Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 25 Bible Online

Jeriemiéjo 25 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 25

¹Ake, isyn lav, savó javdiá ke Jeriemiéjo pal saré manušénde Judejátyr dro štárto berš, syr Ioakimo, čhavó Iosijáskiro — králi pir Judéia, lyjá te kralinél. Davá sys pérvo berš, syr Navuhodonosóro, lyjá te kralinél pir Vavilóno.

²Davá lav proróko Jeriemiéjo phendiá saré manušénge Judejátyr i saré manušénge Jerusalimóstyr, rakirí:

³“Biš te trin berš — dešutritone beršestyr, syr kralindia Iosija, čhavó Amonóskiro, králi Judejákiro ke adadyvés javélas ke me lav Rástyr-Devléstyr, i me, Jeriemiéjo, rakirdjom tuménge, uštyi pe zlóko (ránko) i rakirí, ne tumé na šundlé.

⁴I bičhavelas Raj Devél tuménge saré Léskire dynar'jén-prorokén, pe zlóko (pe ránko) bičhavelas Jov, ne tumé na šundlé, i tumé na pričhude kan te šunén.

⁵E proróki rakirdé tuménge: “Risjon nevéstyr akaná, so ke jekh tuméndyr, péskire bibahtalé dromendyr, fuipnastyr, so tumé kerénas, i jačénpe te dživén pe phuv, saví dyjá Raj Devél tuménge, i tumaré dadénge ĥará viekendyr i pe viéki.

⁶I na džán palál pal javire devloré te dynarinén lénge, i te kerén patýv lénge, i na den jag xoliake andré Mánde te xoliasovav pe tuménde pal butiá, so kerdé tumaré vastá, sob (kaj) Me te na keráv doš tuménge.”

⁷Ne tumé na šundlé Man, — rakiréla Raj Devél, — sob (kaj) tuménge te na den jag xoliake andrál Mánde te xoliasovav pe tuménde pal butiá (nalačhé réndy), so kerdé tumaré vastá vaš doš [holý-r.s.] péske.”

⁸Paldavá adiáke rakiréla jangoléngiro-bolybnáskiro Raj Devél: “Pal dová, so tumé na šundlé Miré lavá,

⁹ake, Me bičhaváva, i Me láva saré sem'i (irjá) paš-ratitkoné (sieviernone) rigátyr’, — rakiréla Raj Devél, — ‘i Me bičhaváva len ke Navuhodonosóro, králi pir Vavilóno, Miro pishári, i Me janáva len proti daja phuv, i proti manušénde, kon dživéla pe daja phuv, i proti saré dalé Najudýtka nácyi, savé isyn trusciál, i Me sarésa xasiakiráva len, i Me keráva adiáke, so manušá javéna te divinenpe trašatyr (darátyr) pe lénde, te den šolia sabnasa i lénge javéla viéčno xas'/ xasibén.

¹⁰I iščo (inké) Me keráva adiáke, so butýr na javéla lénde radymakiro saben, i radymakiri zan, zan terneskiri, i zan terniakiri, i grukoto žornendyr (beledinendyr) pe siav (phurt), i dud (svéto) momolytkonestyr.

¹¹I sarí daja phuv javéla čhučí i syr traš (dar), i saré dalé nácyi javéna te dynarinén kralíske dro Vavilóno eftadešá berš.

¹²Korigedýr (pozžedýr) javéla adiáke: kiéli prodžána eftadešá beršá, tedy Me láva te sendiakirav Vavilonóskire kralís i daja nacyja’, — rakiréla Raj Devél, — ‘pal léngiro čoripén, i phuv Xaldiejéngiri, i Me keráva adiáke, so joj iavéla viéčnes čhučí.

¹³I Me janáva pe daja phuv saré Miré lavá, so Me vyphendjom pe lénde, — saró davá isyn čhindló dre daja lylvarí, saví Jeriemiéjo angilphenelas pal saré nácyi.

¹⁴Pal-dová so but nácyi i baré králja keréna léndyr, kokorendyr Xaldiejendyr, pishar'jén, i Me otdáva fuipnasa pale lénge pal léngire réndy i butiá, so kerdé léngire vastá.”

¹⁵I iščo (inké), so Raj Devél, Devél Izrailjoskiro, phendiá mánge: “Le tahtáj (čaša) moliasa (vinosa), so isyn pherdý xoliása Miré vastéstyr, i ker adiáke, sob (kaj) saré Najudýtka nácyi, ke savé Me bičhadjom tut, te p'jen léstyr.

¹⁶I jone vyp'jéna, i jone javéna te kuninenpe (šatynenpe), i jone javéna te dylnjon, kiéli dykhéna kurtála, saví Me bičhaváva pe lénde.”

