Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 23 Bible Online

Jeriemiéjo 23 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 23

¹“Bida čhupnar'jenge (pastyrienge), savé muliakirena i rosčhurdena (rostradena) bakrén Miré čaritkone phuvjátyr!” — rakiréla Raj Devél.

²Paldavá adiáke rakiréla Raj Devél, Izrailjoskiro Devél pal čhupnar'jende (pastyriende), kon čaliakirela Léskire manušén: “Tumé rosčhurdyne (rostradyne) Miro gurto i tradyne len krig, i tumé na dykhné pal lénde. Ake, Me javáva te sendiakirav tumen pal bibáht (tumaré fuj réndy), so tumé kerdé”, — rakiréla Raj Devél.

³“Ne Me skedáva otiačiben (odolén, kon jaciápe) Miré ĥurtostyr saré themendyr, ke savé Me protradyjom len, i Me janáva len pale pe léngire čaritka phuvjá, i lénde javéna but čhavoré, i len javéla but.

⁴I Me čhuváva čhupnar'jen pe lénde, i jone javéna te čaliakiren len; i jone na javéna te darén butýr, i jone na javéna zaphagirde dro dúho (fáno), i nikón na xasjola léndyr”, — rakiréla Raj Devél.

⁵“Ake, javéna dyvesá”, — rakiréla Raj Devél, — kiéli Me čhuváva upré nevéstyr Davidóske Rand' (Otbaripen) čačuný, Kralís, jov javéla te rainel i te kerél saró godes. Jov javéla te kerél čačunó séndo i pir čačipén pe phuv.

⁶Dre dolé dyvesá Judéia javéla zrakhny, i Izrailjo javéla te dživél bi darákiro. Jov javéla te kharelpe: ‘Raj Devél isyn amaró Čačipén.’

⁷“Paldavá, ake, javéna dyvesá’, — rakiréla Raj Devél — so butýr na javéna te rakirén: ‘Te javél džidó Raj Devél, Savó vylydžijá Izrailjoskire čhavén Jegiptóstyr;

⁸ne: ‘Te javél džidó Raj Devél, Savó vylydžijá i jandiá pale ródo Izrailjoskire kheréstyr paš-ratitkoné (sieviernone) rigátyr, i saré themendyr, ke savé Me vytradyjom len. I jone jačénape (javéna) te dživén pe léngiri phuv.”

⁹So pal prorokénde: ‘Miro iló dre mánde pharadjola, saré miré kokalý izdrana. Me som sýrby mato manúš, i syr manúš, savés mol (vino) pirizorjakirdia (mat'kirdia) angíl Raste-Devléste, vaš svénta lavá Léskire Sventomatyr.

¹⁰Pal-dová so phuv isyn pherdý manušénca, savé kaména javire devloren, pal-dová so joj zoralés tuginela (rovela) prokošybnastyr. Čaritka féldy (pastbiščy) pe čhučí phuv šutine; pal-dová so prorokengiro drom isyn bibahtaló, i léngiri zor isyn dro načačipén.

¹¹Dujdžiné: i proróko, i rašáj isyn bidyvlytka: adiáke syr i dro Miro kher Me lathjom léngiri zlydnima”, — rakiréla Raj Devél.

¹²“Paldavá léngiro drom javéla vaš lénge syr slizko štéto dro kalypén (cjomnyma), len špulena (pihinena) odój i jone peréna odorík. Me janáva bibáht (bari bída) — pe lénde dro berš, kiéli Me javáva te sendiakirav len”, — rakiréla Raj Devél.

¹³“Maškir prorokénde dre Samárija Me dykhcjom dasavo bigodypen (dylnypén): jone angilphenas Vaaloskire lavésa, i jone kerénas adiáke, so Miré manušá Izrailjoskire, dynepe dukhá.

¹⁴I Me dykhcjom trašane (darane) réndy maškír prorokénde dro Izrailjo: jone kaména javire devloré i jone psiréna xohaibnasa. Jone zoraliakirena odolengire vastá, kon keréla bibáht, sob (kaj) nikón te na risjol krig péskire zlydnimatyr. Jone jačné vaš Mánge syr Sodómo, i manušá léskire syr manušá dre Gomóra.”

¹⁵Paldavá adiáke rakiréla jangoléngire-bolybnáskiro Raj Devél pal prorokénde: “Ake Me javáva te čaravav len palynosa, i Me začhuvava len te p'jen paní želučostyr, pir dová, so Jerusalimóskire prorokendyr bidevlytkima rozgijápe pir sarí phuv”

¹⁶Adiáke rakiréla jangoléngiro-bolybnáskiro Raj Devél: “Na pričhuvén kan ke lavá, so proróki angilphenena tuménge. Jone dylniakirena tumen; jone rakiréna pal godengiro sunó, savó isyn pe iló lénde, a na dová, so Raj Devél rakiréla.

¹⁷Jone kažno mólo rakiréna odolénge, savé dykhéna vučipnástyr pe Mánde: ‘Adiáke phendiá Raj Devél: ‘Tuménde javéla ramánjo.’ I iščo (inké) jone rakiréna odolénge, savé psiréna pir péskire pharé šeré: ‘Na javéla bibáht pe tuménde.’

¹⁸Pal-dová so kon sys terdó pe skedyibén, kaj Raj Devél délas godý, sob (kaj) te ĥaljol angíl Léskiro lav? Kon pričhudia péskiro kan ke Léskiro lav i šundiá les?

