Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 34 Bible Online

Jeriemiéjo 34 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 34

¹Ake, lav, so sys ke Jeriemiéjo Rástyr-Devléstyr, kiéli o Navuhodonosóro, králi Vavilonóskiro, i saró xaladybén léskiro, i saré kralipená pe phuv tel léskiri zor, i saré manušá, mardépe proti Jerusalimo, i proti saré léskire fórja, i phendiá:

²‘Adiáke rakiréla Raj Devél, Devél Izrailjoskiro: “Džá i rákir Sedekijasa, kralísa pe Judéia i phen léske: ‘Adiáke rakiréla Raj Devél: Áke, Me otdáva davá fóro dro vastá kralíske Vavilonóstyr, i jov xačkiréla les jagása.

³I tu na zrakhesape léskire vastéstyr, ne tut mamúj léna i piridena dro vast léskiro; i tyré jakhá dykhéna jakhá kralískire Vavilonóstyr, jov javéla te rakirél túsa muial (muj pe muj) i tu džása ke Vavilóno.’

⁴Féni šun lav Ráskiro-Devléskiro, o Sedekíia, králi Judejákiro! Ake, so rakiréla Raj Devél pal túte: ‘Tu na merésa kurtalátyr,

⁵ne tu merésa dro ramánjo (spokojnyma) garaibnaskire jagása, adiáke syr kerdé i Tyré dadénge, anglatuné (pervoné) kral'jénge, savé sys angíl túte, adiáke so javéna te thuvliakiren (te xačkirén) drogoné smolenca vaš túke, i javéna te obroven tut, priginy (prirakiri): ‘Ake, khieningie!’ Pal-dová so Me vyphendjom davá lav.’”

⁶I proróko Jeriemiéjo phendiá saré dalé lavá Sedekijaske, kralíske Judejakireske, dro Jerusalimo,

⁷kiéli kralískire-Vavilonóskiro xaladybén marelaspe proti Jerusalimo, i proti saré fórja dre Judéia, so jačnépe: proti Lahiso i Azeka; pal-dová so féni dalé fórja zoralé vantenca jačnépe Judejákire for'jéndyr.

⁸Ĥáda, isyn lav, savó sys ke Jeriemiéjo Rástyr-Devléstyr paló dová, syr o králi Sedekíia sčhudia zaviéto manušénca, kon sys dro Jerusalimo, sob (kaj) te obzaniakirel (te ob'iavinel) vol'nyma lénge:

⁹sob (kaj) kažno (sváko) manúš te otmekél pe vólia péskire murškané i džuvlikane pisharís — Judos, ci Judyca, sob (kaj) nijékh léndyr te na rikirél Judejos (Judos) pšalés dre navolia.

¹⁰I saré thagárja i saré manušá, savé prilyné zaviéto, kandyné, sob (kaj) kažno (sváko) te otmekél pe vólia péskire pisharís i péskire pisharica, sob (kaj) te na rikirél nijékh butýr len dre navolia, jone kandyné i mekné len pe vólia.

¹¹Ne kutý (nábut) paló (poslie) dová jone dynepe pale zavietostyr i riskirdé péskire pishar'jén i pisharicen, konés jone mekné pe vólia, jandlé len pale syr pishar'jén i pisharicen.

¹²Paldavá sys lav Rástyr-Devléstyr ke Jeriemiéjo, i phendiá:

¹³“Adiáke rakiréla Raj Devél, Izrailjoskiro Devél: “Me sčhudjom zaviéto tumaré dadénca dro dyvés, kiéli Me jandjom (vylydžijom) len Jegiptóskire phuvjátyr, štetóstyr, kaj jone sys dre navolia, i phení:

¹⁴‘Pale kažna eftá berš mekén pe vólia kažnoné (svakone) péskire Judos pšalés, savó bikindia pes túke. Kiéli jov otkerela butý pe túte šov berš, bičhaven les péstyr pe vólia’” Ne tumaré dadá na kandyné Man, i jone na pričhude péskiro kan.

¹⁵Tén'ci javdiá dyvés naĥara i tumé risiné ke Me, i kerdé čačunés angíl Miré jakhá — kažno (sváko) manúš tuméndyr te phenél angíl sarénde pal vol'nyma péskire pašatuneske (susiedoske/kotariske) i tumé sčhude zaviéto angíl Mánde dro Miro Kher, savó kharélape Miré Lavésa.

¹⁶Paló (poslie) dová tumé risiné pe javír rig, i tumé magirdé Miro lav, i kažno (sváko) tuméndyr riskirdiá pale péskire pisharís i peskirjá pisharica, konés tumé mekné pe vólia pir léngiro iló, i tumé jandlé len pale dre navolia syr pishar'jén, i syr pisharicen.”

¹⁷“Paldavá adiáke rakiréla Raj Devél: ‘Tumé na kandyné Man, sob (kaj) tumé te mekén pe vólia, kažno (sváko) tuméndyr péskire pšalés, kažno tuméndyr péskire pašatunes / susiedos (kotaris): Áke, Me dáva vol'nyma tuménge — te merén, ci kurtalátyr, ci meribnytkone fransendyr, ci bokhátyr! I Me keráva adiáke, sob (kaj) te xoliason pe tuménde (tuméndyr te čurinenpe) saré kralipená pe phuv.

¹⁸I Me otdáva (vydava) manušén, savé piriginé Miro zaviéto, savé na kerdé saró pir lavá Miré-zavietoskire, so jone sčhude angíl Mánde, kiéli jone rosčhindle cieliantos pir paš i proginé maškír pašá cieliantoskire —

¹⁹thagar'jen Judejátyr, thagar'jen Jerusalimóstyr, jevnuhen, rašán, i saré manušén dolé phuvjátyr, savé proginé maškír pašá cieliantoskire,

²⁰Me otdáva (vydava) len dro vastá léngire-vergéngire i dro vastá odolénge, savé rodenas léngiro di. Léngire trúpy javéna syr xabén (mas) čirikliénge bolybnaskirenge i riskiribnáskire murdalénge pe phuv.

²¹I Me dáva Sedekijas, kralís Judejakires, i léskire thagar'jén dro vastá léngire vergéngire, dro vastá odolénge, savé rodéna léngiro di, i dro vastá kralískire-Vavilonóskire xaladybnaske, so risiné pale tuméndyr.

²²Ake, Me priphenava, — rakiréla Raj Devél, — ‘i Me keráva adiáke, so jone risjona ke davá fóro. Jone džána maribnása pe davá fóro i shačkirena les jagása; i Me keráva fórja dre Judéia čhučé, bi manušéngiro’”