¹⁷I Me, Jeriemiéjo, lyjom tahtáj (čaša) Ráskire-Devléskire vastéstyr, i me začhudjom te p'jén saré Najudýtka nácyi, ke savé Raj Devél bičhadiá man:

¹⁸ke Jerusalimo i ke saré fórja Judejátyr, léngire kral'jén i léngire thagar'jen, sob (kaj) te keráv léndyr čhučó štéto, sob (kaj) pe lénde te divinenpe trašasa [darátyr-r.s.], te sipinen, Me keráva léngire lavéstyr košybén (arman), syr davá isyn až i ke davá dyvés;

¹⁹Faraonos, kralís Jegiptoskires, léskire dynar'jén, léskire thagar'jen, i saré léskire manušén:

²⁰i sarén miešanone manušén, saré králja Uzoskire phuvjátyr, saré-kral'jén Filistimengire phuvjátyr: Aškielonostyr, Gazatyr, Ekronostyr, i kon jaciápe Azotostyr [Ašdodatyr-ju.o.];

²¹manušén Edomostyr, Moavostyr i Amonoskire čhavé;

²²i saré kral'jén pir Tíro i saré kral'jén pir Sidono, i saré králja pir ostrovy, savé isyn pal paningá morjoskire (derjavéskire).

²³Ke Diedano, Tiéma i Buzo, savénde jagóry pe balengire piéisy isyn občhindlé;

²⁴i saré kral'jén pir Aravija i saré kral'jén pe miešanone manušénde, savé dživéna pe čhučé prahi;

²⁵i saré kral'jén Zimrijatyr, i ke saré králja Elamostyr, i ke saré králja Midijatyr;

²⁶i saré kral'jén paš-ratitkoné (sieviernone) rigátyr, durál i pašýl jekh javirestyr, i saré kralipená pe svéto, savé isyn pir phuvjákiro baripén, i králi Siesaha [Šešaho-ju.o.] vyp'jéla paló lénde.

²⁷I tu phen lénge: ‘Adiáke rakiréla bolybnáskire-jangoléngiro Raj Devél, Izrailjoskiro Devél: ‘P'jén i matjon, i čhaden, i perén, i na uštén butýr angíl kurtála, saví Me bičhadjom pe tuménde.

²⁸I adiáke javéla: kóli jone otphenenape te len tahtáj tyré-vastéstyr te p'jén, tedy tu phen lénge: ‘Adiáke rakiréla Raj Devél bolybnáskire-jangoléngiro: ‘Tumé san bangé te p'jén.’

²⁹I dykhén! Me láva te janav bibáht (bari bída) pe fóro, pe savó isyn Miro lav, i so tumé, xaj, jačénape nasendiakirde pharés? Nad, tumé javéna pharés sendiakirde, pal-dová so Me kharáva kurtála pe sarénde, kon dživéla pe phuv, rakiréla Raj Devél bolybnáskire-jangoléngiro.

³⁰Paldavá tu, Jeriemiéjo, angilphen (proročyn) lénge saré kadalé lavá i phen lénge: “Raj Devél zagriminela vučipnástyr, i Jov phenéla Péskire zaniása Péskire sventoné štetóstyr; Jov zagriminela zoralés pe Péskiri phuv, sýrby kodolé, savé tasavena vinagrado, pe sarénde, kon dživéla pe phuv.

³¹Glumo (šumo) dodžála ke jagóry (ke kraí) phuvjákire: pal-dová so Raste-Devléste isyn čingárd (sporo) Najudytkoné nacyiénca, Jov javéla te lydžál séndo kažnoné ločasa (plotiasa), ne fujé manušén Jov bičhavéla sarén tel kurtála,” — adiáke rakiréla Raj Devél.

³²Adiáke rakiréla Raj Devél bolybnáskire-jangoléngiro: ‘Ake, bibáht (bari bída) javéla te džal jekhe nacyjatyr ke javír, i baró štormo ĥazdélape duratuné jagorendyr (krajendyr) pe phuv.’”

³³I bari xas' (xasibén) pe manušénde javéla Rástyr-Devléstyr dro dová dyvés jekhe jagoróstyr pe phuv až ke javír jagóro pe phuv: nikón na javéla te obrovel len, nikón na ukedela len, nikón na javéla te garavel len, jone javéna syr gnejo, pir sarí phuv.

³⁴Tuginen roibnasa, čhupnárja (pastyri), i rovén! Katynenpe dre práska, baré šeré pir ĥurto! Pal-dová so podginé dyvesá, sob (kaj) tumen te xasiakirén, i te rosčhurden; tumé peréna syr kuč khoré (sasúdy).

³⁵I čhupnar'jenge na javéla štéto te garadjon, i baré šerenge pir ĥurto te našén.

³⁶Čhupnar'jengiri zan, syr jone rovena, i baré-šerengiri pir ĥurto zan javéna šundlé, pal-dová so Raj Devél xasiakirdiá léngire čar'itka féldy,

³⁷i štyl (tiha) féldy vyčingirde pal bari xolý Rástyr-Devléstyr.

³⁸Jov mekciá Péskire manušén sýrby ščer (liévo) péskiri garavipnaskiri (logovo), paldová léngiri phuv jaciá čhučí pir dová, so vérgo isyn drieván mižeh i pal Raskiri-Devléskiri bari xolý.”