Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 33 Bible Online

Jeriemiéjo 33 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 33

¹I sys lav ke Jeriemiéjo Rástyr-Devléstyr javír mólo, kiéli jov sys beštó pe gréda (dvóro) štaribnaskiri, rakirí:

²“Adiáke rakiréla Raj Devél, Savó sozdyjá saró davá; Raj Devél, Savó sozdyjá phuv, sob (kaj) joj te terdjol, Raj Devél, isyn Léskiro lav:

³‘Khar Man Miré lavésa, i Me otphenava túke, i Me sykaváva túke baré i garadé réndy (diély), i savé tu na džinésa!’

⁴Pal-dová so, ake, so rakiréla Raj Devél, Izrailjoskiro Devél, pal kherá dro Jerusalimo i pal kral'jengire kherá, so isyn dre Judéia, savé phagirena pir dová, sob (kaj) te javén maribnýtka valy léndyr i kurtála vaš maribén:

⁵kadalé Judy Jerusalimóstyr javné te marénpe Xaldiejénca, sob (kaj) te pherdiakiren kherá trupenca manušéndyr, konés Me muliakirava dre Mirí xolý, i dro Miro xoliakiribén pal sarí léngiri bibáht, pal so Me otrisijom dalé foróstyr.

⁶Ake, Me pričhuvava sastiakiribnytko šmata (plastyrjo) i Me vydrabakirava len, i Me sastiakirava len, i Me sykaváva lénge but móly ramánjo i patiaibén.

⁷I Me keráva adiáke, so risjona pale emanuša dro pliéno Judejátyr i Izrailjostyr, i Me pirikerava dolé štéty, syr jone sys ĥaredyr (ĥará).

⁸I Me vyžužakirava len saré léngire čoripnástyr, savésa jone kerdé gréhi proti Mánde, i Me otmekáva saró čoripén léngiro, savésa jone kerdé gréhi proti Mánde, i savénca jone phagirdé [parude-r.s.] Miro Zakóno.

⁹Tén'ci lav ‘Jerusalimo’ javéla te radynel manušén, jone javéna te šarén les, i te den patýv angíl saré Najudytkoné nacyiende pir phuv, savé javéna te šunén pal saró lačhipén, so Me kerdjom lénge: i jone javéna te darén, i te izdran saré lačhipnastyr i saré mištypnástyr, so Me keráva dalé foroske.”

¹⁰Adiáke rakiréla Raj Devél: “Adadyvés nevéstyr javéla te šunelpe pe davá štéto, pal savó tumé rakiréna: ‘Davá štéto isyn čhučó, ni manušá, ni kherítka murdalá’ — dre Judejákire fórja, pe Jerusalimóskire pe vulícy (gásy) isyn čhučó, ni manušá, ni savó džiibnáskiro, ni kherítko murdál,

¹¹iavéla nevéstyr zan radymása, javéla viesjolo (bagaibnytko) zan, javéla zan terneskiri i zan terniakiri, zan odolé manušéngiri, savé phenéna: ‘Parikirén bolybnáskire-jangoléngiro Ráske-Devléske, pal-dová so Raj Devél isyn lačhó, pal-dová so Léskiri láska (tangipén) jačélape pe saré viéki’, — i zan kodolengiri, savé janéna svénta dyibená parikiribnasa ke Ráskire-Devléskiri Khangirí. Pal-dová so Me riskiráva [davá-r.s.] lačhipén plienonenge dalé phuvjátyr, syr sys angledýr,” — rakiréla Raj Devél.

¹²Ake, so rakiréla Raj Devél, bolybnáskire-jangoléngiro: “Pe davá štéto, savó isyn čhučó, i pe savó nane ni manušá, ni kherítka murdalá, — dre saré dalé — štetoskire fórja, javéla nevéstyr (nevés) džiibnytko štéto čhupnar'jenge (pastyriénge), pir savé jone javéna te rakhén péskire ĥurty.

¹³Dre fórja bergitka, dre fórja pe dólo, i dre fórja paš-dyvesytka (južna), pe phuv Vienjaminoskiri, i pe štéty trusciál Jerusalimo, i dre fórja Judejákire, ĥurty javéna te džán péske nevéstyr tel manušéskiro vast, savó ginéla len, — rakiréla Raj Devél.

¹⁴‘Ake, javéna dyvesá,” — rakiréla Raj Devél, — “so Me saró keráva pir lačhó lav, savó Me phendjom pal kher Izrailjoskiro, pal kher Judáskiro:

¹⁵‘dre dolé dyvesá i dro dová časo Me keráva adiáke, so čačipnaskiri Rand' [Otbaripen-r.s.] vybarjola Davidóske, i Jov javéla te sendiakirél i te kerél pir čačipén pe phuv.

¹⁶Dre dolé dyvesá Juda zrakhélape, i Jerusalimo javéla te dživél bi darákiro. Ake, isyn lav, savésa jov javéla te kharelpe: ‘Raj Devél — amaró čačipén.

¹⁷Pal-dová so, ake, so rakiréla Raj Devél: “E Davidóste ŭsády / sak (vsiegda) javéla manúš te bešél pe trono Davidóskire kheréstyr,

¹⁸i javéna rašaja Lieviténgire rodóstyr; javéla te uhtylel manušén te xačkirén svénto janybén angíl Mánde, te roshačkiren mareskire janybená, i te janén len kažno dyvés.”

¹⁹Davá lav sys Rástyr-Devléstyr ke Jeriemiéjo, i phendiá:

²⁰“Adiáke rakiréla Raj Devél: ‘Kóli tumé déna ráda te phagiren Miro zaviéto pal dyvés, i Miro zaviéto pal rat adiáke, sob (kaj) te na javél dyvés i rat dro péskiro časo,

²¹to tedy moginéla (saštý) adiáke-pac' te javél phagirdó Miro zaviéto Davidosa, Miré pisharisa, kóli te na javél čhavó léste te kralinél pe léskiro trono, i adiáke-pac' Lievitenca, rašanca, Miré pomogipnaskirenca.

²²Syr naštý te gines saré čergeniá pe bolybén, ci prahinki morjoskire (derjavéskire), adiáke Me barjakirava ródo Davidóskiro, Miré čhavéskiro, i ródo Lievitengiro, savé pomoginena Mánge.”

²³I iščo (inké) sys lav Rástyr-Devléstyr ke Jeriemiéjo, i phendiá:

²⁴‘Adiáke rakiréla Raj Devél: ‘Ci ĥalyjan tu dová, so adalé manušá rakiréna: ‘Ci dalé duj kherítka ródy (pliémi): Judáskiro i Izrailjoskiro durjakirdia Raj Devél Péstyr, savé Jov vykedyjá Péske?’ Paldavá jone lyné te dykhén vučipnástyr pe Miré manušénde sýrby jone akaná na ginéna len butýr syr nacyja.’

²⁵‘Adiáke rakiréla Raj Devél: ‘Kóli Me na kerdjom by zaviéto pal phuv i phenybén, i, kóli te na javél Miro zaviéto pal dyvés i rat,

²⁶to tedy Me durjakirava by krig Péstyr kherítko ródo (pliémjo) Jakovóskiro i kherítko ródo Davidóskiro, Miré pishariskiro adiáke, sob (kaj) te na lav butýr léskire kheritkoné rodóstyr theméskire barydyrén pe ródo Avraamóskiro, Isakóskiro i Jakovóskiro. Pal-dová so Me janáva pale len plienóstyr i Me sykaváva tangipén (láska) pe lénde.’”