Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 26 Bible Online

Jeriemiéjo 26 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 26

¹Dro sámo anglypén (načalo), kiéli kralindia Ioakimo, čhavó Iosijáskiro, králi pir Judéia, javdiá dasavo lav Rástyr-Devléstyr mánge, Jeriemiejoske, phení:

²“Adiáke rakiréla Raj Devél: ‘Terdjov pe gréda (dvóro) Khangirjákiri Ráskire-Devléskiri i phen saré for'jenge Judejátyr, so javéna te den patýv dre Khangirí Ráskire-Devléskiri, saré lavá, so Me priphenava túke te phenés lénge: Na garav ani jékh lav.

³Kažno léndyr, xaj, javéla te kandel i te riskirél péskire bibahtalé droméstyr, sob (kaj) Me te obriskirav (te otparuvav) Pes čoripnástyr, savó Me duminava te keráv lénge pal fuipén, so jone keréna.’”

⁴I tu phenésa lénge: ‘Adiáke rakiréla Raj Devél: ‘Kóli tumé na kandéna Man, sob (kaj) te psirén pir Miro Zakóno, savó Me dyjom tuménge;

⁵sob (kaj) te pričhuvén kan ke Miré dynar'jengire, Miré prorokéngire lavá, savén Me bičhadjom ke tumé, pe zlóko (ránko) Me bičhavavas, ne tumé na pričhude kan;

⁶tedy Me keráva dalé Khangirjátyr javír Silómo (Šylo), i Me keráva adiáke, so pe léste javéna te kerén prokošybena (armania) saré Najudýtka nácyi pe phuv.’”

⁷I saré rašaja, i proróki, i saré manušá šundlé, syr Jeriemiéjo rakirélas dalé lavá dre Khangirí Ráskire-Devléskiri.

⁸I jaciá adiáke: kiéli Jeriemiéjo končyndia (pirijaciá) te rakirél saró, so Raj Devél priphendiá léske te phenél saré manušénge, tedy rašaja, i proróki, i saré javír manušá uhtyldé les, rakirí: “Tu, čačes, merésa [bangó te meres-r.s.]!

⁹Sóske tu angilphenesa Ráskire-Devléskire lavéstyr, rakirí: ‘Davá kher javéla sýrby Silómo (Šylo), i davá fóro javéla čhučó, bi manušéngiro?’” I saré manušá skedynépe proti Jeriemiejoste dre Khangirí Ráskire-Devléskiri.

¹⁰Kiéli thagárja Judejákire šundlé saré kadalé lavá, jone giné Kralískire kheréstyr ke Khangirí Ráskire-Devléskiri, i jone bešné ke zagiibén dre neví pórta dre Khangirí Ráskire-Devléskiri.”

¹¹I rašaja, i proróki phendlé thagar'jenge, i saré manušénge, rakirí: “Adavá manúš domardiape (mol) te merél! Pir dová, so jov angilphenelas proti davá fóro, syr tumé šundlé péskire kanenca.”

¹²Tén'ci phendiá Jeriemiéjo saré thagar'jenge i saré manušénge, phení: “Raj Devél bičhadiá man te angilphenav proti davá Kher i proti davá fóro saré lavénca, so tumé šundlé.

¹³Ake, paldavá paruven ke fedýr tumaré dromá, i dová, so tumé keréna, i kandén zan Raskiri-Devléskiri, tumaré Devléskiri, tedy Raj Devél potanginela (požalinela) pal doiá bibáht, so Jov vyphendia pe tuménde.

¹⁴Ne so pal mánde, ĥáda, Me som dre tumaré vastá; kerén mánca dová, so zdelape (sykavelape) tuménge čačunés i lačhés.

¹⁵Ne tumé džinén čačes, so kóli tumé muliakirena man, tumé džinén, so tumé léna bibangipnaskiro rat pe péste, pe davá fóro, i pe léskire manušénde; pal-dová so, čačunés, Raj Devél bičhadiá man te phenáv saré dalé lavá dre tumaré kaná.”

¹⁶I thagárja i saré manušá phendlé rašange i prorokenge: “Davá manúš na domardiape (namol) te merél; pal-dová so jov phendiá aménge Ráskire-Devléskire lavéstyr, amaré Devléstyr.”

¹⁷Tén'ci vari-savé phurydyrá pe phuv ĥazdynépe i phendlé saré manušénge, savé skedynépe, phení:

¹⁸“Mihaj Morašostyr angilphenelas dro dyvés, kiéli o Jezekíia sys králi pir Judéia, i phendiá saré manušénge Judejátyr, rakirí: ‘Adiáke rakiréla bolybnáskire-jangoléngiro Raj Devél: “Sióno javéla pharado syr phuv pluĥostyr (pharadiatyr), Jerusalimóstyr jačénape ruíny [bará-r.s.], I bérga, kaj isyn Khangirí, javéla syr bérgica maškír veš.

¹⁹Ci Jezekíia, králi Judejákiro, i sarí Judéia muliakirdé les? Ci so jov, Jezekíia, na darelas i na rodelas Devléskiri láska. I Raj Devél potangindia (požalindia) pal bibáht, so Jov vyphendia pe lénde. Ne ame kerása baró čoripén proti amaré dijá.”

²⁰Dykhén, sys adiáke-pac' jekh manúš, savó angilphenelas Ráskire-Devléskire lavésa, o Urija, čhavó Šemajaskiro Kirjat-Jarmostyr, kon angilphenelas proti davá fóro i proti daja phuv dasavé-samone lavénca, so Jeriemiéjo.

²¹I kiéli králi Ioakimo, i saré léskire zormanuša, i saré thagárja šundlé léskire lavá, tedy králi rodyja, syr te muliakirél les. Ne syr Urija šundiá davá, jov darandyja, i jov nascia i gijá ke Jegípto.

²²Tedy králi Ioakimo bičhadiá manušén ke Jegípto: Jelnatanos, čhavés Ahboroskires, i javire manušén lésa ke Jegípto,

²³savé lydžiné pésa Urijas Jegiptóstyr, i jandlé les ke králi Ioakimo; i jov muliakirdiá les kurtalása i čhurdyjá javrí léskiro trúpo dre maĥily, kaj sys narajkane (čororé) manušá.

²⁴Ne saroiekh (usajékh) Ahikamoskiro vast, čhavéskire Šafanoskiro, sys pal Jeriemiejoste, sob (kaj) te na otdén les dre vastá manušénge te zamarén les.