Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 28 Bible Online

Jeriemiéjo 28 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 28

¹I sys davá dro dová-sámo berš, angíl, kiéli o Sedekíia kralindia pe Judéia, dro štárto berš, dro pándžto čhon, so Ananija, Azuroskiro čhavó, proróko Gavaonostyr, rakirdiá mánge dre Khangirí Ráskire-Devléskiri angíl rašande i saré manušénde, i phendiá:

²“Adiáke rakiréla bolybnáskire-jangoléngiro Raj Devél; Izrailjoskiro Devél: ‘Me phagirdjom [phagirava-r.s.] ĥámo kralískiro Vavilonóstyr.’

³Pir duj berš Me janáva pale pe davá štéto saré khoré (sasúdy), Ráskire-Devléskire Khangirjátyr, savé o Navuhodonosóro, králi Vavilonóskiro, lyjá krig kadalé štetóstyr i lydžijá ke Vavilóno.

⁴I Me janáva pale pe davá štéto Iiehonijas, čhavés Joakimoskires, kralís pe Judéia, saré Judejákire plienonen, kon gijá ke Vavilóno’, — rakiréla Raj Devél — pal-dová so Me phagirava ĥámo kralískiro Vavilonóstyr”.’

⁵Tén'ci proróko o Jeriemiéjo rakirélas ke proróko Ananija angíl rašande, i angíl saré manušénde, savé sys terdé dre Khangirí Ráskire-Devléskiri.

⁶I phendiá proróko Jeriemiéjo: “Amín'! Mek Raj Devél te kerél adiáke! Mek Raj Devél te kerél dro čačipén tyré lavá, so tu angilphendian te janén khoré (sasúdy) Khangirjátyr Ráskire-Devleskirjatyr i saré plienonen Vavilonóstyr pe davá štéto!

⁷Ne féni šun akaná davá lav, so me phenáva zoralés túke i saré tyré manušénge:

⁸E proróki, savé sys angledýr mánde i angledýr túte, angilphenenas adiáke-pac' pal but thema (strany) i pal baré kralipená, pal maribén, pal bibáht [bari bída-r.s.] i pal fránsy.

⁹O proróko, savó angilphenelas ramánjo, kiéli léskiro lav te angilphenel dová, so javéla, kóli kerelaspe dro čačipén, tedy les pridžinenas pal prorokoste, savés Raj Devél, čačes, bičhadiá.”

¹⁰I proróko Ananija[3] zlyjá ĥámo prorokoskire Jeriemiejoskire meniatyr i phagirdiá les.

¹¹I phendiá Ananija angíl jakhá saré manušénde dalé lavá: “Adiáke rakiréla Raj Devél: ‘Adiáke Me phagirava ĥámo kralískiro Navuhodonosoroskiro Vavilonóstyr pir duj berš krig meniatyr saré nacyiéndyr!” I gijá proróko Jeriemiéjo péskire dromésa.

¹²I sys lav Rástyr-Devléstyr ke Jeriemiéjo paló (poslie) dová, kiéli proróko Ananija phagirdiá ĥámo krig meniatyr prorokoskire Jeriemiejoskire:

¹³“Džá i phen Ananijaske, rakirí: ‘Adiáke rakiréla Raj Devél: ‘Tu phagirdian kaštuno ĥámo, ne tu kerésa sastruno ĥámo pe léskiro štéto.’

¹⁴Pal-dová so adiáke rakiréla bolybnáskire-jangoléngiro Raj Devél, Devél Izrailjoskiro: “Me čhuváva sastruno ĥámo pe men saré Najudytkoné nacyienge, sob (kaj) jone te den ráda te dynarinén Navuhodonosoroske, kralíske Vavilonóstyr; i jone javéna te dynarinén léske: Me adiáke-pac' i feldytkone murdalén (zvierien) dyjom léske!’”

¹⁵I phendiá proróko Jeriemiéjo ke proróko Ananija: “Šun akaná, Ananija: Raj Devél na bičhadiá tut, ne tu kerésa adiáke, sob (kaj) adalé manušá te patián dro xohaibén.

¹⁶Paldavá adiáke rakiréla Raj Devél: ‘Áke, Me čhurdava tut krig phuvjákire štetóstyr: tu merésa, davá berš, pal-dová so tu sykliakiresas te ĥazdén búnto proti Raste-Devléste!”

¹⁷I Ananija, proróko, myjá dro dová-pac' berš pe eftáto (bitrinéngiro déšto) čhon.