Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 24 Bible Online

Jeriemiéjo 24 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 24

¹O, Raj Devél sykadiá mánge, i, ake, duj korzíny (khudé) inžyrosa čhudé angíl Ráskire-Devléskiri Khangirí. Davá sys paló (poslie) dová, kielo Navuhodonosóro, králi Vavilonóskiro, zalydžijá dro pliéno Jerusalimóstyr Iiehonijas, čhavés Iohakimoskires, kralís Judejakires, i Judejakiren thagar'jén, i spiecen dre vastytka butiá kaštesa (kherá-keribnaskiren), i petalengiren (kovalién), i jov jandiá len dro Vavilóno.

²Jekh khudo (korzina) sys drieván lačhé inžyrosa syr pérva spiéla múri, i javír khudo sys drieván adasavé nalačhé inžyrosa, so léskire múri sys naštý te xas.

³I phuciá mándyr Raj Devél: “So dykhésa tu, Jeriemiéjo?” I otphendjom me: “Inžyritka múri.” Lačhé múri isyn drieván lačhé, nalačhé múri isyn dasavé bibáht, so len naštý te xas.”

⁴Nevéstyr (nevés) javdiá ke me lav Ráskire-Devléskiro, i phendiá:

⁵‘Adiáke rakiréla Raj Devél, Izrailjoskiro Devél: “Syr davá lačhó inžyro, adiáke i Me javáva te ginav pal lačhende manušénde, savén zalydžine dro pliéno Judejátyr, konés Me bičhadjom krig dalé štetóstyr pe phuv Xaldiejengiri.

⁶I Me javáva te dykháv pal lénde vaš léngiro lačhipén, i Me janáva pale len pe daja phuv, i Me ĥazdáva len, i Me na javáva te phagirav (te teliakirav) len ke phuv, i Me na vyriskirava len.

⁷Tén'ci Me dáva léngire ileske láska te džinél Man, so Me som Raj Devél, i so jone javéna Miré manušá, i so Me javáva léngiro Devél, pal-dová so jone risjona ke Me saré iléstyr.

⁸A so pal dová bibáht inžyro, so les naštý te xas, šunén: ‘Adiáke rakiréla Raj Devél: ‘Dasaví bibáht Me keráva Sedekijaske, kralíske Judejátyr, i léngire thagar'jénge, i manušénge Jerusalimóstyr, savé jačnépe pe daja phuv, i kodolénge, savé jačnépe pe Jegiptóskiri phuv.’

⁹I Me zdava len, sob (kaj) len te tradén odorík i pale pir saré kralipená pe phuv pe bibáht, sob (kaj) te obrakiren len sýrby priphenybén, sob (kaj) te vysan len syr prokošybén (arman) pir saré štéty, ke savé Me tradyjom len.

¹⁰I Me bičhaváva kurtála pe lénde, bokh i fránsy adiáke ĥará (dlúges), angíl, syr Me xasiakiráva len phuvjátyr, saví Me dyjom lénge i léngire dadénge.’”