Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 2 Bible Online

Jeriemiéjo 2 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 2

¹I sys ke me, Ráskire-Devléskiro lav, i phendiá:

²“Džá i phen jasvénca dre manušéngire [čhakire-r.s.] kaná Jerusalimóstyr, phení: ‘Adiáke rakiréla Raj Devél: ‘Me ripirava tut, Izrailjo, savé lačhé sys tyré manušá ternal, tumarí patýv, so sys sýrby ternende angíl sovél, syr tumé giné pal Mánde pe čhučé prahi, pe phuv, so na čhudé givá iščo (inké).

³Tu, Izrailie, sánas svénto Mánde, tu sánas pérvo barjakirdó (plódo) Miré umalotostyr. Me pharés sendiakirdjom sarén, kon dukhavelas tut, me bičhavavas bída pe lénde,’’” — phendiá Raj Devél.

⁴Šunén Ráskire-Devléskiro lav tumé, kher Jakovóskiro, i saré sem'i (irjá) [kherá-r.s.] Izrailjoskire kheréstyr!

⁵Adiáke rakiréla Raj Devél: ‘Savó čoripén tumaré dadá lathné dre Mánde, so jone durine Mándyr, so jone giné pal xartytka ídoly, i so jone kokoré jačné xartytka (sujetna)?

⁶I na phendlé jone: “Kaj isyn Raj Devél, Kon lydžijá krig amen Jegiptóskire phuvjátyr, Kon lydžijá amen pirdál čhučé phuvjá, pirdál čhučé prahi, pirdál ĥanbiniá, pirdál šut'kirdy phuv, kaj isyn zer (tien') sýrby meribnástyr, pirdál phuv, pe saví nijékh na progijá, i nikón na dživdiá.”

⁷I Me jandjom tumen pe barvaly phuv, sob (kaj) tumé te xan lákire barjakirdé (plódy), i lákiro mištypén, ne syr tumé zaginé pe daja phuv, tumé magirdé kadaja phuv, i tumé magirdé Miro mištypén.

⁸E rašaja na phendlé: ‘Kaj isyn Raj Devél?’, — kodolé, kon rikiréla zor pe Zakóno, jone na džindlé Man: pastyri adiáke-pac' kerdé čoripén Mánge, i proróki angilphenenas Valaaloskire lavésa, i jone psirdé pal ídoly, savéndyr na sys ni savó lačhipén lénge.

⁹Paldavá Me javáva butýr te sendiakirav tumen’, — rakiréla Raj Devél, — “Me javáva te sendiakirav tumaré-čhavorengire čhavorén.

¹⁰Džán pal Xitimoskire ostrovy, bičhaven manušén pe Kidaro i obduminen mištés, ci sys vari-so kadasavó, syr kerdé manušá:

¹¹sob (kaj) manušýtko nacyja te paruvel péskire devlen, mek jone i na sys develá? Ne Miré manušá parude léngiri sláva (Devléskiro Baripén) pe ídoly, savéndyr na sys nisavó lačhipén.

¹²Divinenpe zoralés, bolybén kadalestyr, i trinskirenpe’, — phendiá Raj Devél.

¹³Pal-dová so miré manušá kerdé čoripén duj móly: jone jačkirdé Man, Kon isyn džidé-panieskiri ĥaningori i jone vyganade péske vendarinia (sažalki), phagirdé len, so na moginéna te rikirén paní.

¹⁴So Izrailjoskire manušá jačné dynar'jénca? Ci so jone isyn kherítka pishárja? Sóske les vérgi občorena?

¹⁵Terné ščerá (lievy) rykinena pe Izrailjo i jone brilinena; jone kerdé Izrailjostyr čhučí (pusto) phuv; léskire fórja xačkirdé i nikón na dživéla odój.

¹⁶I adiáke-pac' terné manušá Tafnatyr i Miemfisostyr phagirdé tyré-šereskiri kralítko stadyk.

¹⁷Ci na jandian tu kokoró, Izrailie, saró davá pe péste, syr tu jačkirdian Man, Ras-Devlés, Devlés, kiéli Me lydžijom tut dromésa.

¹⁸I akaná, vaš so túke, Izrailie, trej te kerés drom ke Jegípto i te p'jes Sihoroskire (Nilostyr) paniá, ci te kerés drom ke Asirija; i te p'jes lákire rekátyr (leniátyr).

¹⁹Fuipén, so tu kerdián, pirisykliakirela tut, i tyró otphenybén Mándyr bangiakirela tut: paldavá džá i dykh, syr kirko i bibáht túke, so tu jačkirdian Man, Ras-Devlés, i so túte nane dar angíl Mánde”, — phendiá Raj Devél, Raj Devél bolybnáskire-jangoléngiro.

