Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 31 Bible Online

Jeriemiéjo 31 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 31

¹“Dro dolé dyvesá’, — rakiréla Raj Devél,’ — Me javáva Devél vaš saré kherítka ródy (pliémi) Izrailjostyr i jone javéna Miré manušá.”

²Adiáke rakiréla Raj Devél: “Manušá, savé jačnépe džidé kurtalátyr, lathné tangipén (láska) Mándyr pe čhučí phuv, Me džáva te dav ramánjo Izrailjoske’”

³Raj Devél sykadyjá Izrailjoske, duripnastyr, i phendiá: “Tu jacián drógo Mánge pe saré viéki, paldavá Me sykadjom túke tangipén (láska).”

⁴“Me nevéstyr javáva te ĥazdav tut, Tu javésa ĥazdyny, o patyvalý džuvlý Izrailjoskiri’! Tu nevéstyr javésa ĥožakirdy bubnenca, i tu džása angíl te kheles kodolenca, savé radynénape.

⁵Tu nevéstyr (nevés) počhuvesa vinagradýtka unty (sady) pir bérgi dre Samárija, vinagradarja javéna te počhuven i te xan múri.”

⁶I javéla dyvés, kiéli e rakhibnaskire (stražy) pe bérga Jefriémo, javéna te den gódla: ‘Uštén, džása pe Sióno ke Raj Devél, amaró Devél’”

⁷Ake, so, Raj Devél rakiréla: — “Bagán zoralés, radymása Jakovóske i den gódla anglatuné (pervoné) šeraleske pir nácyi. Phenén zoralés sarénge, šarén i rakirén: “O Rajo Dévla! Zrákh Tyré manušén, savé jačnépe, Izrailjostyr!”

⁸Dykhén, Me janáva pale len paš-ratitkoné themestyr, i Me skedáva len samone jagorendyr pe phuv. Maškir lénde javéna: korori, i langaly, pharí džuvlý, i džuvlý, savjake, trej te bijanél-khetané; baró skedyibén (sonmo) javéla pale [risjola-r.s.] adái!

⁹Jone giné roibnasa, i Me lydžáva len mangipnenca. Me džáva angíl lénde pašýl panitka réki (leniá) pir mamúj drom, sob (kaj) jone te na obštavenpe. Pal-dová so Me som Dad Izrailjoskiro, i Jefriémo isyn Miro anglatunó čhavoró.

¹⁰Šunén lav Ráskire-Devléskiro, o manušále nacyiéndyr, i phenén davá zoralés sarénge pe ostrovy, so isyn dur, i phenén: “Jov, Kon rosčhudiá te dživél Izrailjo, skedéla les, i Jov javéla te rakhél Péskire manušén, syr čhupnári (pastyrjo) Péskiro ĥurto.

¹¹Pal-dová so Raj Devél vykinela Jakovós, i Jov zrakhéla les kodoleskire vastéstyr, kon isyn zoraledýr léstyr.

¹²Paldavá jone javéna te bagán pe bérga Sióno, i jone priprastana khetané pe Ráskire-Devléskiro lačhipén; — pe parnó giv, pe mol (loly bravinta), pe maslinitko dzet (jeliejo), pe tyknorende ĥurtostyr i stadatyr; i léngiro di javéla syr únta (sado), saví drieván počhudy paniésa, i jone butýr na javéna te tuginen.

¹³Tén'ci patyvalý džuvlý javéla te radynélpe, khelyndoj: i terné i phurané manušá khetané; pal-dová so Me riskiráva léngiri túga dre rádyma, i Me podrikirava léngiro dúho (fáno), i Me dáva rádyma lénge pe štéto léngire-dukhakiro pe iló.

¹⁴I Me dáva čalés čekén rašángire dijenge, i Miré manušá čaljona Miré lačhipnastyr”, — rakiréla Raj Devél. Láska vaš Izrailjo

¹⁵‘Ake, so rakiréla Raj Devél: “Zan šunelape dre Ráma, zoralé i kirke rovibnasa. E Rahíl' rovela pal lákire bijatende, joj na kaméla, sob (kaj) te podrikiren lákiro dúho (fáno), pal-dová so láte nane butýr bijatén.”

¹⁶Adiáke rakiréla Raj Devél: “Obrikirpe roibnastyr, i tyré jakhá jasvendyr; pal-dová so dová, so tu kerdián péskire bijatenge, risjola lačhipnása, — rakiréla Raj Devél: ‘Tyré bijaty javéna pale vergoskire phuvjátyr.

¹⁷Isyn vaš so te užakires lačhipén odoléstyr, so iščo (inké) javéla angíl, — rakiréla Raj Devél, — ‘pal-dová so tyré bijaty javéna pale pe péskire miéžy pe phuv.

¹⁸Me šundjom, syr o Jefriémo tuginelas jasvénca kokoró péske: “Tu sykliakirdian ke dukhá man, i, me som pirisykliakirdo sýrby nasykliakirdo guruv: rískir man ke lačhipén, i me risjováva, pal-dová so Tu, Raj Devél, san miro Devél.

¹⁹Dykhén: paló (poslie) dová, syr me risijom ke lačhipén, me riskirdjom džiibén ke Devél i pale dová, syr man pirisykliakirde, me pekadjom pes pir statia (scjogny). Me jacjom ladžakirdó, i až mirí godý zaphadija, pal-dová so me lydžijom bang miré terné beršéndyr.”

²⁰‘Ci na san tu, Jefriémo, drógo čhavó Mánge? Ci na san tu Miro kamibnytko čhavó? Pal-dová so syr Me rakirdjom pal túte, Me ŭsády (sak) ripirdjom tut. Paldavá Miro andrypen rakiréla péske pal léste: Mánge syr te na sykavav tangipén (láska) léske’, rakiréla Raj Devél.

