Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 29 Bible Online

Jeriemiéjo 29 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 29

¹I, ake, isyn lavá lylestyr, savó proróko Jeriemiéjo bičhadiá phurydyrenge Jerusalimóstyr, savé jačnépe maškír pliennonende, i rašange, i prorokenge, i saré manušénge, savén lydžijá dro pliéno o Navuhodonosóro Jerusalimóstyr ke Vavilóno.

²Davá sys paló (poslie) dová, kiéli o Jehonija králi i králica, i jevnuhi, i thagárja Judejákire i Jerusalimóstyr, i spiécy dre vastytka butiá pir kašt (kherá-kheribnaskire) i petalengire (kovali) vyginé Jerusalimóstyr.

³O Jeriemiéjo piridyja davá lyl dro vast Jeliasoske (Eljasoske), čhavéske Šafanoskireske, i Ĥemarijaske, čhavéske Xielkijaskireske, savén o Sedekíia, králi Judejákiro, bičhadiá ke Navuhodonosóro, králi Vavilonóskiro. Dro lyl rakirdiape:

⁴Adiáke rakiréla bolybnáskire-jangoléngiro Raj Devél, Devél Izrailjoskiro, saré pliennone manušénge, savén Me piričhudjom [pirilydžijom-r.s.] te dživén Jerusalimóstyr ke Vavilóno:

⁵“Čhuvén kherá i dživén dre lénde, čhuvén pe phuv unty (sady) i xan phabá léndyr.

⁶I sob (kaj) te javén čhavé, i čhaja tuménde, len romnién péskire čhavénge i otdén péskire čhajén paloróm, sob (kaj) jone te janén pe svéto čhavén i čhajén, sob (kaj) tumen te javél butedýr odój, sob (kaj) te na javél kutedyr tumen.

⁷I prihčuven zor saré zorjátyr, sob (kaj) te javél ramánjo (miro) dro fóro, ke savó Me piričhudjom [pirilydžijom-r.s.] tumen te dživén dro pliéno, i mangénpe Ráske-Devléske pal davá, pal-dová so ramánjo dro dová fóro javéla tumaró ramánjo.

⁸Pal-dová so adiáke rakiréla bolybnáskire-jangoléngiro Raj Devél: ‘Mek tumaré proróki, savé isyn maškír tuménde, i tumaré drabakiribnaskire te na xohaven tumen. Na riskirén tumarí godý ke tumaré suné, so tumé dykhéna.

⁹Pal-dová so jone angilphenena xohanés tuménge Miré lavéstyr: Me na bičhadjom len’, — rakiréla Raj Devél.

¹⁰‘Ake, so rakiréla Raj Devél: ‘Kiéli končynenape [prodžána-r.s.] tumaré eftadešá berš dro Vavilóno, tedy Me javáva ke tumé, i Me spolninava Miro lačhó lav vaš tuménge, sob (kaj) te janav pale tumen pe davá štéto.

¹¹I Me Kokoró džinóm (džináv) Miré plany vaš tuménge’ — rakiréla Raj Devél’, — plany, sob (kaj) te javél ramánjo (miro), a na čoripén, sob (kaj) tuménde te javél lačhó užakiribén (nadiéia) pe dyvesá, so iščo (inké) javéna.

¹²I tumé javéna te kharén Man i tumé javéna, i tumé javéna te mangénpe Mánge, i Me javáva te šunav tumen,

¹³I tumé javéna te rodén Man, i tumé lathéna Man, kóli tumé javéna te rodén Man saré iléstyr’, —

¹⁴i Tumé lathéna Man’, — rakiréla Raj Devél, — i Me janáva pale tumen tumaré plienóstyr: i Me skedáva tumen saré Najudytkoné nacyiéndyr i saré šteténdyr, ke savé Me tradyjom tumen’, — rakiréla Raj Devél, — ‘i Me janáva tumen pale pe štéto’, savéstyr Me tumen lydžijom dro pliéno.

¹⁵Pal-dová so tumé phendlé: “Raj Devél čhudiá prorokén aménge dro Vavilóno”, —

¹⁶paldavá adiáke rakiréla Raj Devél pal kralíste, savó isyn pe Davidóskiro trono pal saré manušénde, savé dživéna dro davá fóro, pal tumaré pšalénde, savé na giné tuménca dro pliéno, —

¹⁷adiáke rakiréla bolybnáskire-jangoléngiro Raj Devél: ‘Ake, Me bičhaváva pe lénde kurtála, bokh i meribnytka fránsy, i Me keráva len sýrby kirmale inžyritka múri, savé naštý te xas, jone isyn drieván fuj.