²⁰‘Pal-dová so Me ĥará phagirdjom ĥámo tyré meniatyr, Me roskuscjom Tyré penty, i tu phendián: ‘Me na javáva te keráv čoripén: ne tu tel kažno bérgica i tel kažno zeleno drévo tu désa patýv idolénge, sýrby nalačhi džuvlý.

²¹I Me počhudjom tut dre phuv syr lačhé-rodoskiro vinagrado, lačhé-siemjoskire ziarkatyr: syr da tu pirikerdianpe dre xasibnýtko (vierutno) otbaripen dikone vinagradostyr angíl Mánde.

²²Paldavá, mek tu i te vymorespe akaná sodasa, i te les but sapuni, saroiekh tyró čoripén sykado angíl Mánde,’ — phendiá Raj Devél, Raj Devél.

²³Syr da tu mogindian te phenés: ‘Me na som magirdó, me na gijom pal Vaaloste’? Dykh, so tu kerdián pe dólo: tu san sýrby čvytko vierbliudiha (dromadariha), saví usá paruvela péskire dromá;

²⁴tu san sýrby xrustengiri oslica, so prisykljola ke čhučí phuv, so sungela ke pe balvál [glytynela fáno-r.s.] vaš péskiro tyrdypén? Kon déla ráda te obrikirel la, syr joj isyn nasvaly pal oslende? Saré, kon rodéla la, lathéla la bi-pharipnaskiro dro lákiro čhon.

²⁵Pririkir, Izrailie, péskire ĥerá, sob (kaj) jone te na javén dukhade, i péskiro kirlo, sob (kaj) jov te na javél trušalo (pirišut'kirdo). Ne tu phendián: ‘Nad, sóstyr te užakirav lačhipén. Nad! Pal-dová so mánge kerdépe (pokamlepe) čúža devloré i me džáva pal lénde.

²⁶Syr čor, savés ladžakirdé, syr uhtyldé les, adákicy ladžakirdé pes tumé, — manušá Izrailjostyr: tumaré králja, tumaré thagárja, i tumaré rašaja, i tumaré proróki,

²⁷savé phenéna kašteske: ‘Tu san miro dad’, — bareske: ‘Tu jandian man pe svéto! ‘Tumaré manušá risiné dumesa ke Me, a na mósa: ne syr javéla pharó, tedy jone phenéna: ‘Uštý i zrákh amen.’

²⁸Ne kaj isyn tumaré devloré, so tumé kerdé vaš péske? Mek jone te uštén, i mek jone te zrakhen tumen, syr isyn pharó tuménge! Pal-dová so túte, Judéia, isyn adákicy devloré, kicý isyn fórja!

²⁹Sóske tumé javéna te čingardenpe Mánca? Saré tumé kerdé grého proti Mánde!’ — phendiá Raj Devél.

³⁰Ivjá (naprásnes) muliakirdjom Me tumaré čhavorén, jone na prilyné dová, pal so me pirisykliakirdjom len. Tumé kokoré začingirde kurtalása péskire prorokén, sýrby ščer (liévo), so pohala saró.

³¹O, Izrailjoskiro ródo! Šunén miré lavá Rástyr-Devléstyr! Ci sómas Me sýrby pe čhučí phuv Izrailjoske? Ci sýrby kaly (tjomno) phuv? Sóske tedy Miré manušá rakiréna: ‘Ame kokoré sam raja péske! Ame butýr na javása ke Tu!’

³²Ci moginéla čhaj te bistrel lákiri šukarni viánka (šukár ukedyiben)? Ci terný te bistrel lákiro šukarno uribén? Ne Miré manušá bistrenas Man adákicy but dyvesá, so naštý te poginas.

³³Syr tumé šukarjakirena (xohanés podkerena) péskiri maniera, sob (kaj) te lathén kamiben? Paldavá tumé až vysykliakirde péskire manierenge samone bedone džuvlién.

³⁴Adiáke-pac' manušá lathné pe truiuny (pe podia) rat, so bibangipnaskire manušá pročhude: ‘Me na lathjom davá, čorahanés rodyi, ne adiáke uprál saró bicialó.’

³⁵Ne tumé iščo (inké) rakiréna: ‘Pal-dová so ame na sam bangé, Léskiri xolý risjola rigasa améndyr!’ Dykhén ža! Me javáva te lydžav čingárd (te sendinavpe) tuménca, pal-dová so tumé phendlé: ‘Ame na kerdiám grého.’

³⁶Sóske tumé drieván but psiréna čhučes, i paruvena tumaré dromá? Tumé javéna ladžakirdé dro Jegípto, adiáke-pac' syr tumé sánas ladžakirdé dre Asirija.

³⁷Ne tumé džána krig Jegiptóstyr, i tumaré vastá javéna pe tumaré šeré: pal-dová so Me, Raj Devél, na prilyjom dová, ke so tumaré ile risiné, i davá na udelape ke tumaró mištypén.”