¹⁹Dykhén! Baró štormo Rástyr-Devléstyr, Léskire xoliakiribnastyr, javdiá riskiribnáskiro štormo; jov peréla pe fujé-manušéngiro šeró.

²⁰Ráskire-Devléskiri xolý na risjola krig angíl dová, syr Jov keréla saró dová, so Jov kamdiá te kerél: tumé ĥaljona davá dro kónco (jagóro) dyvesengiro (palatuné dyvesá).

²¹Me na bičhadjom kadalé prorokén, ne jone prastándyne péskire lavésa. Me na rakirdjom lénge, ne jone angilphendle.

²²Ne kóli jone te terdjon pe skedyibén, kaj Raj Devél délas godý i te kerén adiáke, sob (kaj) Miré manušá te šunén Miré lavá, sob (kaj) te riskirén len bibahtalé droméstyr i fuipnastyr, so jone kerdé.

²³‘Ci som Me Devél, Savó isyn féni (tóka) pašýl? Ci na som Me Devél, Savó isyn durál?’ — rakiréla Raj Devél.

²⁴“Ci moginéla (saštý) manúš te garadjol dre čorahane štéty, sob (kaj) Me te na dykháv les?” — rakiréla Raj Devél. “Ci na som Me pe bolybén i pe phuv?” — rakiréla Raj Devél.

²⁵Me šundjom, so proróki rakiréna, kon angilphenela xohanés Miré lavéstyr. Jone rakiréna: “Me dykhcjom suné! Me dykhcjom suné!”

²⁶Syr ĥará (dlúges) javéla davá dro iló prorokengiro, savé angilphenena xohaibén léngire iléstyr?

²⁷Save duminéna te kerén adiáke, sob (kaj) Miré manušá te bistren Miro lav pal léngire suné, savé jone rosphenena so ke jekh péskire susiedoske (kotariske): adiáke-pac' léngire dadá bistyrde Miro lav pal Vaaloste.

²⁸O proróko, savéste isyn sunó, mek jov te rosphenel sunó, ne kodová, savéste isyn Miro lav, mek jov te rosphenel Miro lav čačunés. Savó isyn khetanypen maškír phus i ziárka?” — rakiréla Raj Devél.

²⁹“Ci nane Miro lav sýrby jag, i sýrby čokano (mlotko), savó phagiréla skaly pe koterá?”, — rakiréla Raj Devél.

³⁰“Paldavá, ake, Me som proti prorokénde — rakiréla Raj Devél, savé čorena Miré lavá, jekh jekhestyr, léngire susiediéndyr (kotar'jendyr).

³¹Ake, Me som proti prorokénde”, — rakiréla Raj Devél, savé rakiréna péskire čibása i phenéna: “Davá Jov rakiréla.”

³²“Ake, Me som proti lénde, savé angilphenena xohané suné, — rakiréla Raj Devél, — savé piriphenena len manušénge adiáke, so jone denape dukhá xohaibnastyr i léngire šaribnastyr. Ne Me na bičhadjom len, i Me na priphendjom lénge te kerén, i jone sarésa na janéna ni savó lačhipén kadalé manušénge”, — rakiréla Raj Devél.

³³“Paldavá, kiéli adalé manušá, ci proróko, ci rašáj phučena tútyr, phení: ‘Saví isyn pharí zvies' (zan) Rástyr-Devléstyr?’ — tedy tu, Jeriemiéjo, phenésa lénge: ‘Tumé kokoré san pharí zvies' (zan) Raste-Devléste adiáke, so Raj Devél kaméla te otphenelpe tuméndyr.’

³⁴I kóli proróko, ci rašái, ci manušá phenéna: ‘Davá isyn pharipén Raste-Devléste.’ Me adiáke-pac' i sendiakirava pharés kadalé manušés i léskiri sém'ia (irí).

³⁵Paldavá tumé, so ke jekh, rakirén péskire susiedoske (kotariske), i, so ke jekh, péskire pšaléske: ‘So otphendiá Raj Devél? So phendiá Raj Devél?

³⁶I tumé na rakirén butýr: ‘Pharí zvies' (zan) Rástyr-Devléstyr, pal-dová so kažno adasavó lav manušéste javéla pharí zvies' (zan) vaš léske, kon adiáke rakiréla, pal-dová so tumé piririskirde lavá džidé Devléskire, amaré Ráskire-Devléskire, jangoléngire-bolybnáskire, amaré Devléskire.

³⁷Adiáke, Jeriemiéjo, phen prorokoske: ‘So otphendiá Raj Devél túke? So phendiá Raj Devél túke?

³⁸Ne kóli jone iščo (inké) phenéna: ‘Pharí zvies' (zan) Rástyr-Devléstyr’, tedy tu phen lénge, so Me, Raj Devél, adiáke rakiráva: ‘Pal-dová so tumé rakiréna’ pharí zan (zvies') Rástyr-Devléstyr’, ne Me bičhadjom lav tuménge te na rakirén: ‘Pharí zvies' (zan) Rástyr-Devléstyr’,

³⁹paldavá, ake, Me adiáke-pac' i bistrava tumen, i Me mekava tumen sarésa, i fóro, Jerusalimo, savó Me dyjom tuménge i tumaré dadénge, i Me vyčhurdava tumen Miré móstyr.

⁴⁰I Me janáva pe tuménde viéčno bipatyv, viéčno ladž adiáke, so davá na bistrelape.”