²¹Čhuv stýlby šperenca, ker špery pir phuv; rískir iló ke baró drom, ke drom, savésa tu gíian. Risjov pale, o patyvalý džuvlý Izrailjoskiri, risjov nevéstyr ke dalé tyré fórja.

²²Syr ĥará (dlúges) tu javésa te psirés péske tu, čhajo, saví otpyja? Pal-dová so Raj Devél kerdiá vari-so nevó pe phuv” — e džuvlý zrakhéla romes.

²³Adiáke rakiréla bolybnáskire-jangoléngiro Raj Devél, Izrailjoskiro Devél: “Kiéli Me janáva len plienóstyr, jone nevéstyr javéna te rakirén davá lav pe Judejakiri phuv i dre lákire fórja: ‘Te bahtiakirél Raj Devél tut, o čačipnáskiro kher, o svénto bérga!’

²⁴I odój pe lénde jačéna te dživén manušá Judejátyr, i dre saré léngire fórja, phuvjákire xulaja i kodolé javír manušá, savé psiréna ĥurtenca.

²⁵Pal-dová so Me dyjom čalés kažnoné khiniakirde diéske, i Me dyjom pherdés te xal kažnoné diéske, so sys dre túga.”

²⁶Dalésa me, Jeriemiéjo, džangadyjom (prošnindjompe) i dykhcjom pašýl péste: miro sunó sys gudló mánge.

²⁷“Ake, javéna dyvesá’, — rakiréla Raj Devél’, — so Me keráva adiáke, sob (kaj) dro Judejákiro i dro Izrailjoskire kherá te bijandjon (lotjon) manušá, i te bijandjon kherítka murdalá (skoto).

²⁸I javéla adiáke: syr kučes Me dykhcjom Pal lénde, sob (kaj) te vyriskirav len, i te phagirav len i te piririskirav len i te xasiakiráv len i te pritasavav; akaná adiáke-pac' Me javáva te dykháv rakhunes (rakhibnasa) pal lénde, sob (kaj) te občhuvav léngiro džiibén, i te počhuvav len pe phuv’, — rakiréla Raj Devél.

²⁹I dre odolé dyvesá jone na javéna butýr te rakirén: “E dadá xané šutlo (kislo) vinagrado (drakh), a dre dandá čhavengiri jaciá askoma”

³⁰Ne kažno manúš javéla te merél pal péskiro čoripén; kažno manúš, savó xála šutlo vinagrado (drakh), dre léskire dandá javéla oskoma.”

³¹“I javéna dyvesá’, — rakiréla Raj Devél, — ‘kiéli Me sčhuvava Nevó Zavieto Izrailjoskire kheresa i Judejákire kheresa —

³²ne na kadasavó-pac' zaviéto, savó Me sčhudjom dadénca dro dyvés, kiéli Me lyjom len paló vast te lydžav len Jegiptóskire phuvjátyr, — kodová zaviéto jone phagirdé, na dykhí pe dová, so Me sómas Xuláj vaš lénge’, — rakiréla Raj Devél.

³³‘Ake, isyn Zaviéto, savó Me sčhuvava Izrailjoskire kheresa i Judejákire kheresa. Pale dolé dyvesá’, — rakiréla Raj Devél’, — ‘Me čhuváva Miro Zakóno andré lénde i Me čhináva davá dro léngire ile, i Me javáva léngiro Devél, i jone javéna Miré manušá.

³⁴I jone butýr na javéna te sykliakirén, kažno manúš léskire susiedos (kotaris), i kažno manúš léskire pšalés, rakirí: ‘Džinén Ras-Devlés’, — pal-dová so jone džinéna Man: naj tyknestyr ke naj baró’, — rakiréla Raj Devél. ‘Pal-dová so Me otmekáva léngiro čoripén, i Me butýr na javáva te ripirav léngiro grého.’

³⁵Ake, so rakiréla Raj Devél, Savó déla kham dyvesé, i Kon déla uphenybén vaš čhon i vaš čergeniá te den dud (svéto) ratý; Savó kuniakirela mórjo (derjáv), so valny léskire brilinena (rievinena) — léskiro lav isyn bolybnáskire-jangoléngiro Raj Devél:

³⁶‘Kóli dalé uphenybená džána krig Miré jakhéndyr’, — rakiréla Raj Devél — tedy ródo Izrailjoskiro pirijačéla te javél Miré manušénca pe saré viéki.

³⁷Adiáke rakiréla Raj Devél: “Kóli saštý te mierines bolybén uprál, i te pirirodes phuvjákiro fundámiento telál, Me adiáke-pat' otčhurdava Péstyr saró kherítko ródo Izrailjoskiro pal dová saró, so jone kerdé, — rakiréla Raj Devél:

³⁸“Ake, javéna dyvesá,” — rakiréla Raj Devél, — so fóro javéla čhudo vaš Ráske-Devléske Anamieiloskire (Xananiloskire) vučardiatyr (bašniatyr) ke Vangarytko pórta [Venglytko-ju.o.].

³⁹I šelo te mierinel protyrdelape nevéstyr mamúj ke Garivoskiri bérgica; tedy jov porisjola ke Goafo [obdžala Goafo-r.s.].

⁴⁰I saró dólo, kaj isyn pašté trúpy i pieplo, i saré féldy až ke sýgno rékica (lenorí) Kiedrono, ke venglo dre Grengiri pórta pe čačí rig, — saró javéla svénto Ráske-Devléske: fóro nijékhvar butýr na javéla riskirdo ci čhurdynó dre ruíny.”