Pal-dová so Me janáva pale len pe phuv, saví Me dyjom léngire dadénge.

¹⁶“Ake, Me bičhaváva pe lénde but mačhibnar'jén, — davá Me, Raj Devél, rakiráva, — i jone javéna te uhtylén (te staren) len, a tén'či Me bičhaváva pe lénde but karedynitkonen (ohotniken), i jone tradéna krig len kažnoné bergátyr, i kažnoné bergicendyr i ščeliendyr dre skaly.

¹⁷Pal-dová so Miré jakhá isyn pe saré léngire dromá; jone na garavenape Miré móstyr, i léngiro čoripén nane garadó Miré jakhéndyr.

¹⁸Ne angíl Me otpleskirava pal léngiro čoripén i léngiro grého duj móly, pal-dová so jone magirdé Mirí phuv trupenca džungalé (brydkone) idolendyr, savénca jone pherdiakirde Miro mištypén.”

¹⁹Rajo Dévla! Tu san miro zoralypén i mirí tvárdyma, i pal Túte Me garadjovava dre trašane (darakune) dyvesá, ke Tu javéna but manušá saré jagorendyr (krajendyr) pe phuv i phenéna: “Amaré dadá, čačes, doresné (dolyne) meknó mištypén, savó isyn xohanó i xartytko (nikčemno), i léstyr nane ni savó lačhipén.

²⁰Ci moginéla (saštý) manúš kokoró te kerél devloré, savé isyn na develá sarésa?”

²¹Paldavá, ake, Me keráva adiáke, sob (kaj) jone te džinén Miro vast i Miro zoralypén, i jone javéna te džinén, so Miro lav isyn Raj Devél.”