Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 22 Bible Online

Jeriemiéjo 22 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 22

¹Adiáke phendiá Raj Devél, mánge, Jeriemiejoske: “Džá dro kher Judejákire kralískiro, i odój phen davá lav,

²i phen: “O, Králi Judejákiro! Šun Ráskire-Devléskiro lav, tu, kon isyn beštó pe Davidóskiro trono, tu i tyré dynárja, i manušá, savé zadžána pirdál daja pórta!

³Adiáke rakiráva Me, Raj Devél: Kerén čačunó séndo i pir čačipén, i rakhén občorde manušés vastéstyr, savó tradéla les: i na kerén namištes, na kerén nahrates čužoné manušéske, pirotoske (sirotaske), pivliake (udovake), i na pročhuven bibangipnaskiro (nabango) rat pe davá štéto.

⁴Pal-dová so, kóli tumé čačunés javéna te kerén adiáke, tén'či králja, savé isyn bešté pe Davidóskiro štéto pe léskiro trono, javéna te zadžán pirdál pórta dalé kheréskiri, kon tradéla pe maribnýtka vurdená i uklisté, králja i léskire manušá.

⁵Ne kóli tumé na šunéna dalé lavá, tedy Me sovlahava pe Péste’, — rakiréla Raj Devél, — so davá Kher javéla čhučó.”

⁶Pal-dová so adiáke phendiá Raj Devél pal Judejákiro kher: “Tu san šukár vaš Mánge syr Galaádo, syr vučipén pe Livanoskiri bérga: ne Me, čačes, keráva tútyr čhučí phuv, fóro, dro savó nikón na dživéla.

⁷I Me prirakhava/ skedáva vymaribnaskiren (istriebitielién) pe túte, kažnones péskire maribnytkoné sastyresa; i jone čingirena telé vykedyné (fedyrša) kiedry, i jone čhurdena len dre jag.

⁸I but javír manušá javéna te džán pirdál davá fóro, i kažno léndyr phenéla jekh jekhéske: ‘Pal so da Raj Devél kerdiá adiáke kadalé baré forosa?’

⁹I jone phenéna: ‘Pal-dová so foritka manušá mekné Ráskire-Devléskiro Zakóno, léngire Devléskiro, i jone dyné sovláh dynarindlé javire devlorénge.’

¹⁰Na rovén pal muleste, i na tuginen khetané pal léste, ne rovén kirkes pal odoléste, savó gijá dro pliéno, pal-dová so jov butýr na risjola pale, i jov na dykhéla butýr péskire-dadengiri phuv;

¹¹paldavá adiáke rakiréla Raj Devél pal Salumoste (Šalumoste), Iosijakire čhavéste, kon sys králi Judejákiro, savó kralindia paló Iosijaste, léskire dadéste, savó gijá péskire phuvjátyr: ‘Jov butýr na risjola pale;

¹²ne jov meréla pe dová štéto, karik les zalydžana dro pliéno, i jov butýr na javéla te dykhél daja phuv:

¹³Bida léske, kon ĥazdéla léskiro kher načačipnasa, i léskire upratune kralitka komory namištes, pe konéste susiédo (kotári) keréla butý bi lovengiro;

¹⁴Kon phenéla: ‘Me čhuváva péske buĥló kher i baré upratune kralitka komory, i jov vyčingirela fenštry péske i obsuvela kiedrosa, i makhela lolé mastiniasa (kraskasa).

¹⁵Ci tu duminesa te javes kralísa pir dová, so Tu učhakirdian pes kiedrosa? Dad tyró xaja i pija, i ci na kerdiá jov čačunó séndo i saró pir čačipén? I vaš davá sys mištó léske.

¹⁶Jov lydžijá pe séndo réndo čororeskiro i kodoleskiro, savó sys dre trébima; tedy i paldavá sys mištó léske. “Ci na davá saró sykavéla, so tu džinésa Man?” — rakiréla Raj Devél.

¹⁷Ne tyré jakhá i tyró iló isyn riskirdo vaš tyrí ĥalkima ke barvalypén i te pročhuves bibangipnaskiro (nabango) rat, i vaš dová, sob (kaj) te pritasaves, i te les pe zor.

¹⁸Paldavá adiáke rakiréla Raj Devél pal Ioakimoste (Jahakimoste), Iosijakire (Josijaskire) čhavéste, kralíste pe Judéia: ‘Na javéna te obroven les “so ž Miro pšal? I so ž Mirí phen?” Na javéna te obroven les: “So ž, tu san, miro Khieningo?” i “So ž léskiro baripén?”

¹⁹I garavena les syr oslós, vytyrdena les, i čhurdena léskiro trúpo pal Jerusalimóskiri pórta.’

²⁰‘Džán upré pe Liváno, manušále Jerusalimóstyr, i den gódla, i godlen pe Bašano, i den gódla pe Avarimoskire vučé štéty, pal-dová so saré tumaré kamlé drúgi (malá) isyn muliakirdé.

²¹Me rakiravas tuménge tedy, syr tuménde saró gijá lačhés, ne tumé phendlé, so tumé na šunéna. Adiáke kerénas tumé ternal (smolodu), so tumé na pričhuvenas kan ke Mirí zan.

²²Balvál javéla te vyphurdel sarén tumaré čhupnar'jen, i tumaré malá džána dro pliéno; tedy, čačes, tumé javéna ladžakirdé i phagirdé dre péskiri godý pal sarí tumarí bibáht [saré tumaré bibahtalé réndy-r.s.].

²³O tumé, kon dživéla pe Liváno, kon keréla gniázdy (kúfy) pe kiedry, [syr javéla tut tango-r.s.] kiéli peréna dukhá pe túte, sýrby pe džuvliáte, savjake trej te bijanél.’

²⁴“Me som džidó”, — rakiréla Raj Devél, — mek Iiehonija [Koniah-ju.o.], čhavó Ioakimoskiro, králi Judejákiro, te javél sýrby angrusty jakhitkonesa (piečatka) pe Miro čačó vast, ne Me i odothýr vytyrdavas tut,

²⁵i Me otdáva tut dre odolengire vastá, savé kaména te zamarén tut, i dre kodoleskire vastá, koneskire móstyr tu daresa — vastá Navuhodonosoroskire, kralíste Vavilonóstyr, i — vastá Xaldiejengire.

²⁶I vyčhurdava Me tut, i tyré da, saví jandiá tut pe svéto, ke javír them, dro savó nijékh tuméndyr na javdiá pe svéto, i odój tumé meréna.

²⁷Ne pe phuv, ke saví tumaré dijá tyrdenape [iavéna te kamen te risjon-r.s.], tumé na risjona pale.

²⁸Ci isyn Iiehonija adasavó manúš, sob (kaj) te dykhén pe léste vučipnástyr syr pe phagirdó khoró? Ci isyn jov sýrby khoró, savó na radynela jakhá? Pal so jov i léskiro ródo vyčhurdyne, i čhurdyné pe phuv, saví jone na džinéna?

²⁹O phuv, phuv, phuv! Šun Ráskire-Devléskiro lav!

³⁰Adiáke rakiréla Raj Devél: “Začhinen (zapisynen) kadalé manušés, Iiehonijas, syr bičhavorengires, syr manušés, saveskiro džiibén na javéla mištó; pal-dová so nijékh léskire kheritkoné rodóstyr na javéla te dživél mištés, i na javéla te bešél pe Davidóskiro trono, i na javéla te xulainél butýr pir Judéia.”