Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 19 Bible Online

Jeriemiéjo 19 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 19

¹Adiáke phendiá Raj Devél mánge, Jeriemiejoske: “Džá i kin khoró ĥlejatyr, i le pésa manušéngire phurydyren i phurydyre rašán,

²I džá ke Jenomoskiro [Gienomoskiro-ju.o.] dólo, savó isyn pašýl Pir'jéngiri pórta (Xaršyfo) i phen zoralés angíl sarénde lavá, savé Me phenáva túke.

³Phen lénge: ‘Šunén Ráskire-Devléskiro lav: Judejákire králja, džiibnarja Jerusalimóstyr. Adiáke rakiréla bolybnáskire-jangoléngiro Raj Devél, Izrailjoskiro Devél: ‘Ake Me janáva bibáht (bída) pe davá štéto adiáke, so kažnonéste, kon šunéla davá, javéla te kuduniakirel (te zvieninel) dre léskire kaná.

⁴Pal-dová so jone mekné Man, i jone kerdé čúžo davá štéto vaš Mánge, i jone thuvaliakirde drogoné smolenca javire devlorénge, savén jone na džindlé, i léngire dadá, i Judejákire králja, i jone pherdiakirde davá štéto bibangipnaskire ratésa;

⁵i jone adiáke-pac' čhudé vučé štéty Vaaloske te xačkirén péskire čhavén dre jag syr xačkiribnaskiro svénto dyibén Vaaloske, so Me priphendjom te na kerén, pal so Me na rakirdjom, davá na sys i Mánde pe godý.

⁶Paldavá ake, javéna dyvesá, — rakiráva Me, Raj Devél, — kiéli davá štéto na javéla te kharelpe Tofiéto, ci Ginomeskire-čhavéngiro dólo, a javéla te kharelpe muliakiribnaskiro (umaribnytko) dólo.

⁷I Me keráva adiáke, so ničý na javéla mol zrakiribén pe skedyny ke Judéia i ke Jerusalimo pe dová štéto, i Me keráva adiáke, so jone peréna kurtalátyr angíl péskire vergénde, i kodolengire vastéstyr, savé rodéna léngiro džiibén, i Me keráva adiáke, so léngire trúpy Me dáva syr xabén bolybnytkone čiriklenge i murdalénge pe phuv.

⁸I Me keráva dalé foróstyr štéto te sanpe, i te divinenpe trašasa manušénge, kažno (sváko) manúš, kon pašýl prodžála, javéla uhtyldo divosa, i jov javéla te del šolia sabnasa, dykhí dolé saré fránsy (jazvy).

⁹I Me keráva adiáke, so jone javéna te xan loč (plot') péskire čhavén i čhajén, i, kažno (sváko) léndyr, javéla te xal péskire-malengire džidé masá, kiéli občhuvena vérgi saré rigéndyr, kiéli lénge javéla pharó vergéndyr, i kodolendyr, savé javéna te tasaven len, i te rodén léngiro džiibén.

¹⁰I tu phagiresa khoró angíl manušéngire jakhá, savé javéna túsa,

¹¹i tu phenésa lénge: — ‘Adiáke rakiréla bolybnáskire-jangoléngiro Raj Devél: ‘Adiáke-pac' Me phagirava kadalé manušén i davá fóro, syr phagirena khoró, so naštý les nevéstyr te kerén, i jone javéna te garaven péskire mulen dro Tofiéto ke dasavo časo (cýro), so na javéla butýr štéto te garaven.

¹²Adiáke Me keráva kadalé štetosa, — rakiráva Me, Raj Devél, — i léskire manušénca, i Me keráva kadalé foróstyr sýrby Tofiéto.

¹³I kherá dro Jerusalimo i kral'jengire kherá dre Judéia javéna magirdé sýrby Tofiéto, — saré kherá, kaj pe léngire strehi thuvaliakirde drogoné smolenca, i vyčhuvenas thadune svénta dyibená javire devlorénge.’”

¹⁴Tén'ci javdiá Jeriemiéjo Tofietostyr, karik les bičhadiá Raj Devél te angilphenel, i jov terdijá pe gréda (dvóro), savó sys dro Ráskire-Devléskiro Kher, i jov phendiá saré manušénge:

¹⁵Adiáke rakiréla bolybnáskire-jangoléngiro Raj Devél, Izrailjoskiro Devél: “Ake, Me janáva bibáht [bari bída-r.s.] pe davá fóro i saré léskire foricy, pe savé Me priphendjom bibáht, pal-dová so jone pharjakirde péskire menia, sob (kaj) lénge te na šunén miré lavá.”