Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 17 Bible Online

Jeriemiéjo 17 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 17

¹“Judejákiro grého isyn čhindló sastruné daltasa (riezcosa), diamantytkone (almazytkone) čhinybnytkonesa isyn vyčhindlo pe léngiri tablica pe iló i pe altarjoskire šyngá.

²Pal-dová so léngire čhavoré ripirena léngire altári i léngire dembitka veladinia (roščy) [i léngire ídoly Ašerahi[2]-ju.o.], savé isyn pašýl zelena drevy pe vučé bérgicy,

³to Mirí bérga pe félda, mištypén tyró, saró barvalypén Me otdáva te čoren, i adiáke-pac' vučé štéty pal gréhi pe phuv ke jagóry.

⁴I tumé kokoré otdena meknó mištypén, savó Me otdyjom tuménge: i Me keráva adiáke, so tumé javéna te dynarinén tumaré vergénge pe phuv, saví tumé na džinéna: pal-dová so tumé roshačkirde Miré — xoliakiri jag; joj iavéla te xačol pe saré viéki.

⁵I davá Me, Raj Devél, rakiráva: “Te javél prokošybén (arman)” pe manušéste, savó dopatiala zoralés dre manušéste, i savó keréla péskire ločiatyr (plotiatyr) čačó vast, i saveskiro iló durjola Rástyr-Devléstyr.

⁶Jov javéla sýrby jaloŭco (vieriesko) pe čhučé prahi, i jov na udykhéla, kiéli javéla lačhipén. Ne jov javéla te dživél pe šuko štéto pe xačkirdy mal (stiep), londy phuv, kaj nane manušá.

⁷Te javél bahtaló manúš, savó dopatiala zoralés dre Raste-Devléste i konéskiro patiaibén isyn dre Raste-Devléste.

⁸Pal-dová so jov javéla syr drévo, so isyn počhudo pašýl paniá, i savó rozdzindz'kirdia péskire kórni (rukhá) pašé rékica (lenorí). I jov na javéla te darel, kiéli javéla xačkiribén, ne léskiri patrín (listo) javéla zeleno, i léske na javéla trej te darel dro šuko berš, adiáke-pac' jov na pirijačéla te del phabá.

⁹Iló isyn xohanedyr saréstyr i drieván bibahtaló, kon saštý te džinél les?

¹⁰Me, Raj Devél, rozĥaljovava kažno iló, Me propatiakirava andrál manušés, sob (kaj) te dav kažnonéske (svakoneske) pir léskire dromá, pir dová, so jov kerdiá.

¹¹Syr kuropatka, saví bešéla pe parnore, so joj na čhudiá, adiáke-pac' isyn manúš, kon doreséla barvalypén na pir čačipén: dro sámo maškirál léskire dyvesá barvalypén mekéla les i dro kónco (dro jagóro) jov javéla dylynó.

¹²Amaró Svénto štéto isyn slavútno trono, savó čhudo anglypnástyr pe vučé štéty.

¹³Rajo Dévla! Tútyr užakiréla lačhipén Izrailjo! Saré, kon mekné Tútyr, javéna ladžakirdé. Saré, kon durine (otginé) Tútyr, javéna čhindlé pe phuv. Pal-dová so jone jačkirdé Ras-Devlés, Savó isyn džidé-paniéskiri ĥanýng.

¹⁴Sastiakir man, Rajo Dévla, i me javáva sastiakirdo; zrákh man, i me javáva zrakhno, pal-dová so pal Túte isyn miro šaribén.

¹⁵Ake, jone phenéna mánge: ‘Kaj isyn Ráskire-Devléskiro lav! Mek Jov te javél!’

¹⁶Ne me na sómas sygo te javav čhupnarisa (pastyrjosa), sob (kaj) te džav pal Túte. Adiáke-pac' me na kamdjom, sob (kaj) te javél xasibnýtko dyvés: Tu džinésa davá, so vygijá miré uštendyr, saró sys angíl Túte.

¹⁷Na trašakir man: pal Túte me garadjovava dro bibahtaló dyvés.

¹⁸Mek te javén ladžakirdé kodolé, savé tradéna man, mek jone te zameren darátyr, ne na domek, sob (kaj) me te javav ladžakirdó. Ne na domek, sob (kaj) mánge te zamerav darátyr. Jan pe lénde bibahtaló dyvés. Phagir len ke xasibén duj móly.”

¹⁹Adiáke phendiá mánge Raj Devél: “Džá i terdjov dre pórta, kaj isyn manušéngire čhavé, pirdál saví Judéngire králja džána andré i pirdál saví jone vydžána, i jav dre saré Jerusalimóskire pórty,

²⁰i phen lénge: ‘Šunén Ráskire-Devléskiro lav, tumé, Judejákire králja i sarí Judéia, saré džiibnarja Jerusalimóstyr, savé džána andré pirdál kadaja pórta.

²¹Adiáke rakiréla Raj Devél: “Rakhén péskiro di i te na lydžán ke pe ničí dro savatytko (subotnjo) dyvés pirdál Jerusalimóskiri pórta;

²²I te na vylydžan nisavó pharipén dro savatytko dyvés, i te na kerén nisaví butý, ne svenciakiren savatytko dyvés, syr Raj Devél priphendiá tumaré dadénge.”

²³Ne jone na kandyné, i jone na pričhude péskiro kan, a jone štyvakirde péskire menia, sob (kaj) jone na mogindlé te šunén ci te prilén sykliakiribén.

²⁴I javéla adiáke, kóli tumé mištés javéna te prišunenpe — rakiráva Me, Raj Devél, — i tumé na javéna te lydžán pharipén andré pirdál daja foróskiri pórta dro savatytko dyvés, ne sob (kaj) tumé te svenciakiren, savatytko dyvés, i te na kerén ni saví butý dro davá dyvés,

²⁵to tedy tumé javéna te zadžán pirdál daja foróskiri pórta králja i thagárja, savé isyn bešté pe Davidóskiro trono, jone javéna te tradén pe maribnýtka vurdená (koliesnicy) i uklisté jone i léngire thagárja, pašýl savénde manušá Judejátyr i džiibnarja Jerusalimóstyr, i manušá usady (sak) javéna te dživén dro davá fóro.

²⁶I jone javéna Judejákire for'jéndyr i pašylatune phuvjátyr pašýl Jerusalimo i Vieniamonoskire phuvjátyr (jugostyr), i feldendyr i phuvjátyr, kaj isyn bérgicy, i paš-dyvesytkoné phuvjátyr jone javéna te janén xačkiribnaskiro dyibén, ratvalo dyibén, i svénto dyibén givestyr, i drogoné-smolengiro thuv, i parikiribnytko svénto dyibén dro Ráskire-Devléskiro Kher.

²⁷Ne kóli tumé na javéna te prišunenpe ke Me te svenciakiren [te svenkinen-r.s.] savatytko dyvés, i te na lydžán pharipén, syr tumé zadžána pirdál Jerusalimóskiri pórta dro savatytko dyvés, tedy Me roshačkirava jag dre doiá pórta, i jag pohala sarésa Jerusalimóskire baré felatiniá, i daja jag na murdiakirena.’”