¹⁸I Me javáva te tradav len kurtalása, bokhasa, i meribnytkone fransenca, i Me otdáva len, sob (kaj) te tradén len odorík i pale pe bída dre saré kralipená pe phuv, — sob (kaj) te vyphenen prokošybena (te armaniakiren len), te divinenpe trašasa pe lénde, te sipinen, i te obrakiren xoliása len manušá Najudytkoné nacyiéndyr, ke savé Me tradava len:

¹⁹pal-dová so jone na šundlé Miré lavá’, — rakiréla Raj Devél, — savé Me piriphendjom pir Miré pishar'jende, Miré prorokénde, pe zlóko (pe ránko) bičhavavas Me, ne jone na šundlé’, — rakiréla Raj Devél.

²⁰Ne tumé saré, kon isyn dro pliéno, savén Me bičhadjom Jerusalimóstyr ke Vavilóno, šunén Ráskire-Devléskiro lav.

²¹Ake, isyn lavá — savé rakiréla bolybnáskire-jangoléngiro Raj Devél, Izrailjoskiro Devél pal Ahavoste, Kolijaskire čhavéste, i pal Sedekijaste, Masejaskire čhavéste, savé angilphenena xohaibén tuménge Miré lavéstyr: “Ake, Me vydava len dro vast Navuhodonosoroskiro, kralíske Vavilonóstyr, i Jov muliakiréla len pe tumaré jakhá.

²²I pal lénde léngire lavá javéna syr prokošybén (arman) maškír saré Judejákire pliennonende dro Vavilóno, syr jone javéna te rakirén: ‘Mek te kerél adiáke túke Raj Devél syr Sedekijaske i Ahavoske, savén Vavilonóskiro králi pekcia pe jag;

²³pal dová, so jone kerdé džungalypén (brydkima) dro Izrailjo, i jone kerdé biladžaipén léngire-susiediengire (kotar'jengire) džuvliénca, i jone rakirdé xohanó lav Miré lavéstyr, so Me na priphendjom lénge te kerén: i Me džinóm davá, i Me som Jakhítko,” — rakiréla Raj Devél.

²⁴I tu phenésa Šemijaske Niehielamostyr, rakirí:

²⁵“Adiáke rakiréla bolybnáskire-jangoléngiro Raj Devél, Izrailjoskiro Devél: ‘Pal dová, so tu bičhadian lylá tyré lavéstyr, savé isyn dro Jerusalimo rašáske Sofonijaske (Zefanijaske), čhavéske Maasejaskireske, i saré rašange, rakirí:

²⁶‘Raj Devél čhudiá tut syr rašás pe rašaskire — Iodajoskire (Jegoiadaskiro) štéto, sob (kaj) tu te javes dykhibnaskiresa (bliustitieljosa) pe Khangirí Ráskire-Devléskiri, pir kažnoné bigodiakire manušéste i kažnonéste, kon dylnjola i kharélape prorokosa, sob (kaj) te čhuvén les dre kalodki i dro štaribén.

²⁷Sóske tu na vyrakirdian Jeriemiejoske Anafofostyr, savó kerdiá péstyr prorokós ke tumé?

²⁸Pal-dová so jov piriphendia lav aménge dro Vavilóno, phení: “Davá pliéno javéla ĥará (dlúges) te tyrdelpe; čhuvén kherá i dživén dre lénde, i čhuvén pe phuv unty (sady), i xan léngiro frukto (plódo)!’”

²⁹I rašáj Sofonija (Cefanija) gindia zoralés (dro saró šunybén) davá lyl prorokoskiro Jeriemiejoskiro.

³⁰Tén'ci sys Ráskiro-Devléskiro lav ke Jeriemiéjo,

³¹“Bičháv sarénge, kon isyn dro pliéno te phenén: — ‘Adiáke rakiréla Raj Devél pal Šemaijaste, Niehielamostyr, pal dová, so Šemaija angilphendia tuménge, ne Me na bičhadjom les, i jov kerdiá adiáke, sob (kaj) tumé te užakiren lačhipén xohaibnastyr;

³²paldavá, adiáke rakiréla Raj Devél: ‘Áke, Me javáva pharés te sendiakirav Šemaijas Niehielamostyr, i léskiro ródo. Léste na javéla ni jekh manúš te dživél maškír adalé manušénde, i nijékh na javéla te dykhél lačhipén, savó Me javáva te keráv vaš Miré manušénge’, — rakiréla Raj Devél, — pal-dová so jov sykliakirdiá te buntuinel proti Mánde, Raste-Devléste!’”