Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 21 Bible Online

Jeriemiéjo 21 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 21

¹Lav, savó javdiá ke Jeriemiéjo Rástyr-Devléstyr, kiéli králi Sedekíia bičhadiá ke jov Pashoros, Molhinoskire čhavés, i Sofonijas (Zefanijas), Maasejahoskire čhavés, rašás, te phenél léske:

²“Vyphuč, me mangáva tut, Rástyr-Devléstyr pal aménde, pal-dová so o Navuhodonosóro, Vavilonóskiro králi, džála maribnása pe aménde: kóli te javél adiáke, sob (kaj) Raj Devél te kerél lésa pir saré Léskire dívna butiá, sob (kaj) králi Navuhodonosóro te džal krig améndyr.”

³Tén'ci phendiá Jeriemiéjo lénge: “Adiáke tumé phenén Sedekijaske:

⁴‘Adiáke rakiréla Raj Devél, Izrailjoskiro Devél: ‘Áke, Me riskiráva pale mardytka, so isyn dre tumaré vastá, savénca tumé marenape Vavilonóskire kralísa i Xaldiejénca, savé občhude trusciál tumen xaladenca javrí, pal baruné vánty, i Me skedáva len maškirál davá fóro.

⁵I Me Kokoró javáva te maravpe tuménca din'd'kirde vastésa i zoralé masniasa (myšcasa) dre xolý, dro mižehipen, i dro baró xoliakiribén;

⁶i Me muliakirava manušén, savé dživéna dro davá kher fóro i kheritkoné murdalén: jone meréna fransendyr.

⁷I paló (poslie) davá, — rakiráva Me, Raj Devél, — Me otdáva Sedekijas, Judejákire kralís, i léskire dynar'jén, i javír manušén kadalé foróstyr, savé jačénape džidé fransendyr, kurtalátyr i bokhalypnastyr dre Navuhodonoskire vastá, Vavilonóskire kralíste, dre tumaré-vergéngire vastá, i dre kodolengire vastá, savé rodéna tumaró džiibén. I jov muliakiréla tumen kurtalakire jagorosa. Jov na javéla te tanginél (te žalinel) tumen, te tanginél, i jov na javéla lačhé-ilytko ke tumé.”

⁸‘Akaná tu, Jeriemiéjo, phen kadalé manušénge: ‘Adiáke — rakiráva Me, Raj Devél, — ‘Áke, Me čhuváva angíl tuménde džiibnáskiro drom, i meribnaskiro drom.

⁹Kon jačélape dro davá fóro, meréla kurtalátyr, ci bokhalypnastyr, ci fransendyr, ne kon vydžála i zdelape Xaldiejénge, savé občhude trusciál tumen, kodová jačélape džidó i léskiro džiibén javéla léske dáro.

¹⁰Pal-dová so, Me riskirdjom Péskiro iló pe davá fóro pe bibáht (čoripén), a na pe lačhipén, — rakiráva Me, Raj Devél. ‘Davá fóro javéla otdynó dre kralískire-Vavilonóskiro vast, i jov shačkiréla les jagása.’”

¹¹A kralískire Judejákire kheréske phen adiáke: ‘Šunén Ráskire-Devléskiro lav,

¹²O, Davidóskiro kher! Adiáke’, — rakiráva Me, Raj Devél: ‘Sendiakiren čačipnása tasiárles (ránes) pe zlóko, i rakhén občorde manušés vastéstyr, savó tradéla les, sob (kaj) Miro mižehipen te na vydžál syr jag, i te na roshačol adiáke, so nikón na murdiakirela la pal dová, so tumé kerénas bibáht (nalačhé réndy).

¹³Ake, Me som proti túte doloskiri džiibnáskiri, skála loščynakiri’, — rakiréla Raj Devél, — tuménge, kon rakiréla: ‘Kon javéla pe aménde? Ci zadžála dre štéty, kaj ame dživasa?’

¹⁴I Me sendiakirava tumen pir tumaré barjakirdé (plódy), savé sykavéna, so kerdé tumé’, — rakiréla Raj Devél, — i Me roshačkirava jag dro tumaró veš, i joj pohala saró, so isyn trusciál léste.’”