Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 32 Bible Online

Jeriemiéjo 32 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 32

¹Lav, savó sys ke Jeriemiéjo Rástyr-Devléstyr pe déšto berš Sedekijaskiro-kralískiro dre Judéia, davá sys dešuohtoto berš, syr o Navuhodonosóro lyjá te kralinél.

²Dro dolé dyvesá Vavilonóskiro xaladybén (armija) občhudiá trusciál Jerusalimo i o Jeriemiéjo, proróko, sys phandlo dre gréda (dvóro) štaribnaskiri, so sys dro kher kralískiro Judejákiro.

³O Sedekíia, králi Judejákiro, phandia les dro štaribén, rakirí: “Sóske tu angilphenesa i rakirésa: ‘Adiáke rakiréla Raj Devél: ‘Áke, Me otdáva davá fóro dro vast kralískiro Vavilonóskiro, i jov léla les’;

⁴i Sedekíia, králi Judejákiro, na zrakhélape Xaldiejéngire vasténdyr, ne jov adiáke peréla dro vast kralískiro Vavilonóskiro, i jov javéla te rakirél lésa muial (muj pe muj), i te dykhél les jakh pe jakh;

⁵tén'či Navuhodonosóro lydžála Sedekijas ke Vavilóno, i odój jov javéla angíl davá, syr Me javáva ke jov, — rakiréla Raj Devél; mek tumé risjona i javéna te marénpe Xaldiejénca, tuménge na javéla baht.’

⁶I phendiá Jeriemiéjo: “Lav Ráskire-Devléskiro sys ke me dasavo:

⁷Ake, Anamieilo (Ganamieilo), Tyré-kakeskiro Salumoskiro čhavó, javéla ke tu, phení: ‘Kin mándyr félda, saví isyn dro Anafofo, pal-dová so túte isyn vykinybnytko pravo te kines la.’”

⁸Tén'ci Anamieilo, miré-kakeskiro čhavó, javdiá ke me pe gréda (dvóro) štaribnaskiri pir lav Ráskire-Devléskiro i phendiá mánge: “Me mangav tut te kines félda, saví isyn dro Anafofo, savó isyn pe Vienjaminoskiri phuv; pal-dová so vykinybnytko pravo isyn túte, i vykinybén tyró; kin félda péske.” Tén'ci me ĥalyjom, so davá sys lav Ráskire-Devléskiro.

⁹Adiáke me kindjom félda Anamieilostyr, miré-kakeskire čhavestyr, savó sys dro Anafofo, i me otvažyndjom léske lové — eftadešá (šekeli) rup.

¹⁰I me podčhindjom kinybnytko lyl i čhudjom čergen (štampo) pe léste, lyjom jakhitkonen (svidietielién) i Me otvažyndjom lové pe ubladýtka (viesy).

¹¹I me lyjom kinybnytko lyl dujenca papir'jenca, pérvo lyl, kaj sys čergen čhudý pir zakóno i pir statúto, i javír lyl bi čergeniakiro (bi štemposkiro),

¹²i me dyjom javír kopija pe kinybnytko lyl Varuhoske, Nirijaskire čhavéske, čhavéske Maasijaskireske angíl Anamieiloskire jakhá, miré-kakeskire čhavéskire i pe jakhá jakhitkengire, savé podčhindlepe pe kinybnytko lyl angíl saré Judénde, kon sys bešté pe gréda (dvóro), kaj stréga sys.

¹³Tén'ci me priphendjom šylales Varuhoske angíl lénde, phení:

¹⁴“Adiáke rakiréla bolybnáskire-jangoléngiro Raj Devél, Izrailjoskiro Devél: ‘Dalé lylá vaš kinyben, duj papirja: le jekh, pe saví isyn kinybnytko lyl čergeniasa, i javír, pe saví nane čergen, i čhuv len dro khoró ĥlejatyr (glinatyr), sob (kaj) jone te pasjon odój but dyvesá.’

