Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 3 Bible Online

Jeriemiéjo 3 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 3

¹Iščo rakiréna jone: ‘Kóli manúš rozdžalape péskire romniása, i joj džála krig léstyr i joj iačéla romný javire manušéske, ci saštý, sob (kaj) joj te risjol pale ke jov? Ci na javéla kodoia phuv xor magirdy? Ne tumé, manušá Izrailjostyr, kamlé but javire devloré sýrby nalačhi džuvlý, ne saroiekh (usajékh) risjov ke Me’, — rakiréla Raj Devél.

²Ĥazden péskire jakhá pe vučé bimanušengire štéty i Dykhén akaná, kaj tumé sykade patýv javire devlorénge. Paše dromá tumé sánas bešté vaš lénge, sýrby o Arabo pe čhučí phuv, i tumé magirdé péskiri phuv nalačhé kamibnasa i fuipnasa.

³Paldavá paningá sys pririkirde, i na sys vesnakire bryšynda i tuménde čikata jačné sýrby nalačhé džuvliáte, ne tumé na prilyné ladžakiriben.

⁴Ci javéna tumé te kharén jasvénca Man: ‘Miro Dádo! Tu san Lydžaibnaskiro amaré ternypnastyr?

⁵Ci jačesape Tu xoliamó pe saré viéki? Ci javésa Tu te rikires xolý ke sámo kónco (ke jagóro)?’ Dykhén, tumé phendlé davá, ne tumé kerdé čoripén adákicy but, kicý tumé féni mogindlé!”

⁶I phendiá Raj Devél mánge, Jeriemiejoske, dre dyvesá, kiéli Iosija (Josija) sys králi: ‘Ci dykhcián tu, so kerdiá čhaj Izrailjoskiri, saví otgijá patiaibnastyr? Lákire manušá psirenas tel kažno vučí bérga, i kažno zeleno drévo i jone sykade patýv ke javír devloré sýrby nalačhi džuvlý.

⁷I paló dová, syr Izrailjo kerdiá saró davá, Me phendjom: “Risjov ke Me.” Ne jov na risijá. I léskiri zdyibnaskiri phen Judéia dykhciá davá.

⁸I dykhciá Judéia davá, kiéli pir pričyna, so Izrailjo otgijá patiaibnastyr i léskire manušá usá sykavenas kamiben ke javír devloré sýrby nalačhi džuvlý, to Me bičhadjom Izrailjoskire manušén krig Péstyr, i dyjom léske rozginybnytko lyl (foda), ne léskiri zdyibnaskiri phen Judéia na darandyja, ne joj gijá i joj adiáke-pac' sykadiá patýv ke javír devloré.

⁹I sys adiáke, so Judéia magirdia phuv péskire nahratone kamibnasa, i joj délas patýv barenge i kaštenge.

¹⁰Ne usajékh (saroiekh) Izrailjoskiri zdyibnaskiri phen Judéia na risijá ke Me saré iléstyr, ne joj féni pefromi (pemisni), — phendiá Raj Devél.

¹¹Tén'ci phendiá Raj Devél mánge, Jeriemiejoske: “Izrailie, savó otgijá patiaibnastyr, sykadiá pes čačunedyr, syr zdyibnaskiri Judéia.

¹²Džá i rosphen (obzaniakir) sarénge dalé lavá odój ke paš-ratiakiri (šylaly) rig, kon isyn odój dro pliéno, i phen: ‘Risjov, otgiibnytko Izrailie!’ -rakiréla Raj Devél, — ‘Me na javáva te dykháv xoliames pe túte, pal-dová so Me som lačhé-diéskiro i Me na javáva te rikirav xolý pe saré viéki.

¹³Féni (jekh) priĥaljov péskiri bang, so tu phagirdian Ráskire-Devléskiro, Devléskiro Zakóno, i tu čhurdesape jekhe rigátyr pe javír angíl čužoné devlorende, tel kažno zeleno drévo, i so tu na šundián Mirí zan’, — phendiá Raj Devél.

¹⁴“Risjon tumé, otgiibnytka čhavé”, — phendiá Raj Devél, — pal-dová so Me som tumaró Xulái. Me láva jekhés kažnoné foróstyr, i dujén kažnoné semjostyr (rodóstyr), i Me janáva tumen pe Sióno.

¹⁵I Me dáva tuménge čhupnar'jen [pastyrien-r.s.] pir Miro iló, savé javéna te čaliakiren tumen džinybnasa, i ĥalyibnasa.

¹⁶I javéla adiáke: kiéli tuménde bijandjona but-but manušá i javéna butýr i butýr manušá tuménde, dro dolé dyvesá, — phendiá Raj Devél, — tuménde na javéna te rakirén butýr: kovčego (mohtó) Devléskire Zavietosa.’ Manušénde na javéla davá pe godý: jone na javéna ni te ripirén davá, ni te javén ke kovčego ni na podkeren les.

¹⁷Dro davá časo (cýro) jone javéna te kharén Jerusalimo Ráskire-Devléskiro tronosa, i saré manušéngire nácyi kedenape khetané ke Jerusalimo i butýr na javéna te psirén nakandunes pir léngire pharé ile.

¹⁸Dre dolé dyvesá manušá Judejákire kheréstyr javéna ke Izrailjoskiro kher, i jone javéna khetané te džán phuvjátyr, so isyn pe paš-ratítko (šylaly) rig ke phuv, so Me dyjom tumaré dadénge syr meknó mištypén.

¹⁹I phendjom Me, Raj Devél: ‘Syr Me prilava tumen syr Miré čhavorén i Me dáva tuménge lačhí phuv, naj šukaredyr mištypén saré manušéngire nacyiéndyr!’ — i iščo (inké) Me phendjom: ‘Tedy tumé javéna te kharén Man ‘Amaró Dad’, i tumé na otdžana krig Mándyr.

²⁰Ne tu, Izrailie, sýrby napatiaibnytko romný, saví durjola péskire romestyr, adiáke-pac' tyré manušá mekné Man!

²¹Šunén zaniá pe vučé štéty, syr rovena i mangénape Izrailjoskire čhavoré, pal-dová so jone piririskirde péskire dromá dro džiibén, i jone bistyrde Ras-Devlés, péskire Devlés.

²²Risjon tumé, otgiibnytka čhavorale, i Me sastiakirava tumaró načačipén. I jone phendlé: ‘Ake, ame džása ke Tu, pal-dová so Tu san, Raj Devél, amaró Dad.’

²³Čačipén, so ame ivjá patiandyjam, so bérgicy vyrakhena amen, so buté-bergengiri zor podela vast aménge: čačipnása Raj Devél, amaró Devél féni vyrakhela amen.

²⁴Pal-dová so ladž, so kerdé amaré dadá ternypnastyr, pohalas léngire-bakréngire stády i tedy, léngire čhavén i čhajén.

²⁵Ame sam pašté dre amarí ladž, i amaró biladžaipén čhakirdia amen: pal-dová so ame kerdiám grého proti Raste-Devléste, amaré Devléste: ame i amaré dadá, amaré tyrnypnastyr ke adadyvés, i ame na kandyjam Ráskire-Devléskiri, amaré-Devléskiri zan!”