Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 35 Bible Online

Jeriemiéjo 35 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 35

¹Lav, savó sys ke Jeriemiéjo Rástyr-Devléstyr dre Ioakimoskire dyvesá, čhavéskire Iosijaskire (Josijaskire), kon sys králi pir Judéia, rakirí:

²“Džá dro kher Rehavitengiro i phen lénge, i jan len dro Kher Ráskire-Devléskiro , dre jekh komora, i de lénge mol (vino) te p'jen.”

³Tén'ci lyjom me Iazanijas (Jazanijas), javire čhavés Jeriemiejoskires, savó sys Avacynijaskiro (Xabacynijaskiro) čhavó, i léskire pšalén i sarén léskire čhavén, i saró kher (čékar') Rehavitengiro,

⁴i jandjom me len dro Kher Ráskire-Devléskiro , dre komory Ananoskire čhavéngire, kon sys Ĥodolijaskiro čhavó, savó sys manúš Devléstyr. Dalé komory sys pašýl komory thagar'jengire, uprál Maasejaskiri komora (kon sys Sielumoskiro čhavó), savó sys rakhibnaskiro pašýl vudár.

⁵Tén'ci me čhudjom angíl čhavénde Rehavitengirende kučyka pherdé moliasa (vinosa), i musera (stakany), i phendjom me lénge: “P'jén mol (vino).”

⁶Ne jone otphendlé: “Ame na lása te pjas mol, pal-dová so amaró dad Ionadavo (čhavó Rehavoskiro) priphendiá aménge, rakirí: ‘Tumé na javéna te p'jén mol, ni tumé, ni tumaré čhavé, nijékhvar dro džiibén.

⁷I tumé na čhuvén kherá, i na počhuven giv dre phuv, na rozlydžan vinagradýtko bar, i te na javél tuménde nisó daléstyr, ne tumé javéna te dživén saré péskire dyvesá dre šátry, sob (kaj) tuménge te dživén but dyvesá pe phuv, pe saví tumé javéna te loden.”

⁸Adiáke ame kandyjam zan Ionadavoskiri (čhaveskiri Rehavoskiri), amaré-dadéskiri dro saró, so jov priphendiá šylales (strenges) aménge: te na pjas mol dre amaré saré dyvesá: — ame, amaré romniá, amaré čhavé ci amaré čhaja,

⁹i te na čhuvas kherá te dživás, ci, sob (kaj) te na javén aménge vinagradýtka barja, ci féldy, ci giv te počhuvas.

¹⁰Ne ame jaciampe te dživás dre šátry, ame kandyjam i kerása saró adiáke, syr o Ionadavo (amaró dad) priphendiá aménge te kerás.

¹¹I syr sys adiáke so o Navuhodonosóro, králi Vavilonóskiro, javdiá pe daja phuv, tedy ame phendiam: “Javén, džása ke Jerusalimo, darane Xaldiejéngire xaladybnastyr, darane Siriicengire xaladybnastyr”, i ame dživasa ke Jerusalimo.”

¹²Tén'ci sys lav ke Jeriemiéjo Rástyr-Devléstyr, rakirí:

¹³‘Adiáke rakiréla bolybnáskire-jangoléngiro Raj Devél, Devél Izrailjoskiro: “Džá i phen manušénge Judejátyr i odolénge, kon dživéla ke Jerusalimo: ‘Ci na priléna tumé uphenybén te šunén Miré lavá?’”, — rakiréla Raj Devél.

¹⁴Lavá Ionadavoskire (čhavéskire Rehavoskire), so jov priphendiá péskire čhavénge — te na p'jen mol (vino) vypherdiakirenape (spolninenape), i ke adadyvés jone na p'jéna, i jone kandéna priphenybená léngire dadengíre. Ne saroiekh (usajékh) so Me i rakirdjom tuménge tasiárles (ránes) zlokostyr (rankostyr), ne tumé na kandyné Man.

¹⁵I Me bičhavavas ke tumé saré Miré dynar'jén, prorokén, Me bičhavavas tasiárles (ránes) zlokostyr len, rakirí: “Risjon akaná, kažno (sváko) jekh tuméndyr péskire bibahtalé droméstyr, lačhakiren (kerén fededýr) péskire réndy, i na psirén te kerén patýv javire devlorénge, tedy tumé javéna te dživén pe phuv, so Me dyjom tuménge i tumaré dadénge.” Ne tumé na pričhude péskiro kan, i na kandyné Man.

¹⁶Dykhén: čhavé Ionadavoskire (čhavó Rehavitoskiro) vypherdiakirde priphenybén péskire dadéskiro, so jov dyjá lénge, ne kadalé manušá na kandyné Man.

¹⁷Paldavá adiáke rakiréla bolybnáskire-jangoléngiro Raj Devél, Izrailjoskiro Devél: “Ake, Me janáva pe Judéia, i pe saré manušénde, kon dživéla ke Jerusalimo, saró fuipén, so Me khardjom len, ne jone na otphendlé Mánge.’”

¹⁸I phendiá Jeriemiéjo kheréske (čekarjake) Riehavitoskireske: “Adiáke rakiréla Raj Devél, bolybnáskire-jangoléngiro, Devél Izrailjoskiro: ‘Pal-dová so tumé šundlé priphenybén Ionadavoskiro (tumaré-dadéskiro), i tumé rakhne (rikirdepe ke saré léskire uphenybená) i kerdé saró, so jov priphendiá tuménge,

¹⁹to paldavá adiáke rakiréla bolybnáskire-jangoléngiro Raj Devél, Devél Izrailjoskiro: ‘Ionadavoste, čhavéste Rehavitoskireste’, dre saré dyvesá javéla manúš te terdjol angíl Mánde.’”