¹⁵‘Adiáke rakiréla bolybnáskire-jangoléngiro Raj Devél, Izrailjoskiro Devél: “Kherá, féldy i vinagradniki javéna te kinenpe nevéstyr (nevés) pe daja phuv.”

¹⁶I paló dová (korigedýr) me dyjom kinybnytko lyl Varuhoske (Baruhoske), Nirijaskire čhavéske, i me mangdjompe Ráske-Devléske, rakirí:

¹⁷“O Rajo Dévla, Rajo Devlale! Ake, Tu sozdyjan bolybén i phuv Péskire baré zorjása i Péskire vytyrdyne psikesa, vaš Túke nisó nane pharó!

¹⁸Tu sykavesa tangipén (láska) but e tysjoncenge manušénge, i Tu otdesa pale Péskire sendosa čhavénge pal čoripén léngire-dadéngiro pal lénde. Dévla! Tu san baró i zoralypnaskiro, Rajo Dévla, bolybnáskire-jangoléngiro, — ake, isyn Tyró lav!

¹⁹Tu san baré-godiákiro te des godý i zor te kerés réndy. Tyré jakhá otkerde pe saré dromá, savénca čhavé manušéngire psiréna, sob (kaj) te den kažnonéske (svakoneske) pir léskiro drom, i pir barjakirdé (plódy) léskire keribnastyr/ rendéndyr.

²⁰Tu kerdián ĥertyka i dívy pe phuv Jegiptóskiri, i kerésa ke adadyvés i dro Izrailjo i maškír javire manušénde, i Tu kerdián Péske lav, savó jov isyn adadyvés.

²¹I Tu vylydžijan manušén Izrailjoskiren Jegiptóskire phuvjátyr pir znamiénii (ĥiertyká) i dívy Péskire zoralé vastésa i Péskire vydindz'kirde psikesa i baré trašaibnasa (darása).

²²Tu dyján phuv lénge, pal saví Tu dyján sovláh léngire dadénge te des la-phuv, pir saví thadéla thud i avgín.

²³I jone zaginé i uhtyldé daja phuv, ne jone na kandyné Tyrí zan, i jone na kerdé pir Tyró Zakóno. Jone sarésa na kerdé nisó daléstyr, so Tu priphendian lénge te kerén. Paldavá Tu i kerdián adiáke, sob (kaj) sarí daja bibáht te javél pe lénde.

²⁴‘Ake, isyn vučé valy phuvjátyr, so vérgi dočhude! Jone doginé ke fóro te len les, i fóro otdelape dre vastá Xaldiejéngire, savé marenape te len fóro kurtalása, bokhasa i meribnytkone fransenca: so Tu phendián, Dévla, davá vypherdiakirelape (spolninelape), i, ake, Tu dykhésa davá.

²⁵I na dykhí pe davá, so fóro otdelape dre vastá Xaldiejéngire, Tu, Rajo Dévla, Devlale, phendián mánge: “Kin péske félda pal lové i le jakhitkonen i khar jakhitkonen, pal-dová so davá fóro otdelape dre vastá Xaldiejengire.”

²⁶I javdiá ke me, Jeriemiejoske, lav Rástyr-Devléstyr, rakirí:

²⁷“Ake, Me som Raj Devél, Devél kažnoné ločake (plotiake): ci isyn vari-so pharó, so naštý te keráv Mánge?”

²⁸Paldavá, ake, so, — rakiréla Raj Devél: “Ake, Me dáva davá fóro dro vast Xaldiejengiro dro vast Navuhodonosoroskiro, kralíske, Vavilonoskireske, i jov léla davá fóro.

²⁹I Xaldiei, savé marénpe proti davá fóro, javéna i zahačkirena davá fóro i shačkirena les, i kherá, pe savengire strehi Judy thuvaliakirde drogoné smolenca Vaaloske i kaj jone vyčhuvenas thadune svénta dyibená javire devlorénge, sob (kaj) te den jag Miré xoliake pe lénde.

