Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 37 Bible Online

Jeriemiéjo 37 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 37

¹I lyjá te kralinél o Sedekíia, čhavó Iosijáskiro, pe štéto Iiehonijaskiro, savó sys čhavó Ioakimoskiro, konés Navuhodonosóro králi Vavilonóskiro čhudiá syr kralís pe phuv Judejakiri.

²I ni jov, ni Sedekíia, i nijékh léskire dynar'jéndyr (slugéndyr), ni manušéndyr dolé phuvjátyr na pričhude kan ke lavá Ráskire-Devléskire, so Jov rakirdiá pir mánde, Jeriemiejoste.

³I o Sedekíia, králi bičhadiá Iieguhalos, čhavés Selemijakires i Sofonijas, čhavés Maasejaskires, kon sys rašái, ke proróko Jeriemiéjo te phenén: “Pomangpe pal aménde Ráske-Devléske, amaré Devléske.”

⁴Ne Jeriemiéjo tedy javélas i psirelas vol'nes maškír manušénde, pal-dová so jone na čhudé les iščo (inké) dro štaribén.

⁵Tedy faraonóskiro xaladybén vygijá Jegiptóstyr, i kiéli e Xaldiéi, savé občhude trusciál Jerusalimo, šundlé daja zan (zviés') pal lénde, to tedy jone giné krig Jerusalimóstyr.

⁶I sys lav Ráskire-Devléskiro ke proróko Jeriemiéjo, rakirí:

⁷“Adiáke rakiréla Raj Devél, Devél Izrailjoskiro: Adiáke tumé phenén Judejákire kralíske, kon bičhadiá tumen ke Me, sob (kaj) te phučén Mándyr: ‘Áke, isyn faraonóskiro xaladybén, so vygijá te podel vast tuménge, javéla te risjol pale pe péskiri phuv.

⁸Ne javéna pale e Xaldiéi, i javéna te marénpe proti davá fóro, i jone léna les, i jone shačkirena les jagása.’

⁹Adiáke rakiréla Raj Devél: ‘Na xohaven pes’, rakirí: ‘Haldiéi, čačes, giné améndyr péske’, ne jone na džána péske.

¹⁰Pal-dová so na dykhí pe dová, so tumé i domarenas saró xaladybén Xaldiejengiro, savé marenaspe proti tuménde, i odój te jačénpe féni dukhade (raniena) manušá léndyr, tedy saroiekh uštelas kažno (sváko) manúš dre péskiri šátra, i xačkirelas fóro jagása.’”

¹¹I sys adiáke: kiéli Xaldiejéngiro xaladybén mekciá osada Jerusalimo pir dová, so sys xaladybén Faraonóskiro,

¹²to o Jeriemiéjo gijá krig Jerusalimóstyr pe phuv Vienjaminoskiri, sob (kaj) te garadjol maškír manušénde.

¹³I kiéli jov sys dre Vienjaminoskiri pórta, odój sys barydyró pe stréga (rakhibnar'jénde), kon kharélaspe Irija, čhavó Selemejaskiro (čhavó Xananejaskiro), i jov uhtyldia Jeriemiejos, prorokós, i phendiá: “Tu našesa ke Xaldiéi.”

¹⁴Tedy o Jeriemiéjo phendiá: “Davá isyn načačo! Me na našava ke Xaldiei.” Ne Iiereja [Irija-ju.o.] na šundiá les, i jov uhtyldia Jeriemiejos i jandiá les ke thagárja.

¹⁵I thagárja drieván xoliasyne pe Jeriemiejoste, i jone šuliakirenas (marenas) les i jone čhudé les dro štaribén dro kher Ionafanoskiro, lylá-čhinybnaskireske. Pal-dová so jone kerdé štaribén dro dová kher.

¹⁶Kiéli Jeriemiéjo zagijá dre štaribén ĥanbinasa (jamasa), so sys dre kheltra (podvalo), kaj jov jaciápe odój but dyvesá,

¹⁷to králi Sedekíia bičhadiá te janel les javrí. O králi phučelas čorahanés léstyr dro péskiro kher i phendiá: “Ci isyn vari-savó lavoro Rástyr-Devléstyr?” I otphendiá Jeriemiéjo: “Isyn.” Tén'ci jov phendiá: “Tut vydena dre vastá kralískire Vavilonóstyr!”

¹⁸I phendiá Jeriemiéjo kralíske Sedekijaske: “Savó čoripén me kerdjom túke i tyré dynar'jénge, ci tyré manušénge, so tu čhudián man dro štaribén?”

¹⁹I kaj isyn tyré proróki, savé angilphenelas, rakirí: “O králi Vavilonóskiro na javéla te džal pe tuménde ci proti daja phuv?

²⁰Paldavá me mangáva te šunés akaná: ‘Miro Rajo, králjo! Mek te priles tu miro mangipén, na rískir man dro Ionafanoskiro lylá-čhinybnaskiro kher, sob (kaj) te na merav me odój.’”

²¹Tén'ci králi Sedekíia priphendiá, sob (kaj) te čhuvén Jeriemiejos dre gréda, kaj sys stréga, i jone dénas léske kotér (kusko) maró pekibnaskire[5] gasatyr (vulicatyr) až ke dová, syr maró dro fóro končindiape. I Jeriemiéjo jaciápe dre gréda, kaj sys stréga.