³⁰E čhavé Izrailjoskire i e čhavé Judejákire kerdé jekh čoripén angíl Mánde tyknal/ sternal (smolodu); čačó, čhavé Izrailjoskire, féni dénas jag Miré xoliake pal butiá, so kerdé léngire vastá’, — rakiréla Raj Devél.

³¹‘Dolé dyveséstyr, kiéli davá fóro sys čhudo ke adadyvés, jov délas jag Miré xoliake i Miré xoliakiribnaske, so Me durjakirdjom dalé-foróskire manušén Péstyr,

³²pal saró čoripén, so kerdé čhavé Izrailjostyr, i čhavé Judejátyr, so jone dyné jag Miré xoliake pe lénde: jone, léngire králja, léngire thagárja, léngire rašaja i léngire proróki, muršá Judejákire i džiibnáskire (žytieli) Jerusalimóskire.

³³I jone risiné ke Me dumesa, a na mósa; mek Me i sykliakirdjom len tasiarlune (rannjone ne) zlokostyr (rankostyr) sykliakiravas Me len, ne jone na šundlé (na kamlé) te prilén uphenybén.

³⁴I jone až čhudé péskire džungalé (brydka) ídoly dro Miro kher, savéske lav Miro sys dynó, sob (kaj) te magirén les.

³⁵I jone čhudé vučé štéty Vaaloske pe dólo Jenomoskire [Ginomoskire-ju.o.] čhavéngiro, sob (kaj) te lydžán pirdál jag léngire čhavén i čhajén te den patýv Molohoske: so Me priphendjom te na kerén lénge, so na javdiá Mánge pe godý, sob (kaj) jone te kerén dalé džungalé réndy, sob (kaj) manušá Judejákire te kerén grého.”

³⁶Akaná paldavá adiáke rakiréla Raj Devél, Izrailjoskiro Devél, — “Pal davá fóro, so tumé rakiréna: ‘Jov javéla otdynó dro vast kralíske Vavilonoskireske kurtalása, i bokhasa i meribnytkone fransenca,’ —

³⁷Ake, Me javáva te kedav len saré themendyr (stranendyr), ke savé Me tradyjom len dre Mirí xolý, i dro Miro xoliakiribén, i dro Mirí xor xolý, i Me janáva pale len pe davá štéto, i Me dáva lénge te dživén bi darákiro.

³⁸I jone javéna Miré manušá, i Me javáva léngiro Devél.

³⁹I Me dáva lénge jekh iló, i jekh drom, sob (kaj) jone te darén Mándyr saré dyvesá: vaš lačhipén péske, i vaš lačhipén léngire bijatenge, savé javéna pal lénde te dživén.

⁴⁰I Me sčhuvava viéčno Zavieto lénca, so Me na otrisjovava léndyr, sob (kaj) te keráv lačhipén lénge, i Me čhuváva Mirí traš dre léngire ile, sob (kaj) jone te na dur'jen [otdžan-r.s.] Mándyr.

⁴¹I Me javáva zoralés te radynavpe pal lénde te keráv lačhipén lénge, i Me počhuvava len pe daja phuv saré Miré iléstyr i saré Miré diestyr.

⁴²Ake, — so rakiréla Raj Devél: “Adiáke, syr Me jandjom pe manušénde sarí daja bari bída, adiáke-pac' Me janáva saró lačhipén vaš lénge, pal savó Me dyjom lav lénge.

⁴³I javéna te kinenpe féldy pe daja phuv, pal saví tumé rakiréna: ‘Joj isyn čhučí, bi manušéngiro, bi murdalengiro’, joj isyn otdyny dre vastá Xaldiejengire.”

⁴⁴E manušá javéna te kinen féldy pal lové (rup), i te podčhinen lylá (brify), i te čhuvén čergen pe lénde, i te len jakhitkonen pe phuv Vienjaminoskiri, i pe štéty, i so isyn pašýl Jerusalimo, i dre fórja Judejákire, i dre fórja pe bérgi, i dre fórja pe telatuné štéty, i dre fórja paš-dyvesytka (južna), pal-dová so Me riskiráva len plienóstyr”, — rakiréla Raj Devél.